Reti Linguistik

Definasyen linguistik

Leka jaku linguistik tu datai ari leka jaku latin iya nya lingua ti mai reti jaku. Dalam jaku Perancis, linguistik tu disebut “langage-langue”, Itali lingua, Sepangol “lengua” enggau Inggeris “language”. Nitihka Abdullah Hassan (1984:2), linguistik tu sains ti mansik senentang jaku tauka bahasa. Linguitik tu iya nya sains ti mansik senentang jaku laban linguistik ngisi peminta guna sains dalam pemansik ti bukai. Kelimpah nya, linguistik tu dipadahka saintifik laban chara ti diguna empirikal bepelasarka utai ti dipeda, diasai enggau didinga.

Struktur jaku

Nitihka Levi Strauss (1993:279/1), struktur ngembuan penteba sistem iya nya leman nyentuka ubah nyadi ba siti-siti leman ti mai ubah ngagai leman ti bukai. Leka jaku struktur enggau sistem ti engkeman dikena laban leka jaku tu ulih dipasukka dalam semua elemen jaku iya nya fonetik, morfologi enggau sintaksis. Struktur ulih dibida ngena tukuh sistematik siti-siti jaku iya nya nitihka tusun fonetik, alomof, morfem enggau sintaksis.

Mansik struktur jaku dalam baka fonologi, morfologi, sintaksis, semantik enggau leksikologi tauka jantil subdisiplin baka morfosintaksis enggau leksikosemantik. Fonologi iya nya penteba bunyi jaku, chara nyadi enggau guna dalam sistem jaku. Fonologi tu sinonim enggau fonemik. Morfologi iya nya struktur jaku, bagi enggau chara penyadi iya. Sintaksis iya nya kaul entara siti pangan diri enggau tusun nyentuka nyadi siti jaku. Semantik iya nya reti jaku sekalika ti betukuh leksikal, gramatikal tauka konteks. Leksikologi iya nya leksikon tauka kosa jaku siti-siti jaku ari semua aspek.

Penteba linguistik

Bisi tiga aspek ti patut diperatika dalam aspek linguistik iya nya aspek jaku ti diguna dalam siti-siti lebas jaku, aspek ayat enggau aspek peneguh.

Aspek kosa jaku iya nya guna jaku dalam siti-siti lebas sekalika dikena dalam jaku khusus, jaku rama tauka jantil kedua-dua nya tadi. Guna jaku ti enda sama bepelasarka bidang ulih ditentuka enggau lebas ti diguna. Kelimpah ari nya, bisi mega lebas jaku ti nginjau lebas jaku bukai. Ngemuntangka jaku, senentang aspek kosa jaku semua aspek ayat dikerandauka kena nunjukka siti-siti lebas tu ngembuan jaku-jaku ti bebida enggau lebas jaku ti bukai.

Dalam aspek ayat, pekara ti dikemeratka iya nya bansa ayat enggau penempa ayat ti diguna dalam siti-siti lebas. Bisi mega lebas ti nguna mayuh ayat turu enggau kurang ayat tunggal. Tang lebas ti bukai mayuh proses ningkilka mayuh nyadi dalam ayat-ayat ti dikena. Pandak jaku, dalam aspek ayat semua pekara ti bekaul enggau bansa penempa ayat ti dikerandauka.

Aspek peneguh iya nya ayat ti entap ba penempa ayat ti diguna dalam siti-siti lebas ngambika nyadi siti teks. Aspek tu bekaul enggau sesebengkah leman ti diguna lebas ngambika nyadi siti jaku ti bekaul enggau pangan diri lalu entap. Bisi mega lebas jaku ngulang keratan rentas enggau ti bukai dikena ngayanka pengentap siti-siti lebas.

TELAJAN

Nyadi lemai siti leboh maia Telajan nyau bujang raya, dia iya lalu ngempuru ka samoa sida sarumah. Udah samoa orang sampai datai dia iya lalu madah kadiri deka belelang ngagai menoa orang. “Aku tu,” ko iya . “Deka belelang netak kedang randang begagaii, deka pegi ka Jawa Jambi napat tisi langit landai.” Ninga jako iya munyi nya tak ngenong mega apai iya Keling baka manok sabong besara bulu, tak tepagang baka lang bedua lampang tekang jelu.

Kabuah iya pia, laban iya tekenyit ninga Telajan bangat nadai semaia deka nurun bejalai. “Au, kamaia nuan bekejang deh anak ?” pia ko Keling. “Enti utai nadai nanggul, pagila nurun meh aku, apai, tang aku enda mai kaban, angka orang enda tan merinsa dibai aku,” pia ko Telajan. Indai iya Kumang enda ngasoh iya bejalai kadiri. Tang Telajan enda ngasoh indai iya bangat irau ati. “Laban dalam dunya tu indai, antu madah ka aku, nadai utai tau munoh aku.”

Keling lalu nanya ka menoa orang deka dituju iya bejalai. Nyadi saut iya, “Laban mimpi aku apai, dasoh indai tuai orang jadi enggau indu benama  Endu Lulong Bengkong Bungai Api,, Dayang Linggang Nengeri, Lulong Bengkong Bungai Bulan, Dayang Tekang Mau Serugan.”

“Lalu siko ga agi petunggal aku, ko antu dasoh iya ambi aku ka bini, benama  Endu Kemeli Kemantan Padi, Dambi Mimpi Nyadi Raja, Kemelat Bungai Lensat, Dambi Kenyap Tindok Lina.”

“Enti aku enda jadi enggau indu dua iko nya, nama aku enda parai, aku gila. Nyadi menoa sida nya di Penyuan Batu Bulan Baka Papan Lantak cheremin, Penyuang Batu Bintang Kitang-kitang Baka Tampang Ngena Disalin. Menoa nya, menoa Rengayong bepadong ka lumpong besi baja Bujang Linggang Menoa. Nya nama apai Lulong Bengkong Bungai Bulan. Lalu menoa nya mega dipangkang Pengiran Jurai mangkang Tisi Langit Salang Mangkang Lenggang Bintang Berakit.”

“Iya tu Apai kemeli Kemantan Padi. Menoa jauh amat ari tu apai, lapan belas taun baru aku tau datai din, enti nadai utai dikena.” Ninga munyi nya, nadai mega jako sida Keling, lalu dasoh mega enggai ka anak tak nyau parai ngapa, enti enda nitih ka jako antu. Udah abis jako nya, orang nyau ngirup nyau samoa indah, laban selamat ka Telajan deka nurun belelang.
Udah nya tindok mega meh orang kemunok ini mejam melanjan mansau sahari.

3. BERADU
Udah meh lapan belas kenyap malam nya hari pan nyau teringkas tawas. Udah makai udah apa indah, Telajan pan nyau nengkira diri deka mupok.
Pasok ka iya engkerimok  baka kemujok mati telentang. Pasok ka iya unus pit saratus baka Beketan Tulus pulai belelang. Pasok ka iya simpai rangki cheli-cheli, baka semalau ili nepan di rangkang. Pasok ka iya demam ngeraran di dakuan buku ruas tulang. Diadu ka iya langgu tingga berua mangka di janga bau nuking. Lalu dibelit ka iya sirat sakechit tau dikena nekang langit kamarau langkang.

Dadu ka iya sirat seguma-gumol berat sapikul lapan pengedang. Tangkup ka iya ketapu lingu-lingu ujak bulu Belajau lelang. Tangkin iya tikai burit peda tak bendit endit baka labit madu midang. Nya baru tangkin iya luching dinga beranaing munyi naning meling lubang. Tangkin iya belading unding beranaing makai untak tulang, dajap tajam penyapan randang. Tangkin belikar lapar puak menoa badi andai bemata changka, Di ubut munjong jejampong. Kebal asal tibak tangkal dibuku ruas tulang penyelinting sangking
ditunjok jari butang.

Batu ratai bisi ga iya mai ngambi tegar bejalai lempong nyingkang. Batu lemetak bisi ga iya mai kena nujah awak menoa orang. Nya baru san iya enteran banang tunsang. Pegai iya terabai simbang punggang. Dibai iya gagong kulit kijang langit nyawa nyaris begigit nyelepak gentilang baroh remang. Gagong kulit remaung nyawa negong di moa lubang.

Peda penyigat Telajan balat amat ari antu jukal berundang petang,
Peda tak rarentau baka antu buyu pulai nunang bini orang. Bangat kering ari Saging pengulor rintong puang sigau ari lalau pandang nyang. Peda mata enggi iya baka pelaga leka kelam, Peda tachak udu tampak ari bulan meratagan. Ukir rusok gerayuk nandan jelayan, Kelinggai pah deduyah lapan tangkan. Bok enggi iya kelapong mas mau serungan.

Udah tembu iya nengkira diri peda tak pansut Endu Kunchi Hari, Singkum Rapit nadai meranggang, Gemurau Mau Tuchi ulih muntas di kandong.
Nya ga bini Mabong mai tinchin salin Selimbau Pininjau rawak dunya,
Peda tak chinang-chinang baka bara api, mesai janggut undai.

“Tu adi aku Telajan Nempap bukit tumpur nyadi emperan, Tedong nyelingkong mantok melit Iko bebelit dalam bulan. Tinchin aku tu bai ulih nuan kena nuan belelang netak kedang randang besimpan.”
Lalu dirasok ka iya di tunjok penchingan enggi Telajan. Peda tak lalu nyingkum.

“Anang enda bejimat nuan ngibun tinchin aku tu enggai ka iya lenyau, adi wai,” pia ko Kunchi Hari. “Au meh ika,” ko Telajan. Udah nya baru iya lalu madah ka diri mupok ngagai sida sarumah, iya lalu betabi enggau samoa sida. Angkat ari nya baru iya nurun.

4. ANTU GALAU GERAWAN
Lalu bejalai meh iya ngulu ai Batang Panggau Libau pegiau takang isang, Ai Merawa Lama munyi ka berimba bong nebang. Bejalai meh iya sahari-hari nya, malam hari bemalam ga iya, tawas hari bejalai ga. Iya pan nyau udah bejalai lapan hari lapan malam, nya baru iya datai di entigis Ulu Panggau ba menoa ke dikumbai di bukit Gemong Lemungut, Tuchong Ubah Ribut.

Angkat ari nya, iya niki bukit nya sahari-hari nya meh iya. Iya meh hari nyau kira maia ngulih ka manok lemai, nya baru iya datai di tuchong. Udah nya iya lalu ngaga langkau lalu hari pan nyau malam. Udah makai, udah apa indah, iya lalu tindok. Kira maia tengah malam dia iya ninga tinchin iya bejako, “Apai-apai ! Dani nuan apai ! Antu apai, antu ! Angkat nuan apai !”

Angkat Telajan, lalu merejok ka moa langkau. Peda iya Antu naka pemesai utai, Antu Galau Gerawan. Angka bulih enam depa peninggi antu nya, lalu pemesai iya bisi tiga pemerap. Dinga Antu nya lalu bejako, “Hah ham ! Hah ham ! Lagi iya ensepi asai, Nyamai dipakai ! Nyaman ditelan !” Telajan lalu bejako dalam ati diri, “Apu, pama antu nya, sepi asai nuan lagi. Antu Galau Gerawan nuan mungkal nanjal aku, mansang meh nuan kitu. Enda aku rari ka nuan.”

Angkat Telajan lalu nangkin nyabur chudor pengundor bala penyerang. Jengkau sangkoh pegai terabai ada danti iya meh antu nya. Datai antu nya enda chechamang lalu nyamah sereta nangkap Telajan. Tak lalu ditelan iya enggau terabai-rabai enggau sangkoh-sangkoh meh tudah Telajan nya tadi. Ensepi diri udah ditelan antu dia iya ada mali diri nyadi tekang api ke menjadi mau ngerendang. Dia antu ensepi perut diri asai ka ditunu lalu dilua ka iya Telajan. Pansut Telajan ari perut antu, nya baru iya tak berimba nebang kaki antu. Pantap iya enda ulih, tumbok enda ga telih. Ensepi baka nya, leka ka iya sangkoh enggau nyabur, tak dipegai iya kaki antu, lalu dibiau iya kebaroh, peda kayu abis tumbang, biau katas tusor bukit abis ngeruang. Biau ka ai pechah batu galang. Dinga antu nyau rauh-rauh dinsah  iya samalam-malam nya.

“Parai aku uchu Telajan ! Bado agi uchu ! Badu saru aku uchu ! Isa aku meri nuan pengaroh batu gamang pengerak bala. Udu kering meh nuan tu uchu nyelingking kijang. Empai meh aku kala dinsah orang asai nuan tu uchu,” pia ko antu nya. Udah nya badu mega Telajan mangka ka antu nya. Peda tudah antu nyau melulor dilah iya nyau ka parai. Dambi Telajan ai dipanjah ka iya ba moa antu, nya baru antu nya ngeleda. Udah nya lalu diulih ka iya pengaroh batu gamang ari bungkus rajut, lalu disua ka iya ngagai Telajan.

“Tu uchu, enda mudah batu gamang tu enti dikirah nuan, lalu imbor ka nuan ai iya, lalu datai magang samoa indu utai ke tau nyengat. Tu meh kena nuan ngelaban munsoh. Nadai tan meh orang dilaban nuan tu ila uchu. Tu aku udah alah laban nuan.” Udah nya pulai meh antu nya tadi, hari pen nyau tawas. Udah tembu Telajan makai pagi, iya lalu ninjau ngagai menoa orang ke deka dituju iya.

5. BUNSU RUAI
Peda iya bukit Ringgit Mayang, betentang tujoh tangkan. Kilah nya dipeda iya bukit Kelebun Ambun, sataun mansang nunu, bangat jauh penapat dipeda iya. Udah iya ninjau, nya baru iya bejalai. Angkat ari nya sahari-hari nya, kira tengah hari baru iya datai di tuchong Balai Nyabong. Peda iya tinting nya tak sedandang nadai uras sakali-kali.

“Apu badas amat meh tinting tu,” ko iya bejako kadiri berandau nengali. Dinga nyawa orang indu tak kalau-kalau ngangau ka iya niki. “Ngetu-ngetu anak Telajan Nempap bukit tumpor nyadi emperan ! Ngetu anak aku ngetu.” “Apu, sapa me nuan tu tak nganak aku ngapa ?” “Au, aku tu Bunsu Indai Ruai ke mangkang tatai panjai nyementang.”

Malik Telajan meda rumah ka sabuah-buah, langkau dugau-dugau, sapintu-pintu. Peda iya indu siko bajik bendar gamal. Telajan pan lalu niki. Datai di rumah, dia indu nya lalu nganchau tikai, lalu ngasoh iya dudok. Udah nya, indu nya lalu ngambi sarang pinang sarang insap. Udah nya lalu dudok meh  iya dia. Indu lalu madah ka nama diri. “Aku tu, Endu Tepiau Bekangau Lemai
Endu Pating Buloh Kirai.”

Iya lalu madah ka diri udah jadi enggau Keling, apai Telajan leboh Keling belelang mansa iya dulu menya. Udah nya Bunsu Indai Ruai tama kabilik lalu berapi surong kaki, surong jari. Dinga nyau dangai-dangai ngangau ngumbai makai. Tama Telajan ka bilik lalu dudok makai. Udah badu makai lalu diulih ka Bunsu Indai Ruai ai tuak, peda tak mili-ili penoh mangkok indu jalong bulih pemesai penangkup pala. Lalu dirup Telajan sepi manis amat. Udah nya iya lalu pansut ka ruai. Udah Indai Ruai tembu ngadu ka utai di bilik, dia iya lalu pansut ka ruai nitih ka Telajan. Dia seduai iya lalu berandau nyampau utai dikenang, betiu maioh betakang. Indai Ruai lalu nanya ka pejalai iya. Telajan lalu madah ka diri mansang belelang  laban deka nepat indu ke dambi iya mimpi. Indu orang di Penyuan Batu Bulan Baka papan lantak cheremin.

‘Apu, jauh amat meh menoa orang nya deh anak. Nya orang diau di langit lapan belas serak. Tang nuan anang enda nuju menoa aki nuan Raja Kekura seduai aki nuan Raja Pelandok. Tang seduai nya diatu agi bedau di tisi langit din ngereja lubang mas lalu ngembuan lubang gemala. Lalu seduai iya bisi ngembuan utai ke tau di kena nuan bejalai kin. Enti nuan enda mansa menoa seduai nya tusah nuan datai di menoa orang nyin ila. Kadua, ajar aku, nuan anang enda jimat nengah jalai tu ila, laban menoa tu maioh antu ke deka nganu nuan.” Udah Bunsu Indai Ruai ngajar iya Telajan lalu madah ka diri deka mupok.

6. ANTU LAMBOR
Angkat Telajan ngejang ka rumah Bunsu Indai Ruai lalu bejalai meh ga iya sungai di ulu, sungai di ili, nyidi menasan jalai jani. Nyau kelama baru iya datai di Bukit Ringgit Mayang, betentang tujoh tangkan. Di tiki iya bukit nya lalu melunggang sapiak, udah nya niki baru. Iya pan nyau datai ba tangkan ka tujoh lalu manggai di punjong, dia iya lalu merening ka ujong jalai. Peda iya antu nyau ngenjing baka kain kesumba, ngeli iya nyau ngerising meda Telajan. Pala iya lunchung belancham baka ijap bubu, mata iya sigi-igi aja. Bulu iya bauh nyau nyelembaian. Tak nyeringgang meh penudok antu nya dia, nya ga jari iya kekamang deka nangkap Telajan.

“Apu, mangah amat meh antu tu deh. Tentu tu meh Antu Lambor ko sida apai,” pia ko Telajan bejako kadiri, berandau nengali.

Mansang Telajan semak antu nya, sepi iya angat amat asai ka kena pandang daun api. Tak ada kelah-kelah meh iya laban pengangat antu nya. Udah nya dulih ka iya kelambi baju ambun ari temilah manah lumpung, sika lama mapang. Lalu dipasok ka iya baju ambun nya tadi, nya baru antu nadai ngawa iya agi. Peda iya mata antu nya kijap-kijap bulih mesai moa gantang mengkang di pandang ka iya ngagai Telajan. Nya baru Telajan ada ngulih ka laja ipoh, lalu disimpan iya dalam sumpit, lalu selinting ka iya ngagai leka mata antu. Ada dikesoh ka iya, peda tak ada mengkajat, dinga lalu nyerauh antu nya ensepi mata diri asai ka ditunu unggun bara api. 

Angkat antu lalu nangkap Telajan. Sepi antu jari iya asai ka putus, lalu dileka ka iya Telajan. Udah nya antu lalu mabok ipoh. Tak ngila diri meh iya dia. Sepi tanah tak berenyang-renyang, menoa tak guyang-guyang. Abis madang keladan, madang tekam, madang kelampai, madang mikai diteruju antu. Bisi sedandang umai tunggal pia meh kayu rebah jamah iya. Udah nya tak ada : “Wak ! Wak ! Wak ! Parai aku tu !” ko antu. Dinga tak merentum rebah nyengkar belakang tinting. Lalu diperaka iya bangkai Antu Lambor. Iya pen mupok bejalai baru ngejang ka menoa nya.

7. BUNSU LUKAN
Enda lama udah nya baru iya datai di kaki bukit Kelebun Ambun. Dia iya lalu bemalam. Benong iya baru belaboh deka tindok dinga iya bisi munyi nyawa lorang indu rami bendar. Dinga iya tak enda jauh ari endor iya ke belangkau. Tu ko munyi nyawa indu nya dinga iya, “Na-na, ning-ning, Nong-na, nong-nong. Dani dek Lukan dani, angkat dek Lukan angkat. Anak Temuai datai lemai, Anak orang datai petang, Anak Iban datai malam, Deka meda kita ngajat, Lukan. Angkat kita Lukan Pirak.”

Udah nya Telajan lalu angkat ninjau ngagai tunga munyi nyawa nya tadi. Dia iya lalu meda Bunsu Indu Antu Raja Lukan dudok atas kerusi lukan, ngemata ka lukan pirak ngajat.

Peda Telajan orang indu lapan iko berintai-rintai bepaling ngelingi kerusi Raja Lukan Gemala. Udah Lukan Pirak ngajat nya baru Lukan Mas. Peda jauh agi landik ari ajat indu Lukan Pirak.  Bedau Telajan kala meda orang indu pandai ngajat ari bansa indu Lukan nya. Samoa indu dia manah magang gamal. Lalu bilik endor sida ngajat umbas ga pemesai peda iya. Ari endor iya ke dudok nya nyamai bendar ngemata ka indu lukan ngajat, laban samoa menoa nya dia terang magang. Lama bendar Telajan ngemata ka nya dia. Kira lebih tengah malam peda tak ngijap sakali, udah nya peda iya nyau Bunsu Lukan nadai agi ayan dia. Telajan pulai lalu tindok. Pagi dabas iya pendiau Bunsu Lukan peda iya semina batu anchau enggau batu galang sigi bisi dia.

8. ANTU SEPARU ANYA
Udah makai pagi nya Telajan lalu niki bukit Kelebun Ambun. Kira tengah hari iya pan datai di tuchong. Dinga iya tinchin di tunjok bejako : “Jaga-jaga dek apai aku Telajan. Nyin antu nyin apai, Antu Separu Anya, Aki tunggal ngeli sigi saleka-leka.”

Malik Telajan meda antu nya besai amat. Enda Telajan kala meda antu mesai nya dalam umor iya. Tuboh antu nya angka bisi dua belas pemerap, pala iya dudok nuntong di dan perawan, pending iya mesai chapan, ngeli sigi mesai tekaran, mata mesai pasu masok lapan, mulut nebal lengan. Dinga tak nguap, “Ha, ha, ham ! Anak mensia !, Bau anak uda !”

Tak merening meh antu nya lalu tepeda ka Telajan ada ditangkap lalu disium iya. “Hum ! Bau uchu aku ! Uji gali nuan uchu. Aku mantap nuan, enti amat uchu aku, enda nuan telih lagi.”

Leka ka iya Telajan lalu gali. Sintak iya nyabur peda bisi tiga depa pemanjai, lalu sadepa pengeluar belakang, bisi sajengkal penebal. Ditantai ka antu lalu dipantap iya Telajan. Dinga munyi ka mantap takang besi. Peda nyabur iya ada bekilong. Pantap iya baru peda simpak ga nyabur bisi dua jengkal rarat.

“Apu ! Amat mang meh uchu ari kepayang pandok sapagi. Munoh ari ipoh ngujong jenggi,, tajam ari sebalan mata besi.” Angkat ga Telajan ari iya ka gali. “Uji aku ga mantap nuan aki,” ko iya. Gali mega tudah Aki Antu nya tadi. Tak ada disintak Telajan nyabur tangga sabayan. Dinga tak gemetar munyi pinjar bedil meriam. Lalu dipantap iya perut antu, dinga tak meletup pambus munyi guntor. Aki Antu madah ka diri parai.

“Idup ka aku uchu Telajan. Parai aku tu uchu. Ila nadai nulong nuan uchu, maia ngayau mulau, maia nuan nyerang ila uchu numbang ka menoa.”
Angkat Telajan lalu disembor iya perut Aki Antu lalu suman tekala nya. Iya lalu bejako ngajar Telajan munyi tu, “Tu pia uchu enti munsoh bangat maioh enda ulih itong, bala enda bebaka datai nuntong nuan lalu ngangau ka aku
munyi tu, “Ni nuan aki aku Antu Separu Anya, Aki setunggal ngeli Sigi saleka leka. Maioh munsoh tu aki,” pia jako nuan ngangau ngambi ka aku datai uchu Telajan.”  Udah aki iya bejako munyi nya, Telajan pan lalu nyau bejalai baru ngejang ka endor nya.

9. BUNSU LANDAK
Bekejang iya ari Bukit Kelebun Ambun, lalu terengkah kenu iya di Lebak Kerimpak Batu Anchau. Peda menoa nya gerugu batu. Bejalai iya ari nya meda tilong batu sigi, baka bilik lubang batu. Tak merening meh iya dia, lalu tepeda ka indu bajik gamal dudok dalam lubang batu. Dinga tak ngangau, “Ngetu Telajan !” ko iya. Iya lalu ngetu dia, orang indu lalu madah ka nama diri, “Dara Ilam ngembuan Geringan gerunong besi, Bunsu Landak ngalan
mangkang gam batu besegi.” Iya madah ka diri udah jadi enggau Keling apai Telajan leboh iya lelelang mansa menoa nya dulu suba.

10. ANTU LAPAR
Udah makai udah apa indah lalu bejalai baru ga Telajan ngejang ka endor nya. Nya baru iya mansa Emperan madang ridan berasok dan besarok ujong, mansa munggu madang pantu besarok kayu begembar tingong.

Mar amat iya nyeliah ka duri ridan enggau duri pantu, semadi kapuas iya nyelingkap baru iya rembus ba kampong puang, kampong nyelambang. Jelu ikan, burong nadai, lalat, nyamok pen nadai ga dia. Dinga tak bejako tinchin,  “Ngadang nuan apai aku Telajan. Dinga nuan nyin Antu Alar, Antu Lapar. Ukai mudah antu nya lagi apai. Enda chechamang iya nya. Sigi antu deka nelan orang.

Peda gamal antu nya, dilah kitau-kitau nipas-nipas tanah. Dia meh iya bejalai ngiga utai dempa. Tak meda Telajan meh antu nya lalu digagai iya. Tang Telajan enda rari ka iya, lalu disintak iya pedang tangga sabayan meda antu nya bangat mangah amat. Iya lalu nanam diri dia. Datai antu ada nangkap Telajan ngena dilah. Sakejap iya ensepi diri udah tama dalam perut antu. Tak ngentak ka diri meh Telajan, lalu randang iya perut antu sereta meletup nyadi periok api. Telajan pen lalu pansut terengkah di tanah, peda iya antu nya ada jelenga lalu rebah enda tepadah ka nyawa diri. Tak demeram aja lalu parai.

11. ANTU KOKLIR
Ditinggal ka Telajan mega bangkai Antu Alar, Antu Lapar nya lalu bejalai meh iya sahari-hari nya. Udah nya baru iya rembus di kampong selama. Dinga nyau richah nyawa burong nyawa jelu ngerara iya. Nya baru iya datai di tanah luchak lunyau, pendiau bala rusa. Emperan nadang jinggau, penepan kaban kera. Hari pen nyau ka malam. Iya lalu ngaga serundong langkau malai, lalu memalam dia. Baru udah makai lemai mega tudah tuai, alai iya ninga tak bejako tinchin salin selimbau : “Ngadang nuan apai, antu indu bisi di menoa tu, apai.” Dinga nyau gemisai utai datai ari ulu sungai, lalu ketawa sentai landai, “Ha hai ! Wai ! Ha Hai ! Wai ! Kok kok kok kok Lir”

Dinga bala antu nya ngenjing beterikok ngelingi langkau iya. “Ngumba udu antu deh, indai. Nadai menoa bangat ngemaioh tu antu,” ko Telajan. Lalu didup ka iya api, ditugong ka iya maioh amat sebelah nisi langkau. Makin antu nyau majak semak sasemak, damping sadamping. Peda iya antu betunda udi lapan iko ngelingi langkau. Peda iya gamal antu, “Pala nyau besagam gerusu, Ngeli bekejunggak Mulut bekechirak, Tusu lanjut bekachepak, Kukut tajam bekeramak. Baka kuku jugam.

Nyau geli ati Telajan meda bala antu indu. Nya baru ia tingat ka pengaroh beri aki iya antu Galau Gerawan. Lalu dulih ka iya, lalu dikirah pengaroh batu gamang, ada ditabor ka ngagai bala antu indu, sereta lalu bejako, ko iya “Ni kita indu gamang Indu kemundang Indu jagai, indu engkerawai Indu manyi, indu papit Saup aku tu ulih kita Muru kaban aku tu.”

Dinga ada begemong indu gamang, indu kemundang, indu engkerawai indu jagai datai malut samoa bala antu. Peda bala sida antu nyau betipas kiba betipas kanan sengat bala gamang. Bejako deh tuai antu “Rari kitai tu, rari ! Parai kitai tu parai ! Enda alah laban meh orang tu.”

Dinga kampong nyau bekebiseh laban munyi nyawa antu nya ke lari. Kelama nyau apas sapas ga munyi nyawa sida. Udah nya baru nadai agi dadinga iya. Nya baru Telajan masok tindok.

12. RAJA SUKA REMAUNG
awas hari udah makai udah samoa lalu mupok bejalai baru ga tudah Telajan. Nyau kelama, bulan nyau nandan di langit, taun nampun di bukit iya ke bejalai, lalu kira sabulan da ga udah meleka ari menoa antu Kok-lir nya baru iya datai di menoa Batu Nyagu Betangkal Tangga Lumut Bebalut Mesai Rusa Menoa Aji Berani tau tenong Raja Suka Remaung.

Lalu niki mega Telajan nengah gerugu batu chanai ke dedinggai baka penyambang rumah panjang. Tiki iya sahari hari nya, kira ngalih limpas baru iya datai di tuchong.. Iya ninjau ari nya, lalu tepeda ka rumah orang sabuah-buah, langkau dugau-dugau, sabatang sapintu lawang di baroh tingkah batu.

“Ka iya rumah antu, rumah jelu sigi aku tiki meh nya lagi,” ko ati iya din.

Lalu nurun meh iya kebaroh tingkah batu. Nya baru iya datai di jalai orang lalu nurun ga iya ari nya, nya baru datai di pendai orang. Iya pan lalu mandi berunsut daki bebuai miang. Udah mandi iya pan lalu begari, udah tembu begari lalu tangkin iya ga nyabur, lalu jengkau iya ga sangkoh, japai ga terabai. Nyau iya nguing ngagai panti landi enggi orang nya. Peda bejabong ka bok galong buah ngelagetang, tiang lalau dipeda iya bekaduga antu pala.

“Apu, berani meh orang tu,” ko ati iya din. Udah nya baru iya nanya ka penyadi rumah.

“Kati lalau badau kita tau diram, tau diremi ? Kati tangga laka kita tau ditunjan, tau ditiki ? Enti mali padah mali endor kaki bekenji pulai ka ai, enti jadi padah jadi ngambi kaki bekenji nunjan niki ?”

Tak angkat orang indu ada nyengau lalu meda Telajan dia “Jadi ! Jadi !Rumah pandak kami tu Enda kala dentak Rembak pagar api. Rumah panjai kami tu   Enda kala dentak Tambai penti pemali. Pala tangga enda kala Diperaka bangkai pemati. Apu ! Lalu anak aku Telajan Nempap bukit Tumpor nyadi emperan.”

Orang indu lalu beguai nganchau tikai, lalu ngambi sarang pinang, sarang insap, lalu danjong iya karusi. Datai Telajan di rumah lalu dengkah ka iya ma, lalu dikait ka iya nyabor, lalu engaran ka iya sangkoh, panggai ka iya ga terabai. Udah nya baru iya dudok. Seduai iya pan lalu berandau. Sereta indu nya lalu madah ka nama diri Endu Sebusol Luli Kapas Seketau Rambu Mas

Iya madah ka diri udah jadi enggau apai iya Keling leboh iya belelang mansa menoa nya suba. Angkat orang indu lalu nyau tama kebilik. Iya lalu berapi surong kaki surong jari, asap melap datai di para asi dirara, asap melap datai di sadau, asi pan mansau. Udah nya baru iya berenah makai. Sungkit iya asi lenggi-lenggi baka menyaung Bukit Setugak. Tuang iya lauk baka kerapa Nanga Tisak. Udah iya tembu berenah makai, iya lalu ngangau ka Telajan makai ; “Makai anak aku Telajan ! Makai Bujang makai !”

Tama kenu Telajan Lalu dudok makai, Makai asi sasuap Lauk sakerat. Nyau kenyang meh iya Besayang suyong. Lalu bebasu munyi Terutu kajang betuntong Tengkurop munyi ke ngusak Perudot gempong gerunong.

Iya pan lalu dasoh indai iya dudok di bilik dulu nganti iya tembu naroh samoa perengka pemakai. Udah indai iya tembu ngadu ka utai, iya lalu ngulih ka ia tuak. Peda ngenjing mili-ili penoh moa pasu besai, lalu ditantai ka iya, disua iya ka Telajan. Lalu dirup iya, dinga ada gurong-gurong ai tepong munyi wong numbok nerajang, ada berebigi ai asi mansa ngeli dabong rang.

Enda lama udah nya nyau abis mega ai tuak dirup iya. Iya pen lalu pansut karuai. Lalu dentudi ka indai iya Endu Sebusol Rambu Mas, Seketau Luli Kapas. Benong seduai iya berandau dinga tak negong mega penatai apai iya ; Aji Berani Tau Tenong, Raja Suka Remaung. Tekala nya indai iya ngasoh Telajan belalai dalam padong, takut ka iya dibunoh aka iya Aji, Berani Tau Tenong, Raja Suka Remaung. Enda lama udah nya sepi tak berenyut di kaki tangga. Dinga tak meluap nyawa iya ngangau “Apu Endu ! Lapa nuan ngurong anak mayau dalam pandong aku ? Asoh nurun iya Endu, wai. Aku mai iya bebuti tupai ka begagai turun tunsang.”

“Nadai orang ditu aka, nadai.”

“Aku enda alah salam ka nuan, Endu. Sigi bisi orang dilalai ka nuan dia. Bula nyaing meh iya nya muting geraji. Bula tajam nyemilu tisi.”

Tak angkat meh Telajan pansut ari pandong ada ditangkin iya belading unding simbing penulang, dajap tajam penyapan randang, jengkau sangkoh, japai terabai lalu nurun. Datai di tengah laman, tak enda chechamang jamah Raja Remaung, tak ada dipantap iya Telajan, dinga munyi ka mantap tekang besi, lalu bepantap surong jari, betumbok besurong titi. Bepantap bela enda ulih, betumbok bela enda telih. Lama seduai bepantap lalu enda tulih ka pangan. Pedis ati meh Telajan tak ada ditangkap iya Raja Remaung, lalu dipangka ka iya ngagai tekang batu galang, lalu digasak ka iya amat-amat penapat-napat.

Nama deh tudah Raja Remaung tak ngenjing enda terengkah di tanah kaki iya dibiau ka Telajan sebelah gerugu batu, lalu sampai ngagai tuchong bukit Batu Nyagu. Nyau kapuas seduai belaban nya baru Telajan nyintak pedang tangga sabayan iya. Lalu dilempai iya enggau pedang nya, peda ada nyenduan tebu da tuboh Raja Remaung enda putus jamah iya. Parai meh tudah tuai alah laban Telajan, lalu tekala nya menyadi indu iya nganjong pua kumbu kena map bangkai aka iya. Udah dibap lalu ditempap Telajan ba punjong buban aji iya, nya baru iya ngeleda lalu bejako, ko iya “Lapa kita ngerak aku tindok jenak ? Kapa kita ngenani ka aku tindok bemimpi ?”

“Oh, ukai tindok nuan aka. Udah parai nuan aka nyenggai lemai. Udah lesi meh nuan nyenggai hari. Nama nuan enda ingat ka diri alah uti laban anak tua Telajan nempap bukit, tumpor nyadi emperan, Tedong nyengkong mantok melit, iko bebelit dalam bulan.”

‘Apu, amat meh nya, Endu. Amat alah meh aku laban anak tua. Ni nuan anak, ni nuan asi,” ko iya. Angkat iya ari nya lalu diberap iya Telajan, lalu dibai iya niki ka rumah. Datai di rumah dambi ka iya tikai peradani, lalu dibap enggau tikai mas. Dia iya nudok ka Telajan. Nya baru seduai iya berandau tiga hari, tiga malam. Hari ke empat nya baru Raja Remaung magi pengaroh sereta lalu meri Telajan utai siti nyelai amat, penama utai nya Tungkat penedat, Tali pengikat. Gamal utai nya, tungkat mesai bulu landak, betali ka ubong mansau, ditanchang ba ujong iya. Utai nya ulih ia belelang diberi Bunsu Ribut, benama Endu Lulong Empong Kebiau, Kumang Jentang Kamarau.

Utai nya tau mit tau besai, tau pandak tau panjai, nemu jako tau dasoh kitai nanchang, masong orang, enti orang nya kebal enda ulih bunoh ngena besi. “Laban pejalai nuan bangat agi jauh, nya kabuah aku meri nuan utai tu, anak. Angka orang bisi tajam nyemilu tisi, bisi chendik lelayang laki.” Telajan lalu meri terima kasih ngagai apai iya Raja Remaung.

13. AKI RAJA NABAU
Udah chukop tujoh hari, tujoh malam, Telajan lalu madah ka diri deka meleka, deka bejalai baru ngagai indai seduai apai iya Bunsu Remaung. Lalu indai iya nengkira bekal iya, berau tujoh leka, garam pen tujoh leka mega, lalu samoa utai bukai tujoh turun magang. Udah tembu indai iya nengkira ka iya, Telajan lalu meri tabi enggau basa ngagai seduai. Iya pen lalu nurun bejalai baru. Angkat iya ari nya, bejalai-jalai meh iya siang hari bejalai, malam hari memalam ga iya. Nyau kelama udah nya baru iya datai di Danau Pulau Tapang Betanggi, Luba Lubang Hari.

Peda iya besai bendar danau nya. Tak rapas mata meda tanah seberai nyin pemanjai iya angka bisi lima batu. Lalu ditengah danau nya bisi pulau siti enda berapa besai iga, tang di puak pulau nya bisi pun tapang sakayu, lalu puchok tapang nya badas bendar gamal, enda nyalah gempong dan iya baka tanggi ke besai. Lalu ngetu mega Telajan. Benong iya ngetu dia, peda tak begumbang danau datai ari ulu. Peda tak ruya-ruya gamal utai datai ari ulu baka perigu pun tapang.

Ada enda chechamang tak lalu nuju ngagai endor Telajan ka dudok. Nyau damping sadamping meh utai nya, nya baru Telajan ngelala nya ular Nabau ke ngerarau langit, ular tedong ngelingkong bukit. Udu pemesai, udu pemanjai meh ular nya; rekong iya ngenjing jengau-jengau bisi sadepa begantong ari ai, pemesai rekong angka bisi lima pemerap, lalu pemanjai bisi lima puloh depa. Nyau semak meh ular nya, lalu matak rekong diri, deka nguji nganu Telajan. Tang iya lanchat sereta merejok lalu nepan ba pala Raja Nabau, ke betandok lima belas iti bepampang. Iya lalu bediri di selepak tandok lalu dipaut iya tandok. Disuyak ka iya ka kiba, disuyak ka kanan, dinga tak bekesetup tandok nabau nya patah laban iya. Tujoh iti patah lalu lapan iti bedau tinggal. 

Angkat meh nabau ari nya lalu naban ka Telajan kedalam ai, lalu ngempas ka diri ensepi tandok nyau abis patah. Ak ngila diri meh Raja Nabau lalu dikitau-kitau ka iya pala ngagai puchok tapang betanggi katas kin, udah nya rebah baru. Iya ke ngila diri nya deka muai Telajan ari pala iya. Nyau kapuas iya ke bediri ngerebah ka diri ensepi bangat enda alah buai ari pala, dinga ada bejako Raja Nabau. “Sapa meh nuan tu ? Orang dini, orang kati meh nuan nuan tu, bangat enda ulih buai aku ? Sapa apai, sapa indai nuan bangat begah-begah berani ngeruyak ka tandok aku ?”

“Nadai di tanya ka nuan meh aku tu. Aku tu Telajan nempap bukit tumpor nyadi emperan, apai aku Keling Gerasi Nading, Bujang Berani Kempang ; indai aku Inya kadua bali nama, besumbar Kumang. Kami tu orang di Panggau Ragai ke dedinggai bintis langgai kechuai nandang.” Ninga melinya, ada demeram Raja Nabau. “Apu, uchu aku rana-rana meh nuan tu deh. Kini ka pejalai nuan deh uchu ? Kini ka tunga menoa dituju nuan deh ambu ?” pia ko Raja Nabau.

“Oh, aki wai, jauh meh menoa deka digagai aku. Deka ngagai Penyuan Batu Bulan Penyuang Batu Bintang Baka papan lantak cheremin. Kilang-kilang baka tampang Ngena salin. “Amat jauh meh menoa nya deh uchu. Enti pia uchu, badas nuan nepan aba pala aku. Aku nganjong nuan ngagai Batang Tasik gilik gigi gumbang, perua Jawa Mampang.”

“Barang ia meh aki, enti nuan kasih ka aku,” pia ko Telajan. Angkat ada berunyut meh Raja Nabau baka sabut nyiur undang, ada bebatak baka sega rutan enseluang. Dinga rengong nyawa iya ngenjing gurong-gurong munyi wong numbok nerajang, ada bedidit ka langit ngagai gentilang baroh remang. Nya baru iya ngelantar lalu nyau. Sepi Telajan amat Lasit ari sumpit betibong punggang, Laju ari peluru leka petunang.

Lapan hari lapan malam baru seduai rembus di tasik besai din. Enti dipejalai bisi tiga taun baru datai ari menoa Raja Nabau. “Naka tu aku nganjong nuan uchu. Aku meri nuan pengaroh pengerak bala. Uji ulih ka nuan tandok aku uchu, ke tengah ujong iya, bai nuan meh nya. Nya meh pengaroh beri aku ka nuan uchu, dipelaba aku nadai nyamai menoa diserang nuan ila. Tang enti bangat suntok tau ga nuan ngangau ka aku, uchu. Angka rikat rayat aku bisi enggau nuan betemu, anang enda madah ka diri uchu aku meh Telajan ngagai sida.” Udah Aki Raja Nabau ngajar iya, dia Telajan lalu madah ka diri mupok ngagai aki iya. Raja Nabau pen nyau ga pulai.


14. AKI BUI NASI
Nya bary iya ninjau menoa tasik. Udah nya lalu dikerebak ka iya temilah lalu dulih ka ia bungkan sarang ruding beri indai iya Serian Tampun Bubu, Mini Bental Batu. Lalu ditempap iya kemaia nya lalu nyadi kapal lambong ka numbas pemesai tau bejalai nengah tasik. Udah nya baru iya nepan di kapal lambong. Iya lalu belayar nengah tasik. Kira sabulan iya udah belayar, nya baru iya ninjau Batang Tasik lalu tepeda ka Antu Bui Nasi, sigi antu nguan batang tasik gilik gigi gumbang, perua Jawa Mampang.

Dinga tinchin iya lalu bejako. “Parai tua apai ditibar antu nyin enggau jala besi iya lagi.”

Peda Telajan antu ngenjing tirau-tirau bejalai di puak tasik mengkang nibar ka jala sebelah puak ai. Ai tasik abis dalam ditujah iya naka ari atas pala patong. Peda jala iya bulih ikan lalu dempa iya mata, bulih baya, ular dempa mata samoa. Samoa utai idup di tasik empa iya mata magang-magang. Nyau semak kasemak mega kapal Telajan. Iya pen nyau semak ada ditibar iya, sepi kapal ada tungkup laban jala besi antu. Meda bakanya angkat Telajan lalu ngerandang jala nya enggau nyabur tangga sabayan iya. Peda ada teberunsai jala abis charik dirandang Telajan.

Pedis ati deh antu lalu ditangkap iya kapal, pangka iya ke pantai ; mengkechit deh Telajan lalu terengkah di tandan bau antu, ada dipantap iya rekong antu. Dinga nyau setik-setik munyi ka mantap batu. Merejok baru ga Telajan ngagai puchong pala, lalu ditutok iya bubun aji enggau sangkoh, enda ga masok. Ensepi bakanya lalu ditangkap antu nya ga iya, lalu ditelan. Tak ngentak ka diri deh Telajan lalu bebali nyadi tekang api. Ensepi angat lalu dilua ka antu nya baru, lalu digenggam iya ga Telajan. Ensepi angat lalu dileka ka iya baru. Nya baru iya nanya. “Sapa nuan tu ? Nadai orang udah mansa menoa aku ditu asai nuan tu.”

“Nadai ditanya ka nuan meh aku tu Telajan nempap bukit, tumpor anchor nyadi emperan Aki aku Genuling Tandok Gading, Lelayas Simpai Mas Antu Selambing Pending, Tandok Kijang Berundas. Aki aku siko Antu Separu Anya
Aki Satunggal Ngeli sigi saleka-leka.”

“Apu, uchu aku meh nuan tu. Enda ngutok manok parai kena bebiau, dini alah laban uchu aku empu,” ko Antu Bui Nasi. Lalu diberap iya pulai ka rumah iya empu di tebing tasik ninding pandang perenching matahari mati. Jari iya sapiak merap uchu, jari sapiak minching kapal. Datai di pendai, kapal nya lalu ditanchang ka iya dia. Udah nya iya lalu niki mai Telajan. Datai di rumah lalu ngangau ka bini iya.

“Ni dek indai tuai ? Tu uchu tua datai. Berapi meh dek dia, angka iya nyau lapar.” Pansut ini iya bini Antu Bui Nasi, lalu gaga merap iya. Udah nya ini iya nyau berapi. Enda lama udah nya nyau berenah makai. Udah makai, aki nanya ka pejalai iya. Udah Telajan madah ka pejalai diri nya baru aki iya bejako baru. “Jauh meh samoa menoa ka deka digagai nuan nya uchu. Enti pia anang enda meh nuan mai duku aku siti. Nama iya Chechangok penatok burong duan, Penebok rusok pengunting lintan.

Lalu disua ka aki iya ngagai Telajan. Dua malam iya diau ba rumah Aki Antu Bui Nasi madi aki iya Genuling apai Keling, siko madi aki Antu Separu Anya. Nyau katiga hari udah nya iya madah ka diri deka mupok.

“Nadai ko enggau meh uchu enti nuan deka mupok. Tang ti bisi penusah aku tau dikangau ka nuan. Tu siti tinchin tali-kangau aku bai uchu. Enda mudah tinchin aku tu. Dini menoa dikangau ka nuan, enti iya dirasok ka nuan, mesti ninga magang-magang.”

“Au, badas bendar meh nya aki, dibai aku. Enti utai nadai agi diberi nuan ka aku, mupok meh aku tu aki.” “Pikir aku umbas meh nya uchu.” Telajan pen lalu nurun ka pendai, dibuka iya kapal lambong lalu bekejang.


15. AYA KEBEMBANG HARI
Bejalai kapal lambong Telajan nya tadi sahari-hari, samalam-malam. Sapuloh hari baru iya datai di nanga ai Bemban penyulan hari Bemban penyuli lemai
Munyi ka ngua akan, pagi Munyi ka ngua adi Nya nengeri Bujang Kebembang Hari Seduai Aya Tuan Gelagam Bulan

Udah tembu iya nanchang ka kapal, nya baru iya mandi muai daki dakah begelemang. Udah tembu mandi iya pan lalu begari sereta bepasok ngepan Peda pengering badas memaging. Ari saging pengililing kampong puang. Sigat ari antu jukal berundang petang Babas ngenjing betekijap
Dipandang gamal Telajan.

Udah tembu nganta tembu samoa, nya baru iya niki jalai pendai nengah jematan besi. Datai di kaki tangga iya lalu nanya ka penyadi rumah.

“Kati jadi rumahh nuan Aya Bujang Kebembang Hari ?” pia ko Telajan.

Ninga jako orang tak beranaing nanya ka penyadi rumah, tekenyit deh Aya Kebembang Hari, lalu pansut ka tanju. Sereta tepeda ka Telajan tak ada surut tudah tuai, datai di baroh baru iya madah ka rumah jadi.

“Niki meh igat niki. Jadi rumah aku, nadai pemali.” Sereta iya nyaut, lalu nganchau tikai, dibaroh tikai ditanam ka iya tukak lungga, sangkoh, geraji meh nya dia, maioh amat. Udah tembu iya nanam tukak, Telajan pan lalu niki. Dia deh rumah sida Kebembang Hari panjai lima ratus pintu ada kayak-kayak asai ka puput ka rebut kudi.

Ambin digantong abis beketepak
Laban anak temuai mai
Batu pengerah tanchang
Orang ke ngandong abis beranak
Laban anak temuai mai
Batu pemuya lubang.
Orang ke buta nyau menchelak
Laban anak temuai mai
Batu perechi pinyang
Orang ke kait bejalai bekajengkak
Laban anak temuai mai
Batu tegar ngeledandang.

“Apu, pama orang tu,” ko sida sarumah, “nadai temuai kala asai tujah mensia tu.” Datai di rumah, “Lalu igat,” ko aya Kebembang Hari. “Au aya,” ko saut Telajan.

Datai di ruai lalu dasoh Aya Kebembang Hari dudok di tikai ke udah dagih ka penudok iya. Lalu dudok mega tudah Telajan dia, dinga utai tak betekerup patah di baroh tikai.

“Oh, nama utai ke patah di baroh tikai tu aya ?” ko Telajan. “Amat nya tadi igat, utai laban anembiak ke gila begaga ka lungga. Aku beguai nganchau tikai ka nuan, nya alai nya bedau dia, bebadi enti nuan telih laban nya deh igat,” ko Aya Kebembang Hari. “Baik meh ga aya, ulih kitai sigi enda jai ati.”

Lalu dangkat ka Aya Kebembang Hari tikai peda samoa utai dia abis patah magang, samoa ke kena pam burit Telajan ke dudok. “Apu, pama meh temuai tu,” ko ati iya din. Tekala nya iya lalu beguai tama ka bilik, lalu ngambi kerusi temaga. Dia iya ngasoh temuai nya dudok. Angkat Telajan lalu dudok mega ba kerusi nya. Apin angat burit, dinga orang nyau ngangau ngumbai makai.

“O, makai tua igat,” ko Aya Kebembang Hari. Baru ka nukang ka pintu tudah tuai, angkat Telajan pen nyau udah dedunga dudok di bilik. “Ni dek igat ?” Nyau ginau-ginau meh iya merening.

“Tu aku aya udah di bilik tu,” ko Telajan. “Apu, ni jalai dek tadi anak ?” “Nengah pintu nya meh aku aya.”

Telajan lalu merening, tepeda ka orang indu penama Dara Luching Menoa, anak tuai Aya Kebembang Hari. Bajik ga gamal orang indu nya. Orang indu bukai ari bilik sapiak-sapiak udu pemaioh deka ngila ka iya makai, nyau burak mata sida merening Telajan. Enda lama udah nya nyau kenyang meh ga iya sayang suyong, lalu bebasu munyi terutu ujan ngerunong, tengkurop munyi ngusak perudot gerunong siong.

Udah tembu makai, nyau mega iya pansut ka ruai. Datai di ruai lalu berandau enggau orang sarumah nya. “O, ari ni penatai nuan unggal, nama pejalai nuan, ukai ga nuan mali nemuai, tang nyangka bisi kabuah berat ?”

“Nama penyalah kita nanya deh unggal. Aku tu datai ari ;

“Senganjar Langgar Matahari Tumboh, Serentum Embawang Laboh. Pejalai aku tu unggal, pejalai Bujang meh tu.” “Au,” ko orang maioh, orang banyak. “Badas bendar meh pejalai dek nya ungal.”

Orang pen nyau randau bukai mega, nanya ka rita ba iya. Nyau berandau meh sida sahari-hari nya. Enda lama udah nya hari pan nyau malam. Berandau mega sida samalam-malam lalu sahari-hari siti ; tiga hari, tiga malam bedau ga Aya Kebembang Hari apin deka tindok, lalu dikusok Telajan daun selida-lida ngasoh jampat lela, daun selidok-lidok ngasoh jampat tindok. Peda tak nyau ngantok Aya Kebembang Hari.

“Oh, tindok meh tua igat. Enti deka ngayap, ngayap mega anak. Ukai nadai orang indu, anak aku bisi dara, igat. Tang iya enda di baroh tu, datas din di meligai kirai. Ukai nya kala nurun anak aku nya sakumbang iya udah dara tu.”

“Sapa penama anak nuan nya deh aya ?” pia ko Telajan.

“Enda Pupu Gumbang Menyadi, Dayang Tekang Mau Tuchi. Nya meh nama iya igat,” ko Aya Kebembang Hari. “Enti nuan enda ngayap, nuan tau tindok di padong anak aku Sandar Nitar Begemong, Bujang Mali Rampung. Tang iya nadai dia, nyau belelang, angka bisi lima belas taun tu udah.”

“Pia meh aya, enti enda ngayap lagi.” Pia ko Telajan.

Angkat Aya Kebembang Hari lalu tama tindok kebilik. Orang nyau abis tindok, angkat Telajan lalu pansut ketanju ninjau meligai orang indu. Peda tinggi amat, angka bisi lima puloh depa peninggi. Udah nya Telajan lalu nganta sereta besugu lalu beminyak mega. Lalu dunsut iya ;
Minyak minyai
Nyelepai bau saminggu
Minyak angin gelugin gila
Chap-chu bansa saribu.
Lalu dulih ka iya jayau minyak ajing
Penama ajing ngumbai, ajing nyaut
Semina dibuka ditudong aja
Udah nya lalu ditaroh baru.

Udah Telajan tembu nganta tembu samoa, iya pen lalu mengkechit ari tanju katas lalu terengkah di tanju meligai, iya pen lalu tama. Datai di penindok orang indu. Orang indu sigi udah nyau tindok. Peda Telajan manah amat gamal orang indu, pua tiga serak agi terus laban senaya tuboh iya. Udah ia tama panggau gantong penindok orang indu lalu ditegu iya di tandan bau nukang, lalu di gerak iya ;

“Dani unggal dani
Ukai aku ngasoh nuan berapi
Dudok unggal dudok
Ukai aku ngasoh nuan nyauk.
Berandau meh tua unggal.”

Tak ada ngeliat orang indu lalu bejako ;

“Sapa kala ngerayap dada
Dini nyelipan ngerayap lengan
Dini nyembayar niti panggal
Kukut ngerantam enggi nuan asai lungga
Bulu nyeregu enggi nuan asai laja
Nyawa ngaba bau sima
Betis ngelanggar asai belia.”

“Kami tengkelai meh tu unggal
Simpai rangki
Kami temuai meh tu wai
Datai tadi.”

Ninga munyi nya orang indu pen lalu angkat, lalu ditempap iya lampu kilat, peda lalu mijar ngijap tampak amat. Ada tedandang ati orang indu meda gamal Telajan. “Apu, Orang dini meh iya tu. Empai kala aku tekenyit meda orang lelaki,” ko ati indu nya din.

“O, ari ni penatai nuan wai menyadi
Dini ai endor nuan mandi
Mesai belungkin burit jalong ?
Dini tanah endor nuan berumah
Mesai tempukok belakang raung ?
Asai ka salah mega dinga nuan
Laban ke enda ngelala.

“Nadai penyalah nuan nanya deh unggal. Nya alai aku tu datai ari menoa kami di :

Perentong Tinggang Embawang Ngeledi
Senganjar Langgar Matahari Mati.”

“Kamaia nuan datai di menoa tu deh wai menyadi ?” ko orang indu. “Angka bisi tujoh malam aku udah datai ba rumah kita ditu, tang mai aku empai ngayap laban agi dibai apai nuan berandau. Diatu semadi sida nyau abis tindok nya kabuah aku nyau ulih datai aba nuan.”

Angkat orang indu ari penindok lalu ngambi tikai peradani, lalu kembai ka iya. Ambi iya ga panggal sulam benang ujan, lalu ditap ka iya dia, peda tak baka ke basah empa pemanah. Iya lalu ngasoh Telajan dudok dia. Peda datai mega sarang pinang sarang insap. Orang indu pen lalu dudok ga nunga Telajan. Empai lama udah nya, alai orang indu bejako enggau iya.

“Ditu dulu nuan wai menyadi. Aku deka meda tedai ai utai. Kada nya agi bisi, kini. Enti agi nasit nuan.”

Angkat orang indu lalu ngulih ka kendi aji ngenchekok tandok, sabalang undang betumbok tujoh lubok. Lalu dibai iya ngagai pelaboh meligai. Datai iya din, peda rumbang ai tuak bedau mili-ili tujoh igi tajau. Ada dibuka iya tandok, peda lalu guchor-guchor tama kendi. Enda lama alai kendi nya lalu penoh, lalu dambi iya jarum tiga guni, dibuai iya kia. Udah nya lalu dulih ka iya pengaroh munoh penungkam gayong dalam, ambar mati meh nya dia ga, belah bengang, rachun pen bisi magang, nadai enda utai dichampor iya dia. Orang indu pan lalu besampi ga dia ;

“Enti iya orang lelaki ngapa
Orang lelaki aja
Parai meh iya lagi
Ngelanggah lemai
Danjan nyelanggai bulan
Tumbang nengali bintang
Mati nengali hari
Enti iya amat nyaing
Muting geraji
Chendik lelayang lelaki
Enda meh iya parai
Laban tu lagi.”

“Aih deh unggal wai
Tu ai chiru madu aku
Irup ulih nuan
Ulih aku mantis
Di ulu tasik ngelegua
Ai engkelanyau lichau
Ulih aku mulah di
Begiau tajau menaga.”

Lalu dirup Telajan, dinga ada gurong-gurong ai tepong munyi wong numbok nerajang. Ada berebigi ai asi mansa ngeli dabong rang. Ia meh ai tuak nyau ka abis lalu disungkak ka iya, peda lengan orang indu datai di pun berang kena telan iya. Kendi orang indu pen nyau telechut pegai iya, lalu nyau mega tama kena telan Telajan.

“Apu, rugi besai meh nuan unggal wai, kendi nuan nyau ditelan aku.” “Kapa enda ditelan nuan deh unggal. Ukai nya baka ke sigi nya deh kendi kami. Enti nuan deka empu iya tau meh lalu empu nuan unggal wai.”

Malu mimit deh Telajan ninga jako nya, lalu dichabut iya kendi ari kaki lalu disua ka iya ngagai orang indu. Udah nya tak ngenong mega orang indu nyambut kendi, meda kendi bangat nyau liau-liau baka mau ke baru dibeli. Udah iya nyambut lalu ditaroh iya dalam peti. Udah nya iya lalu dudok ngimbai Telajan lalu bejako ;

“Aih deh wai
Amat sawa meh nuan liba
Indu sawa
Nerumbu di pun kayu kempas
Amat lang meh nuan unggal
Menaul banda
Penangkap manok bangkas
Kati sapa penama nuan unggal ?”

“Aku enggai ditunsang
Ka nuan unggal wai
Nunda ketupang bunga lenga
Enggai meh aku dikalih
Ka nuan unggal wai
Nunda ribis tali ma
Sapa dulu nanya nama
Nya meh dulu madah.” Ko Telajan.

“Malu amat meh aku
Madah ka nuan wai
Laban aku nemu gamal
Diri enda manah
Lalu nama pen ngipak
Ka gamal mega, wai.
Nyadi penama aku tu :
Endu Pupu Kebul Bebuli
Dayang Takang Mau Tuchi,” ko orang indu.

“Nyadi penama aku ko sida apai ;
Telajan nempap bukit
Tumpor nyadi emperan
Tedong nyengkong mantok melit
Iko bebelit dalam bulan,” ko Telajan.

“Amat ngipak ka gamal mega
Nama nuan wai menyadi
Manah nama manah ga gamal
Kitai ke empu iya,” ko orang indu.

Udah nya seduai iya nyau randau bukai. Orang indu nyau mega tama kibong, sambong panggau gantong katil temaga. Udah nya seduai pen sama mega tama lalu berandau baru ga dia. Telajan lalu nanya orang indu ;

“Anak empelasi tikau ka ai
Anak enseluai tikau ka pantai
Enti nuan deka, ngambi aku gali
Ent nuan enggai tau dasoh pulai
Malam nyau udah panjai.”

“Aih deh, deka aku mai nuan gali
Enggai ka dikumbai nuan lama nganti
Deka aku ngasoh nuan pulai
Enggai ka dikumbai nuan bangat enggai
Pikir nuan aja meh unggal
Enti nuan deka gali, tindok meh unggal
Enti nuan enggai
Pulai meh dek wai.”

Angkat iya ninga jako orang indu munyi nya, ada angkat deka pulai. Lalu ditangkap orang indu ba bok lalu ditengkulas ka iya, lalu dempas ngagai tilam.

“Pia enggau orang lelaki
Bansa nuan tu unggal
Tak jerua dek pungga ai besai
Tak jejegak meh nuan unggal
Baka empasa ujak nanga Belawai
Pagi dujak, lemai bebungai.” Ko orang indu.

Nyau enda memunyi mega Telajan lalu tindok meh seduai iya dia. Tindok kemunok ini, betunjor-jor, neladan sintau kamarau hari. Daun kelapan daun pingan, siti belayar ka nanga Tebas, lapan belas kenyap hari pan nyau tawas. Seduai iya pen nyau sama bela dani, lalu bejako Telajan enggau orang indu ;

“Aku tu lagi bekejang meh ari menoa kita tu unggal ambai wai, laban pejalai aku tu agi jauh. Enti aku pulai Ila, aku ngetu ditu baru. Enti nuan deka baru aku mai nuan pulai.” Ko Telajan.

“Bula nuan nya Telajan. Dini nuan deka mai kami ke jai. Ka enda mai nuan gali, bai ati jai ga. Ukai aku enda nemu nuan mina bejalai mansa aja. Itah ka sangkut kaki nuan bejalai, pama meh unggal, mimpi biau nuan deka jadi enggau kami.” Ko orang indu.

Lalu diperurot ka Telajan tinchin penelinak ati, disua iya ka orang indu, ngambi orang indu enda betati ka iya agi, enggai ka anak orang gila ngapa laban iya.

Udah nya baru iya nurun ari meligai, datai iya di baroh meda Aya Kebembang Hari endang udah nyangah dudok di ruai.

“O, baru datai dek igat, baik ti deka ngayap tadi igat. Ukai nya mali ngayap deh anak.” Ko Aya Kebembang Hari. “Eh, ngayap ngapa meh aya. Nyau laun mansang, mata nyau kelanjor tindok, agi buntau bekau berandau ngelamatu.” Ko Telajan.

Orang indu pen nurun nitih ka iya kabaroh, lalu ngenah ka iya makai. Datai di bilik tekenyit mega indai meda iya datai. Lalu gaga sida sabilik meda iya, laban sakumbang ke udah diau datas din lalu empai kala nurun. Udah nya orang indu lalu mela pemakai. Udah tembu iya mela makai, baru iya ngangau ngumbai makai.

“Makai kitai apai. Bai makai anak temuai ba ruai kitai nya,” ko orang indu. “Au, Endu. Makai tua igat. Udah ngumbai makai orang indu di bilik.”

Telajan pen lalu tama makai, dia mata orang indu sigi lintu-lintu merening iya makai. Tembu makai nyau mega iya pansut keruai. Datai di ruai nyau nginsap indah ga iya. Udah nya iya madah ka diri nupok bejalai baru.

“Nadai ko enggau meh igat. Ti nuan nyau enggai lama agi ditu. Tang ti nuan pulai jemah ila igat, anang enda ngetu ba aku, enggai ka kami enda nemu nuan pulai,” ko Aya Kebembang Hari. “Pia meh aya,” ko Telajan.

Iya pen lalu nengkira diri mupok. Pengudah iya madah ka diri mupok ngagai sida Aya Kebembang Hari, iya lalu nyau angkat ari rumah sida nya.

15. MANGGI TITI BEGILIK
Kapal iya sigi udah meruan rentang-rentang di pendai. Datai iya dia buka iya tali lalu bekejang. Peda perecha orang indu sigi burak ngepai iya ari rumah.

Lalu nyau ngenchunong meh pejalai kapal iya baka burong angkat terebai. Bejalai meh kapal iya besahari-sahari, bemalam-malam, kira sabulan iya udah ngelengka ka menoa nya, nya baru iya datai di menoa Manggi Titi Begilik, Bujang Setimba Tasik. Nya orang mangkang pasir matong baka tepong kayak dindang. Pasir lada baka perampa umai nawang. Peda iya besai amat nengeri orang nya. Telajan enda ngetu dia laban iya beguai ngerumban menoa ke deka digagai iya. Iya mina nginsor pejalai kapal iya lubah mimit, lalu bejalai begadai-gadai meh kapal iya mansa pendai orang nya, laban mensia bangat maioh ngila ka iya ari jelatong. 

Samoa orang sakayu nengeri nya begau magang ninga penatai iya. Menoa asai ka beguyat, tanah asai ka terangkat kena tujah kapal iya. Keba samoa indu meligai nurun magang, laban sida udah nerupong sereta bisi meda orang lelaki bangat sigat amat dalam kapal nya. Gamal kapal nya perenching kena pandang orang lelaki ke nepan dia. Sereta kapal iya mansa pendai peda perecha orang indu ukai anchi pemaioh ngepai iya ari jelatong. Dia orang indu bisi mukol tali kangau ngasoh iya ngetu, tang iya madah ka diri beguai enda ngetu, laban deka ngerumban datai di menoa Tasik Putus.

“Enggai ka orang dituju aku din nyau pulai lagi. Nya alai nganti aku pulai ila baru ngetu ba kita ditu,” ko iya. “Nadai ko enggau meh, enti nuan enda ngetu. Tang enti nuan pulai ila anang enda ngetu memalam ba kami ditu. Busong meh nuan bula ka kami ila unggal, busong enda datai ba menoa diri empu,” ko orang indu. “Barang iya meh wai, enti aku bula ila,” ko saut Telajan.

16. AKI BUNTAL
Lalu nyau meh kapal iya bejalai baru ngejang ka pengkalan orang nya. Bejalai kenu iya dia besahari-sahari bemalam-malam. Nyau kapuas iya, nya baru datai di Tasik Alit sempal Buntal, sungai mit udu pengeluar. Peda iya utai baka pulau ngalit ka tasik. Dinga ada bejako tinchin jamin menoa, mata jegura.

“Apu, apai, besai amat meh buntal nyin nyau ngalit ka ai tasik. Tusah meh tua nengah nya lagi. Tentu kapal tua ditelan iya,” “Enda iboh endu wai, lagi buntal nya ensepi asai diri enggai enda ngumba iya bangat ngempang ai tasik.”

Datai kapal Telajan dia, enda chechamang mega Buntal ada nelan kapal iya. Ada dinjun Telajan kapal lalu bebali nyadi periok api, lalu meletup munyi deru guntor memunyi, dinga begangga munyi pangka gumbang menyadi. Lalu pansut mega kapal Telajan, peda buntal nyau ngila diri mengkasak parai ngili ai tasik kili kin.

17. BUKIT MAS
Telajan lalu angkat ngejang ka menoa Aki Buntal. Tiga bulan lapan hari nya baru iya datai di penyangkai Tasik Putus. Datai iya dia meda menoa nyau nadai jalai kapal mansa agi. Lalu sangkai mega iya aba Batu Mingkai, enda nyalah baka penyangkai di Ulu Tasik. Kapal iya lalu dikusok iya nyau nyadi bungkan baru lalu disimpan dalam temilah. Udah nya baru iya bejalai besahari-sahari bemalam-malam. Lapan hari tujoh malam baru iya datai di bukit sigi badas amat gamal. Samoa tanah enggau kayu ke tumboh dia kuning magang baka mas. Datai iya di tuchong dia iya lalu ngetu belelak, sereta lalu dudok bayam babas ke tumboh dia. Lalu ko pikir ati iya din, “tentu tu bukit mas, ko orang. Dipelaba aku angka enda jauh da endor pendiau Aki Raja Kekura seduai Aki Raja Pelandok, tu nyau udah datai ba bukit mas.”

18. RAJA PELANDOK SEDUAI RAJA KEKURA
Udahy nya bejalai baru ga iya ngejang ka bukit mas, lalu enda bangat jauh iga ari nya dinga iya utai tak rengkong-rengkong munyi ka malu tubai. Nyau semak kenu Telajan, peda iya tudah Aki Raja Pelandok malu bandir. Lalu ditanya iya, “Nama gaga nuan dia deh Aki tak rengkong-rengkong ?” ko iya.

Malik Raja Pelandok lalu meda iya. “Apu uchu aku Telajan rana meh tu deh. Orang Panggau Libau meh tu deh,” ko Raja Pelandok. “Eh uchu, aku tu ga ngangau ka aki dek Raja Kekura lalu empai datai pemulai kami dua ke ngereja lemai kamari. Angka nyau tesat, nya kabuah aku malu bandir tu ngambi iya ninga.”

“Enda Aki Kekura tesat deh aki, tang angka iya bisi utai temu ngasoh iya bemalam. Aram tua pulai ka langkau. Bisi iya pulai lagi enti tua udah datai di langkau,” ko Telajan. “Enti pia uchu, pulai meh tua tu. Enda iboh, nadai utai munoh Geru aku nya,” pia ko Pelandok.

Udah nya pulai meh seduai ia niki bukit, ngili ai, nya baru datai di langkau di Nanga Sungai Langit Ngelekup. Peda langkau seduai mua pemanah baka rumah limas, laban Aki Pelandok seduai Aki Kekura tu sama sigi orang tau ajih. Samoa utai nyadi magang enti seduai ngajih ka iya. Nyau niki ka langkau ga seduai, lalu sama kisok ga Aki Pelandok nganchau tikai alai uchu iya Telajan dudok. Hari pan nyau malam ga lalu dulih ka iya lampu tekang gemala mesai pala lalu dengkah ka iya ba tengah bilik enggau tengah ruai.

Empai lama udah nya peda datai Aki Kekura lalu segetok niki tangga. “Apu, dek nya Aki Kekura,” ko Telajan. “Aku meh tu uchu.” Ko iya.

Angkat Telajan lalu beguai ngambat iya. “Nama main nuan nadai datai deh aki ?” Nyau kesal ati ngumbai nuan parai.”

“Ukai nya mudah parai ngapa kitai orang Panggau tu deh uchu, tang aku nyau laun meda kebun riang aku abis ditaban ka kayu tumbang laban ribut lemai kamari. Nya meh kabuah aku datai nyau malam.” Ko Aki Kekura.

“Baik meh nya aki enti pia, tang angka nuan laban utai bukai, nya ngasoh ati tak irau bendar ka nuan,” ko Telajan. Udah nya sida nyau makai ga. Tama Aki Kekura ka bilik. “Makai dek uchu,” ko iya nganu Telajan.

Tama Telajan ka bilik peda asi lauk udah sedia samoa, end nyalah baka bela indu meligai. Utai nya sigi dajih ka seduai iya magang. Telajan pan lalu makai ga. Aki iya dua iko nya sama makai ba telok. Siko makai daun riang, lalu siko makai bunga buan. Udah kenyang sida tiga lalu sama pansut keruai, Sida lalu berandau, nanya ka nama pejalai iya. Telajan madah ka diri deka ngambi indu di langit lapan belas serak, lalu deka ngambi indu siko di pemuntol langit datas din. Iya nya orang di :

Sapak batu pirak
Sarang kutak ubat padi
Sapas batu mas
Baka paras pasu bebeli

“Apu, amat jauh menoa nya uchu,” ko seduai. “Nambah ka nya orang di menoa nyin bisi ;

Nyaing muting geraji
Mang ari kepayang
Rendam sapagi
Munoh ari ipoh
Sapengujong jenggi.”

“Nuan uchu anang enda jimat. Enti nuan enda mansa kami dua aki nuan ditu, nuan tusah datai di menoa nya uchu,” ko seduai. “Aku pia meh aki. Keba aku nuju nepat seduai, sigi aku minta kekira ari seduai,” ko Telajan.

“Enti pia uchu, nuan enda tau enda diau sabulan enggau kami dua ditu dulu. Laban kami dua deka ngasoh nuan mensiang kebun kami dua aki nuan dulu. Pengudah nya baru kami dua ngira pejalai nuan.” “Enti pia ko seduai barang ia meh,” ko Telajan.

Hari siti Aki Kekura enggau Aki Pelandok mai iya ngabas kebun seduai. Peda kebun madang buan enggau madang riang, ukai main pemaioh, nyau rapas mata emperan kebun seduai.

“Tu uchu, tebas magang, uchu. Tebas abis tebas lengis. Enti enda tentu tebas nuan ila uchu, enggai kami dua ngaji nuan,” ko seduai. “Pulai seduai aki, lagi aku nebas iya. Anang seduai tusah. Enda aku kala ngayah ka orang,” ko Telajan.

Sereta udah seduai ngelebus pulai, dia Telajan lalu bejako enggau duku seduai kapak ; “Seduai duku enggau kapak, anang bebula. Tebang abis tebang lengis ka samoa madang buan enggau madang riang Aki Kekura enggau Aki Pelandok tu,” Pia meh,” ko seduai.

Lalu dileka ka iya kapak enggau duku, peda tak lalu nebang sanebang, nebas sanebas. Enda lama iga peda datai seduai baru, lalu madah ka kebun udah tembu tebas.

Telajan lalu mulai ka diri ka rumah. “Apu, udah abis uchu ? Jampat bendar nuan nebas,” ko Kekura nanya iya. “Enti pia aram tua ngabas Geru,” ko Kekura nganu Pelandok. “Aram meh meda ka pengelengis tebas uchu tua,” ko Pelandok.

Datai din, lalu tinjau seduai peda tak sedandang menoa sebelah nya dia, enda nyalah baka dandang umai. “Apu Geru !” ko Pelandok, Parai tua tu deh. Enda makai meh tua tu deh. Tu meh taun tua mati lapar. Abis Geru, abis kebun tua ditebas uchu, nyau nadai digalau iya sakali-kali utai ditanam tua.”

Datai Kekura dia, lalu sama bepurus dada meh seduai meda samoa kebun abis lengis ditebas Telajan.

“Parai meh tua dikeduan uchu :
Busong uchu nya ila
Enti ngayau bulih pemerani
Enti bumai bulih padi
Enti ngayap bulih bini.”

Tinggal seduai ngabas kebun sahari nya Telajan lalu muka peti seduai, lalu naban ka duku emperaja nyengkong enggau sumpit kilat menoa. Datai seduai di rumah meda Telajan udah nyau, lalu tama ka bilik meda peti udah dibuka orang, meda duku emperaja nyengkong enggau sumpit kilat menoa nadai agi dia.

“Amat parai meh tua laban uchu tua tu. Kebun udah ga abis ditebas iya. Tu duku enggau sumpit tua udah ga ditaban ka iya.”

Dinga nyau bekedui seduai nyabak menati ka pemerinsa diri. Enda lama udah nya seduai pen tindok mega, makai pen enda ga seduai nadai utai dempa agi. Hari siti lalu nurun baru ga seduai ngabas kebun, angka agi bisi ke enda kena tebas Telajan. Datai seduai din, dinga ada kekalau panjong Pelandok gaga meda kebun seduai nyau idup baru.

“Enda mudah parai tua Geru ! Nyau idup baru kebun tua,” pia ko kangau iya, ngangau ka Kekura. Datai Kekura dia, nyau sama gaga seduai meda kebun diri udah galak ari selama. Mimit pan nadai meh babas bukai nyelat kebun seduai. Buan nyau abis tingkar puchok laban buah ; bukit nadai dipeda tanah laban daun riang Aki Kekura.

“Amat pandai meh uchu tua nebas. Kapa duku enggau sumpit tua enda dibai iya neh Geru. Sapa ke nganjong enti enda uchu diri empu,” ko seduai bejako nganu pangan diri. Udah nya nyau mega seduai pulai ka rumah enggau ati andal.

19. BUNSU RIBUT
Angkat Telajan ngejang ka menoa Raja Pelandok seduai Raja Kekura nya tadi lalu bejalai sahari-hari nya nyau lemai baru iya datai di Bukit Bumbong Menoa. Datai iya dituchong bukit lalu dibantai ka iya sumpit kilat menoa. Ada ditempap iya tekala nya nyadi ;

Daun Limba Limbi, tau terebai ka diri, Daun Limba Limbun, tau nurun tau niki.

Telajan lalu nepan dia, dinga tak ada bedigah kedalam tanah ngilah sabayan, bedidit ngilah langit ngilah bulan. Udah nya iya lalu angkat terebai. Dinga nyawa iya nyaris munyi singa terebai, lang nyanggai. Singa ngabong lang ngentuchong, didinga ari kebong gam langit.

Laju ari peluru leka petunang, Lasit ari sumpit betibong punggang.

Terebai kenu iya dia besahari-sahari bemalam-malam katas kin. Tujoh hari tujoh malam nya baru iya nerupong katas lalu tepeda ka meligai orang indu kitang-kitang di tengan menoa. Nyau perenching gamal meligai nya kena pandang matahari.

“Lagi aku nguji indu nya. Nemu iya ngelala aku, nemu iya enda kini. Enti iya ngelala lagi tau meh iya ambi ka bini,” ko ati Telajan. Dinga tinchin iya lalu bejako madah ka :

“Nyin apai menoa Lulong Empong Kebiau Kumang Jentang Kamarau, menoa Bunsu Ribut. Nyin meligai anak dara iya, Kumang Panggau Ranggang penagang lubang ribut, Jeburi jam besi pengunchi tali seput.”

Orang indu lalu tekenyit ninga penyaris munyi nyawa Daun Limba Limbun Telajan. Langit munyi ka charik ditujah iya. Indu lalu bejako :

“Sapa meh orang tu bangat ngumba udu nguyang menoa aku ditu. Tenun ai ambun aku nyau enggai dikatong ngerasok mantang, laban menoa nyau kayak-kayak ditujah orang tu. Lagi aku meda.”

Lalu dibatak orang indu terupong buloh laung, lalu ditinjau iya. Nya baru iya meda daun limba limbun terebai mansang ngagai iya. Dia iya bisi meda orang lelaki siko udu penyigat-nyigat, ngenjing nyangah dudok dalam daun limba limbun nya.

“Adoh ! Ngumba udu lelaki nya, mati pumpong, mati salai. Enti nuan enda ngetu, busong puni nuan nya, unggal,” ko jako orang indu. Udah nya tincin orang indu lalu bejako :

“Indai, ninga nuan. Nyin daun limba limbi Telajan nempap bukit tumpor nyadi emperan, Tedong nyengkong mantok melit, Iko bebelit dalam bulan. Orang Panggau rana meh nya indai, anak Keling Gerasi Nading Bujang Berani Kempang.”

“Au meh Dunu. Enda dipadah ka nuan ngelala meh aku.” Ko orang indu.

Tekala nya lalu ditekan ka orang indu kunchi rebut, sepi Telajan daun limba limbi iya ada enggai dituju ka bukai sigi kia ka berari-ari, nuju adap meligai orang indu. “Apu, pama amat orang indu tu,” ko ati iya din. Enda lama udah nya ensepi diri udah terengkah di tanju meligai orang indu. Telajan pen lalu nganta lalu begari. Udah siap samoa baru iya pansut ari daun limba limbi.

Orang indu lalu nganchau tikai disulam enggau benang mas. Ambi iya baku mas sarang insap lalu diengkah iya dia penoh laban samoa macham insap ka badas. Telajan pen tama, orang indu pan pansut ga, dia seduai lalu besabong preening. Peda ada baketepak tichak laboh ari dinding kena pandang seduai iya.

“O, lalu meh wai menyadi dudok ditu ba tikai ke udah ditaga aku ka nuan,” ko orang indu. “Pia meh wai,” ko Telajan. Dudok Telajan dia dinga insap tak lalu berengkah besanggai minta insap iya :

“Aya liba nuan manggi singgai,
Ka dek meh nuan laki indai
Empa meh kami selutu langit tu
Enti kami abis, empu iya tau
Meh dibai nuan pulai aya, wai.”

“Au meh insap, angka indai kita enggai ka aku,” ko Telajan. Peda mata orang indu melintu merening iya. Telajan pen ngetup mulut merening orang indu. Udah nya orang indu tama ka bilik, dinga nyau ngangau ngumbai makai, Tama Telajan meda tikai udah sedia danchau, tang pemakai nadai ayan dia.

“Anang guai wai, enda lama da pansut pemakai nuan. Nuan enda iboh nyengkau iya, awak ka kuli aku indu injin didin nyapi nuan.”

Dinga utai munyi luching pansut ari dinding. “Ning, nang, nong,” ko munyi utai nya. Peda pemakai udah sedia magang dia. Udah nya peda pansut jari orang dua iti ; tunjok baka ka diraut, empa pemanah sereta megai sudu mas, lalu nyapi iya. Jari siti nyapi lauk, lalu siti nyapi asi, lalu beganti-ganti bakanya berari-ari sampai ka kenyang. Udah nya jari lalu meri iya ngirup ai bisa mega dia. Orang indu lalu bejako ; “Umbas meh diatu, pansut meh nuan Lelubit Langit lalu bantil meh anak temuai.”

Dinga memunyi baru injin dindin. Peda pansut baru jari dua iti nya adi sama besaup nantai ka chubit mesai telu empitu lalu ditantai ka iya ba moa Telajan. Dinga ada bepantun ;

“Aih, nebang tapang
Di tingkah tebiang
Pun tumbang
Endor nabor samakau
Irup pulut enggi
Kami ai rirang
Enti nuan midang
Nyadi kenyalang
Aku nitih ka nuan
Lepau, nyadi kekalau.”

Peda ai tuak ada mesai tunjok pansut ari chubit. Enda lama udah nya nyau guchor-guchor baka panchor wong giam. Dinga nyau degum-degum ai tuak tama batang rekong Telajan. Tak kudi mimit ati Telajan ensepi ai tuak nyau enggai abis, ada disungkak iya lalu putus tali ke numpu ka puak tasik besai. Mangkok lelubit langit nya tadi lalu kena telan iya sereta enggau injin didin sama ditelan iya magang. Ada tegenong orang indu meda utai bakanya.

“Sayau meh mangkok enggau injin dindin nuan unggal,” ko Telajan. “Nadai ko enggau iya meh wai. Sigi dasoh, ga meri nuan ngirup. Maioh ga orang udah dasoh aku ngirup iya, kapa ke nelan injin aku, ai tuak enda meh ulih telan sida, endor sida nyau sulai ngelanggah lemai, nyau lesi ngelanggah hari. Nadai meh orang ke udah tirup ka iya unggal. Nuan tu meh orang lelaki tau jadi sampai ka mati, tau ka ambai sampai ka parai.”

“Anang bangat pia meh jako.” Ko Telajan.

Udah nya, lalu dichabut iya ari tunjok kaki, peda jejengkak nyadi kuda gemala. Ada ditempap orang indu, peda nyau bebali nyadi injin didin enggau mangkok lelubit langit baru. Udah makai, udah apa indah, hari pan nyau malam. Nya alai lalu berandau mega seduai iya dia nanya ka rita pangan diri. Nadai enda mega randau seduai ; sampai nanya ka peneka pangan diri pen abis dipansa seduai. Ukai baka ka bisi orang kenangi mina seduai iya aja dia. Nyau tindok mega, lalu sama tindok begulai baka ke udah jadi lama, laban aum seduai sigi udah abis.

Dani pagi leboh udah makai, udah samoa, dia Telajan nanya indu nya : “Kati nuan enggau aku ambai wai ?” ko iya. “Nama kabuah enda enggau, enti nuan deka mai aku deh laki kadeka ati, ambai enda dibuai. Tang nganti aku udah nengkira dulu, lalu madah ka indai seduai apai, enggai ka sida enda nemu penunga pengenyau aku.”

Lalu dipukol iya tali-angin ngagai indai iya Lulong Empong Kebiau, Bunsu Ribut, madah ka diri belaki ka Panggau jadi enggau Telajan anak Keling.

“Au meh Endu, baik meh nya anak. Nasit nuan nya tulih ka orang Panggau. Nya ga sigi petunggal nuan empu. Tang anang enda nemuai ila, Endu enti udah lama din. Bai nemuai laki nuan. Aku nadai hari betemu enggau seduai diatu laban benong ngator bala kuli aku bekereja ngasoh sida bejalai ngagai genap suku menoa. Arap ka seduai lantang senang.”

“Nyau meh kami dua tu indai,” ko indu.

Udah nya orang indu lalu nyikap samoa perengka iya. Injin didin, kunchi tali seput enggau guntin menoa dibai iya magang. Utai nya dikempok iya mit lalu simpan dalam bungkan gemala mesai batang ruku.

Udah nya Telajan nyengkau jari indu, lalu dikusok iya. Peda lalu bebali nyadi mesai telu manok. Lalu simpan iya dalam temilah gamala bulan.

20. ENDU SULOH BINTANG BELAMBAI
Udaj nya seduai pen nyau ga terebai sahari-hari nya katas kin. Nyau kelama nya baru datai di pintu langit baroh, lalu tama dia. Terebai ari nya, baru ngebus ka serak langit siti. Terebai baru ga ari nya, nyau katujoh belas serak langit ditujah Telajan nya baru seduai iya datai ;

Di sungai pemulai mimpi
Ai dipandi mali mati
Menoa Renggi berani ati
Kaki bekungkong rantai
Bujang berani kempang
Penagang bala penubai
Besenentang enggau orang
Di Betong Junggor Tanjong
Baka jelatong pisit dirakit
Orang di payan lunti dan
Baka sarangan sarang mentelit
Menoa Laja Lalang Sesangga.

Lalu nimpai menoa nya mega Telajan. Orang menoa nya nyau begau ninga langit munyi ka runtoh ditujah daun limba limbi iya. Penoh padang laban orang ngemata ka iya sangkai dia. Lapan kali iya meling meligai orang indu dua iti ke begitang nengan remang datas din. Pengudah nya baru iya nurun ka baroh. Orang indu meligai dua iko nya pen udah meda iya.

Leboh baru sangkai dia Telajan apin pansut, tang dulu nganta diri mandi beminyak, apa indah. Nya alai lalu dibantai ka iya jayau minyak ajing tapang bekumbai, tanah palai, empeliau begauk meh kenu nya dia. Udah nya tak angkat meh asap bau minyak ada nyadi bala keringit, lalu terebai nuju meligai orang indu. Dia orang indu ensepi ati diri enda nemu tunga agi. Tak asai ka dipeda moa lelaki ke empu minyak bangat ngemau nya. Udah iya tembu nganta tembu samoa, nya baru iya pansut ari daun limba limbi. Peda orang nyau tegepang tekenyit meda penyigat gamal iya.

Iya pan nyau datai di kaki tangga. Dia iya nanya ka penyadi rumah ; “Kati jadi rumah nuan Aya Laja Lalang Sesangga ?” ko iya.

“Jadi igat jadi
Niki meh igat niki.
Rumah panjai engku
Enda kala entak
Ka tambai penti pemali
Rumah pandak engku
Enda kala entak
Ka rembak pagar api.”

Iya pen lalu niki, sepi rumah tak tekayak ditujah iya. Aya laja Lalang Sesangga ke nganchau tikai nyau abis ka terap laban rumah tekayak.

“Lalu igat lalu,” ko Aya Laja Lalang Sesangga.”Pia meh aya,” ko Telajan. Iya pen lalu dudok ba tikai ka udah danchau Aya Sesangga.

Udah iya dudok, nya baru Aja Laja ngangau ngasoh orang nganjong sarang pinang sarang insap ari bilik. Dinga orang indu ada nyaut, “Au, apai, au,” ko iya. Mulut nyaut jari pen udah ga nyengkau baku mas tunjang delapan. Empai iya nganjong dulu orang indu besampi :

“Ninga nuan baku sarang insap sarang pinang. Seduai tu baku penguji aku. Siko seduai nyadi belalang, leboh datai di ruai lagi lalu baka ke deka mantok. Siko seduai nyadi remaung, leboh datai di ruai lagi lalu baka ke deka ngetup. Enti temuai nya rari lagi, ukai meh iya nya orang :
Mang ari kepayang pandok sapagi, Munoh ari ipoh ngujong jenggi.” “Pia meh,” ko baku nyaut orang indu.

Ada pansut baku sarang insap, peda nyadi remaung ada merengong deka ngetup kaki Telajan. Lalu ditempap iya ba pala peda nyadi baku baru. Peda pansut ga belalang ada deka mantok iya. Lalu ditegu iya pala, peda lalu bebali nyadi baku baru.

“Amat pama meh oang lelaki nya. Mimit pan enda meh iya takut. Nyau aku ke malu nguji iya ngapa,” pia ko orang indu bejako kadiri, berandau nengali. Nyadi penama orang indu nya Endu Tempiau Leliau Lemai, Endu Suloh Bintang Belambai. Anak tuai Aya Lalang Sesangga.

Udah nya orang indu nyau ngangau ngumbai makai. “Makai tua igat,” ko Aya Lalang Sesangga. Baru ka nuking ka pintu, meda temuai udah dedunga dudok di bilik. “Apu pama meh temuai nya,” ko ati iya din. Lalu makai mega seduai. Udah kenyang lalu nyau pansut kerusi. Dia sida lalu berandau.

“Ari ni penatai, lalu nama pejalai nuan deh anak ?” ko Aya Laja Lalang Sesangga.

“Aku datai ari :

Lulong Kampong Raregah
Endor Laut Besembah, Nangga Aji.
Di Tatai Tanah Betuah
Endor berumah ngulih ka padi.

Nyadi penemuai aku tu sigi pejalai kitai bujang meh tu aya,” ko Telajan. “Enti pia, nadai penyalah meh nya igat, sigi jelan pejalai kitai orang lelaki.”

Sida nyau randau bukai mega. Hari pan nyau ga malam. Udah orang berandau tiga hari tiga malam, orang pen tindok. Udah nya dikusok Telajan daun selida lidoh ngasoh mata deka tindok, daun selida lida ngasoh mata dela lela. Peda tudah aya Laja nyau tesungkor ngantok.

“Oh, salah aku tu igat, nyau ngantok aku tu. Enda kala aku bangat enda nakal tu. Indah selamatu sampai meniga bulan aku enda tindok empai meh ngantok. Tu baru ka tiga hari, nyau ngantok. Angka bisi mimpi lagi kini, nya alai mata tu bangat bakatu. Enti dek deka ngayap anak tau meh. Nyin meligai ke tinggi enggi anak aku, lalu siti ke bela enggau enggi iya nya enggi anak petunggal aku Renggi berani ati, kaki bekungkong rantai. Nya sida seberai nyin. Dua iko nya meh indu bajik kami menoa u, Pia sida bukai ukai enda bajik tang kurang mimit ari seduai nya,”

“Pia meh aya,” ko Telajan. Udah nya nyau aya Laja Lalalng Sesangga tama ke bilik lalu tindok.

21. ENDU TENGKELANG SAMPANG GADING
Udah orang abis tindok, lalu angkat meh Telajan pansut ka tanju ninjau meligai orang indu. Peda amat tinggi meh meligai nya baka bintang pemesai api lampu tenggau iya ditinjau ari baroh tu. Perening iya jalai nadai dipeda mina meligai nya kitang-kitang tengan remang datas din. Kudi mimit ati iya lalu mengkechit ari tanju lalu terengkah ba meligai orang indu. Ka tama pintu enda ga ulih buka. Dia iya lalu ngelesap ka diri nyadi angina nya baru iya tama. Datai iya di panggau gemala orang indu, peda kibong sambong menoa lapan belas serak agi terus dipandang perenching orang indu ke gali ba tilam kerengkam langit. 

Tama iya kedalam kibong, lalu digerak iya orang indu. Dani mega orang indu lalu dudok. “Sapa meh kita unggal tak nyelai meh penatai nuan tak ngesal ka ati kami orang indu ?”Lalu diselintik iya kunchi api lampu bulan, peda alah tengah hari empa penampak lampu nya. Dibantai ka iya tinchin jamin menoa ngambi ka iya ngelala orang lelaki nya. Pansut tinchin lalu bejako : “Apu indai wai, tu meh apai aku Telajan nempap bukit tumpur nyadi emperan, tedong nyengkong mantok melit, iko bebelit dalam bulan. Tak orang buau, orang Panggau rana-rana meh tu deh indai,” pia ko tinchin orang indu.

Udah nya dinga nyaut tinchin Telajan. “Kami tu nemu meh nama indai nuan sulu. Nama indai aku nya apai ;

“Tempurong Kunyit Selampor Kuning
Endu Tengkelang Sampang Gading
Endun Keliling Pulau Panggau
Enti ko aku apai wai,
Sabaka meh berang kelambi
Satuntun meh jalai jani
Sabaka meh ia apai enggau dek.”

“Pia meh endu, kada orang deka ka kitai,” ko Telajan nganu tinchin iya. Peda mata orang indu tak bekilat tuchum mimit merening iya.Dia Telajan lalu bejako nanya orang indu.

“Nyadi aku unggal udah bisi mimpi. Samoa orang indu meligai ke nemu nama aku sigi enda tau enda jadi enggau aku. Lalu enti sema nuan enggai jadi enggau aku, tau madah terang.”

“Aku pen pia ga, “ ko orang indu. “Aku bisi meh mimpi, mimpi dipadah ka indai tuai orang, enti ukai orang Panggau aku sigi enda mudah belaki ngapa. Enti nuan amat deka ka aku, nama kabuah aku enggai, nangi ka kita enggai ka kami,” pia ko orang indu.

“Aku tu enda lama tau diau di menoa kita dulu, laban sigi udah ditimpoh antu dalam kandang dua puloh taun aja asoh iya ngiga bini, lalu lima belas taun aku udah belelang. Nya alai lima taun da alai alu nembu ka timpoh nya,” ko Telajan.

“Apu, nyelai amat mimpi nuan ambai, ketuju bangkai, laki ketuju ati kami. Enti pia badas nuan malam pagila ngabas petunggal aku di seberai nyin. Penama iya :

Endu Tanggi Nasi, Tanggi Nasa, Aur Bangi berira mandang dunya.

Dipelaba aku tentu iya ngelala nama nuan.” “Au meh wai, badas endar meh nya. Nuan ga udah madah ka aku ngicha ka nyau tiga iko da agi digiga aku, ambai wai,” ko Telajan. Seduai lalu gali tindok.

Daun kelapan daun pingan siti belayar ngagai nanga Tebas, lapan belas kenyap hari pen tawas. Seduai pen nyau dani. Udah makai samoa indah, nya baru Telajan nurun . Ketungkah iya nurun lalu madah ka orang indu ngasoh iya nengkira samoa ngepan samoa macham barang ke dibai iya, laban dua hari da Telajan madah ka diri deka mupok.

“Barang iya meh wai. Nama kabuah aku enda nengkira diri, enti munyi nya,” ko orang indu. Telajan pen nurun ga, datai di baroh, Aya Laja pen pansut ari bilik. Baru pulai ngayap ari sida Endu, nuan igat ?” ko iya. “Ngayap ngapa meh nya aya,” ko Telajan. “Kati alai nya pia deh igat. Kati enggai sida Endu ka nuan ?” “Enda ga iya tentu enggai, aya.” “Baik meh nya igat, enti iya deka ka nuan,” ko Aya Laja Lalalng Sesangga.

Badu makai pagi nya sida lalu berandau baru.

22. DARA TANGGI NASI.
Nyau kapuas sida berandau, hari pan nyau malam baru ga. Uda badu makai lemai orang lalu berandau baru. Nyau lama lemai orang pen tindok. Udah orang abis tindok dia Telajan lalu nganta. Udah tembu samoa anta iya, iya pen mengkechit baru lalu terengkah di tanju meligai Dara Tanggi Nasi. Datai din iya mali diri nyadi asap bau wangi, lalu nempoh idong orang indu ke benong nenun ai ambun. Ada sadekan iya lalu pekasi ensium bau minyak bangat bebelit ba idong. Enda kala iya nyium minyak orang bau nya.

“Apu, ko iya. “Sapa empu minyak bangat ngemau tu. Tak nyau kesal tangkai dalam aku nyium bau iya. Kati baka gamal orang ke empu tu, nemu nya sigat, nemu nya enda kini. Enti nunda ka bau tu patut sigat gamal iya,” ko orang indu.

Tak nyeling mimit meh orang indu lalu tekenyit meda orang lelaki siko nyau perenching gamal bediri semak iya. Seduai lalu besabong perening. Orang indu lalu angkat nganchau tikai peradani lapis enggau benang mas. Nya baru iya bejako ; “Dudok unggal dudok. Enda meda dek datai aku tadi wai menyadi,” ko iya.

Benong iya nengkira sarang insap, dinga tinchin mata jegura orang indu ada bejako. Iya madah ka lelaki nya orang Panggau. “Enda ngutok meh ati aku tak kesal asai tu,” ko orang indu bejako kadiri, berandau nengali.

Orang indu lalu angkat mela makai. Tembu makai lalu dulih ka orang indu ai tuak lapan belas rumbang, lalu diri ka ngagai mangkok penguji mesai telu pipit. Udah Telajan ngirup, iya ari tunjok kaki lalu disua ka orang indu.

“Amat pama meh nuan, Telajan nempap bukit tumpor nyadi emperan. Nyaing muting gerasi, Tajam nyemilu tisi. Mang ari kepayang pandok sapagi.”

Udah nya baru seduai iya berandau bukai : “Nyadi aku tu,” ko Telajan, “dasoh antu nepat samoa indu meligai ka nemu nama aku. Sida nya sigi ambi aku ka ambai magang. Nya kabuah aku datai ditu nanya nuan wai menyadi.”

“Nyadi aku tu sanggu madah ka diri deka, enggai ka dikumbai nuan bangat gagit, wai menyadi. Samoa penemu aku sigi panggai ka ngagai nuan. Ti nuan deka mai aku, lalu enggau nuan ga aku wai menyadi. Ti nuan enggai mai, nama deh alai jako aku,” ko orang indu.

“Enti udah munyi nya,pagila beradu meh nuan, ngadu ka samoa ngepan, lusa baru kitai mupok ari menoa tu.” “Enti pia, barang ko nuan meh,” ko indu nya. Telajan lalu nat ka diri ba penindok orang indu malam nya.

23. RAMI BESAI
Pagi siti Telajan nurun ka baroh, orang indu dua iko nya sama bela nengkira diri empu mega sahari-hari nya. Nyau lemai hari dia Telajan madah ka Aya Laja Lalang Sesangga madah ka diri deka mai seduai iya Aya Renggi berani ati, baum ba Balai Besai antara dua buah nengeri nya. Nya alai lalu dipukol iya tali kangau ka seberai kin madah ka aya Bekungkong Rantai enggau bala iya mai sida berandau udah makai lemai nya.

Aya Laja Lalang Sesangga ngasoh anembiak iya nesau samoa orang ngasoh sida sama datai ngagai Balai Besai lemai nya, laban bisi utai dikerandau. Samoa indu meligai lapan belas iko nurun magang lemai nya mending ka randau orang. Sida dator orang dudok berintai ba tengah bilik.

Leboh orang udah datai dia samoa, Aya Laja Lalang Sesangga lalu ngasoh Telajan bejako nusoi berita ngagai orang maioh. Angkat Telajan lalu bejako ngagai orang maioh. Mata orang maioh sigi merening iya samoa. Dia iya lalu bejako ;

“Empai aku ngenang utai ke deka dikejako ka aku dulu aku meri tabi ngagai kita samoa, enggai ka kita bisi tekenyit ninga rita aku. Nyadi aku tu datai ari Panggau Libau Gegiau Takang Isang, Panggau Ragai Bintih Langgai Kempat Tiang. Nya nama menoa aku. Penama aku empu tu Telajan nempap bukit, Tumopr nyadi emperan, Tedong nyengkong mantok melit, Iko bebelit dalam bulan. Aku dasoh antu ngiga samoa indu meligai ke nemu penama aku. Samoa indu nya, enti tuboh sida empu deka sigi dambi aku ka ambai magang. Ba menoa kita ditu aku bisi udah tetemu ka indu dua iko ; Siko seduai nya :

Tempurong Kunyit Selampor Kuning
Tengkelang Sampag Gading
Endun Keliling Pulau Panggau

Siko nya :

Tanggi Nasi, Tanggi Nasa
Aur Bangi, Aur Kira
Berira mandang dunya.

Seduai empu tuboh nya udah nyanggup deka, tang aku enda tau enda nerang ka, lalu nanya ngagai kita apai indai petunggal menyadi sida iya. Jako tu enda tau laun disaut laban aku deka mupok sahari pagila. Pejalai aku dua puloh taun ditudoh ka antu, lalu lima belas taun udah, nya alai lima taun agi aku bejalai nengah menoa orang. Nya kabuah aku empuru ka samoa kia lemai tu,” pia ko Telajan.

Ada nyaut Aya Laja Lalang Sesangga : Aku tekenyit bendar ninga rita nuan tu igat : menantu asi, menantu ensui ke enda dasoh selama ia. Aku ke tekenyit tu ukai enda ngasoh tang tekenyit kelalu gaga betampil enggau kita Panggau. Nyadi selamatu sigi dambi mimpi kita Panggau. Nya alai ka tu anang dikenang agi, nyau ka menantu, kai anak kami. Nadai ngelui agi meh tu nyau betampil enggua kita Panggau, lalu lebih meh pengeraja kami tu ila.” Ko iya.

Nya alai saut Aya Renggi berani ati pan samunyi enggau enggi Aya Lang Lalang Sesangga nya tadi. Tang deh seduai iya sama madah ka indu dua iko nya sama udah bisi orang ngambu. Nyadi lelaki nya diatu nadai di menoa udah belelang ngagai menoa bukai nengkira utai kena melah pinang. Lelaki nya anak Raja Lambor. Seduai madah ka dalam pia orang bisi udah ngambu indu dua iko nya, pekara nya sigi bepanggai ba Telajan empu ti iya berani.

Nya alai saut Telajan madah ka samoa pengachau ti bisi nyadi, iya magang tanggong. Indu dua iko nya ditanya orang lalu madah ka diri enda nganti lelaki bukai sigi udah deka belaki Telajan. Bakani kati pan seduai iya enda tau enda nitih ka iya ga. “Enti udah munyi nya nyadi meh pengawa kitai tu,” pia ko Telajan.

Tekala nya iya lalu muka peti ngulih ka wang derian. Dibantai ka iya kambut mit dua iti lalu dengkah iya ba moa orang maioh dia. Tuang orang dia peda wang ringgit gemala samoa-moa. Wang nya lalu dibagi dua, sabagi pulai ka mentua ia siko, lalu sabagi pulai ka siko. Udah tembu bebagi ka wang nya tadi, lalu dibantai ka Telajan injin didin aria lam peti gegulin langit, lalu ditanam iya ba puak moa bala maioh dia. Peda ada nyadi meh peti injin nya mua pemesaimesai utai tak renjong-renjong ba moa bala. Lalu dikunchi iya kenu, lalu tetukang, peda pansut bansa Tambi salunsin, China salunsin, Laut salunsin, orang putih salunsin, Iban pen sa mesa nya ga aria nya. Bisi saribu macham bansa mensia pansut aria lam peti nya, lalu sida bela mai macham bansa ai bias, aim anis enggau samoa utai dempa, bisi magang dia. Udah nya peda pansut ga orang indu dara ari samoa macham bansa bisi lima ratus iko. Sida lalu nya lalu besadong ka samoa utai dempa ngagai bala maioh. Enda lama iga alai samoa orang maioh dia nyau kenyang penapat, kedua sabarang ke rajin agi nyau mabok. Samalam-malam nya orang rami betaboh ngajat, ngirup mega sia sampai ka hari tawas pagi siti.

Samoa orang alit bendar ati meda utai ka nyelai nyadi ba sida samalam nya. Peti nya tadi amat nyelai, laban samoa orang ke pansut ari nya lalu lesap tama kia ka baru. Sida nya nadai bejako enggau pangan, mina tak nyadong pemakai ngagai samoa mensia maioh ke dia.

Udah tembu samoa orang berami ngirup, makai, ngajat, betaboh, dia Telajan lalu nempap peti nya, peda tak lalu bebali mit baru mesai kerubong machis, lalu disimpan iya dalam peti gegulin langit.

Udah nya Telajan lalu belator deka mupok, dia iya betabi enggau samoa bala mentua enggau orang bukai. Apai enggau indai indu dua iko nya sama nyabak ditinggal ka anak seduai belaki nguai ka orang. Sida lalu nangkal Telajan enggau jako enda ngasoh lama alai nganjong seduai nya nemuai. Sida lalu minta selamat lantang senang gerai nyamai.

24. PENYUAN BATU BULAN
Udah nya sida tiga sama tama ngagai daun limba limbi. Tak diselentik Telajan ba kunchi iya peda lalu nyau terebai. Dinga menoa munyi ke terangkat kena tujah iya angkat terebai. Terebai mega sida tiga sahari-hari, lalu samalam-malam nya. Nyau semak antara menoa enggau orang bukai datas din, nya baru Telajan ngusok indu dua iko nya tadi lalu bebali nyadi telu manok. Lalu disimpan iya dalam temilah.

Benong iya terebai dia iya ngenang indu di :

Penyuan Batu Bulan
Baka Papan Lantak Cheremin
Endu Dayang Linggang Nengeri
Lulong Bengkong Bunga Api, seduai
Kemeli Tangkai Padi
Dambi Mimpi Nyadi Raja.

Seduai nya sama sereta ngantok lalu dipadah ka Ini Indai Jangai :

“Laki seduai penama Telajan bisi datai tengah hari pagila, wai uchu. Laki seduai nya orang Panggau Libau, Lendat dibiau daun isang, orang di Engkeranji Padi richah rami munyi bala pengabang. Keba seduai anang enda sedia dulu. Dani meh seduai uchu,” ko iya. Ini Indai Jangi pen nyau, seduai bela dani.

Nya alai laban meligai seduai senentang enggau enggi pangan, dia seduai lalu bejako enggau tali ruding :

“Oh sulu, diu wai sulu
Nangi kati nuan bisi
Mimpi tengah hari ?
Gelai, ninga nuan
Saum sulu wai ?”

“O sulu aku,
Wai nangi
Bisi meh aku mimpi
Mimpi orang lelaki
Jumau orang Panggau” pia ko saut Dara Kemeli nganu Endu Dayang Linggang Nengeri.

“Enti bakatu
Sabaka meh mimpi
Kami dua saum tu.” Pia ko ati iya din.

Udah nya seduai lalu mai pangan sama nengkira ngepan diri empu chukop raban. Seduai lalu muka keban lama sarang ngepan chukop raban.

Hari siti seduai sama nurun ka baroh lalu madah ngagai apai indai seduai madah ka diri sabaka mimpi. Tu kadua kali seduai udah sabaka mimpi. Dulu menya semina dasoh orang jadi enggau lelaki penama Telajan, tang diatu nyau dipadah ka orang Telajan datai lagi maia tengah hari nampun.

“Oh, enti pia, Endu, nengkira meh kita,” pia ko apai seduai. “Tangkap babi ke besai kena ngulu penatai anak temuai,” pia ko jako Aya Rengayong nganu Pengiran Jurai.

Babi pan udah ditangkap udah samoa. Ai tuak pen udah ga sedia dalam lelubit langit dua iti penoh, lalu samoa macham piring alu udah siap magang. Hari leboh nya baru tengah hari dara. Nyadi Telajan ke terebai baru deka ninjau menoa sida nya, dinga tinchin iya lalu bejako :

“Ninga nuan apai aku Telajan. Orang udah sedia diatu nganti penatai nuan laban indu dua iko nya udah dipadah ka Ini Indai Jangai, madah ka nuan mesti datai tengah hari tu lagi din. Keba nuan anang enda sedia nganta samoa laban nuan dialu orang di pala tangga.” “Au meh Endu wai,” ko Telajan nganu tinchin iya bemata jegura.

Nyau enda lama udah nya Telajan lalu ninjau menoa Penyuan Batu Bulan lalu dulih ka iya tambai menira perang betiang mas gemala. Ukai main ga pemanah chura tambai iya nya. Peda ada kekitau baka daun api gamal menira nya.

Nya baru iya nuntong di menoa nya, peda iiya nengeri orang dia udu pemesai baka ke meda rampa tasik meda perabong rumah orang empa pemesai nengeri. Orang di menoa nya begau magang ninga nyawa daun limba limbi iya terebai dia. Orang indu anembiak nyau semepai alai rari, laban sida ngumbai nya munsoh deka munoh datai ari menoa langit din. Udah nya baru orang nemu nya daun limba limbi anak Raja Panggau Libau, ukai munsoh. Nya baru orang enda agi takut. Bala soldadu Aya Rengayong sigi udah penoh padang baris nganti penatai Anak Raja Panggau.

Dinga meriam nyau bekasegum diselup orang dua belas kali kena masa penatai iya. Telajan dulu nganta dalam daun limba limbi. Iya lalu bebaju betanchut nunda ngepan orang menoa nya. Tanchut dililit mas magang, baju disemayau enggau burai batu intan, tupi makuta batu intan magang.

Udah tembu beradu nya baru iya pansut ari daun limba limbi, lalu dibaris bala soldadu. Iya lalu nengah jematan pirak dilapis ngena rinai setawak, lepas nya baru iya nengah jematan rintai telu. Datai iya dia lalu ditujah iya rintai telu sigi pen enda ga belah, bekinsit pan enda ga telu nya negu pangan. Udah pupus jematan rintai telu, nya baru iya datai di kaki tangga, dia iya dasoh Pengiran Jurai ngayang babi. Udah babi di kaki tangga mati, nya baru Telajan lalu nunjan tangga rumah. Sepi rumah tak ada tekayak nyerumba singkang iya ke bejalai, asai ka dipangka ka ribut hari jai. Datai di pala tangga, dia iya lalu dibiau Aya Rengayong sereta lalu dasoh munoh babi siko da. Udah babi nya mati, dia Telajan lalu dibantil orang indu meligai dua belas iko, sigi lama udah nganti penatai iya. 

Terubah iya dibantil Dara Kemeli seduai Dayang Linggang Nengeri enggau mangkok penguji mesai telu pipit. Sereta dua seduai nuntong Telajan. Irup Telajan lalu puang mangkok mesai telu pipit. Digusak orang indu peda penoh baru. Irup iya peda puang baru ga. Dua tiga kali orang indu udah ngusak peda penoh belama, nya baru Telajan nyeling mimit lalu tepeda ka tali ai dua iti nuju ngagai Batang Ai Penyuan enggau Batang Ai Tasik Langit. Digetil iya ngena kukut sapiak lalu putus. Udah nya putus, baru tuak langkang dirup iya. Lalu disungkak ka iya mimit peda jari orang indu lalu tama nyawa iya, mangkok pen telechut pegai seduai lalu kena telan Telajan. Udah nya samoa chubit mas orang indu bukai sigi ditelan iya magang.

Udah nya iya lalu dibai orang lalu ngagai ruai Aya Rengayong lalu dasoh orang dudok ba panggal gemala bulan ; dia bisi tiga iti gambar bulan, lalu enam iti gambar bintang. Udah iya dudok dia lalu dijeput iya ari tunjok kaki peda pansut kuda gemala dua iko enda tentu besai iga enggau sapuloh iko kuda mas. Ditempap iya sida nya peda tak nyadi mangkok penguji baru. Samoa kuda mas nya lalu nyadi chubit mas baru, lalu disua ka Telajan ngagai orang indu. Samoa orang ke meda lalu ngenong magang meda penyelai utai dikereja iya.

Tembu makai tengah hari nya sida lalu berandau di ruai. Dia sida nanya ka pejalai iya ke bangat udah jauh, udah lama ngejang ke menoa diri. Iya lalu nerang ka pejalai diri dasoh antu ngambi indu dua iko ke penama Dara Kemeli seduai Dayang Linggang Nengeri. Laban mimpi iya leboh baru bujang menya madah ka iya enda tau enda jadi engau indu dua iko nya. Tang enti indu dua iko bisi orang udah nanya, dia Telajan madah ka diri deka tanggong pasal pekara nya.

Lama bendar Aya Rengayong seduai Pengiran Jurai enda memunyi lalu enda nyaut jako iya. Udah nya baru seduai bejako :

“Nya alai baka kami dua aya nuan tu sigi nadai tentu penemu tentang pekara tu, tang alai kami dua ke nemu ari tusoi sida Endu. Tak munyi ke betundi enggau nuan, deka enda pia laban utai amat pia ga. Sida Endu leboh empai dara kalia bisi mimpi dasoh indai tuai orang jadi enggau orang Panggau. Nya alai dani pagi dia seduai lalu nusoi mimpi diri. Mimpi seduai semunyi enggau enggi pangan. Nya alai leboh nya mimpi seduai lalu disambut kami enggau gawai, ngambi ka iya enda sabau. 

Nyadi pagi tu tadi seduai iya sama bisi mimpi, dipadah ka antu, madah ka nuan bisi datai tengah hari tu tadi. Nya kabuah kami lalu begau nengkira diri nyambut penatai nuan. Nyadi kita Panggau, anak, sigi dikelandik jako kami enggau betampil enggau beringgap, laban sida apai nuan Keling sigi buah jako kami ; tang kita ari nyin ke jarang rembus, laban seraka menoa kita bangat jauh. Bisi mega orang udah nanya sida Endu suba, tang jako nya enda diterima kami, laban sida sama udah bisi mimpi. Sida ke nanya nya, ukai mega orang bukai enggau kami, siko nya anak petunggal aku ;

Sintau Kamarau Hari, Tutup Temilah Besi, nama anak iya ;

Nyala Ngelawa Lampong
Bujang Kering Nading Merengong

Nyadi Endu Dara Linggang Nengeri di tanya ;

Igat Pedang Limbi
Berani Ati Enda Nginsit
Pedang Panjang Ngenchanang
Mantok Melit.

Nya orang di Tanjong Betong Sebuyau, Mangkang Batang Tasik.” Pia ko jako Pengiran Jurai, Mangkang Tetai Tisi Langit, Salang Mangkang Lenggang, Bintang Berakit.

“Aku aya, enda beduli ka orang bisi udah nanya sida iya. Enti orang lelaki nya agi deka nepat iya, awak ka iya ngambi indu ari jari aku” ko Telajan. “Kadua agi jako aku lalu mai kita dalam nengeri tu :

Mai kita betembong
Baka paung keladi lantang
Mai kita bepangkat
Nunda urat tubai tengang
Begelumu neladan tematu
Kerang kepayang.

Aku mai kita melah pinang lemai tu, enti orang indu udah sedia enggai ka lama nganti, lama begantong enda dikereja laban aku ti agi deka bejalai ari tu,” pia ko Telajan.

“Badas meh nya anak nguai ka utai udah,” ko Aya Rengayong. Tekala nya iya lalu ngasoh orang mangkong tutong sida ke besai kena ngumbai samoa orang di sakayu nengeri nya, mai sida betugong ba Astana iya. Udah nya dinga lalu taung-taung mega tutong tu tadi dipangkong orang. Lemai nya orang lalu begempuru ba rumah Aya Rengayong magang.

Hari pen lemai, api nengeri lalu dipasang orang samoa-moa, peda baka bintang ke di langit gamal pemaioh api ngenjing bakakijap di sakayu nengeri nya. Udah nya lalu nurun magang mega indu bantang tiang meligai, indu mereti kepala pandai. Peda nengeri nyau panas nyang kena pandang dujong bengkong bungai orang indu.

Leboh orang udah sampal datai nya baru Telajan lalu ngesai ka karong iya lapan serak. Peda tak berira mandang dunya, ada leliau mandang kasau, betekijap mandang atap, peda kelingai pah gemala samoa, lapan tangkan ukir rusok gerayok nandan jelayan, betachak ka pirak bulan meratagan, bok kelepong mas mau serugan, mata ngambi leka kelam, punggong bangat nyemetong belit lumpong kayu kanggan. Nya baru dikesai ka iya minyak minyai nyelepepai bap menoa, minyak minyong ngentuchong di idong indu dara.

Udah tembu nganta, nya baru Telajan nyengkau peti gegulin hari, kulit kijang langit. Iya pan lalu bejalai ngagai Astana Besai. Peda pejalai iya :

Degi-degi baka entail ai anyut
Pejalai lubah baka rayah
Ngena Sangkut.
Peda orang ke merening iya,
Nyau abis bedarah mulut
Kena ketup gidan agi
Pangan dikeremok
Abis rajai rusok,
Bai ati enda liat agi
Tepeda ka orang lelaki
Naka penyigat-nyigat
Empai kala dunya sida dia
Kena tujah orang baka gamal Telajan.

Leboh Telajan datai ba moa pintu Astana dia iya lalu dibasa bala jejaga naka iya. Iya lalu tama kedalam rumah. Udah iya dudok, nya baru iya bejako ngagai mensia maioh madah ka pejalai diri, ke nepat indu penama Dayang Linggang Nengeri seduai Kemeli Kemantan Padi. Laban nya sigi udah mimpi iya enda tau enda jadi enggau indu dua iko nya.

Nyadi Aya Rengayong seduai Pengiran Jurai pan lalu nyaut madah ka jako Telajan nya diterima disambut seduai iya laban endang sigi deka betampil enggau orang Panggau. Udah nya baru orang lalu melah pinang. Tembu orang melah pinang nya baru Telajan muka peti gegulin hari. Peda tak pansut injin didin. Lalu dulih ka iya tekang gemala dua igi mesai telu empitu. Dileka ka iya dia peda nyau mesai pala. Gemala dua igi nya lalu ka derian iya. Udah nya lalu dunsai ka iya sepor kambut mas, peda dunjong wang mas penoh bilik gudang empat pintu, bisi lima ratus guni. Nya ka bunga pinang iya, lalu chukop dibagi samoa kaban sida mentua iya dalam nengeri nya sama ampit sagantang sapintu empa pemaioh orang ke bedua duit nya tadi. Udah nya baru iya muka pintu injin didin nya ke udah didudok ka iya di tengah-tengah bala maioh. Peda tak tebuka lalu nyadi kedai siti ke jena pemesai chukop enggau samoa utai dempa bisi dia. Udah nya peda pansut baru ga orang ke penyadong samoa utai dempa. Orang lalu berengkah makai ngirup. Samoa bala pengabang nyau abis ngelu pala, lelaki indu.

Tembu orang makai nya baru bala indu lalu betaboh. Nya alai Aya Rengayong seduai Pengiran Jurai dulu beranchau tikai. Udah nya lalu ditangkan ka bisi seduai iya penama Sudan Jamban Bulan, indai Dayang Linggang Nengeri. Siko nya Lulong Ambong Menoa, indai Kemeli Kemantan Padi. Udah tembu sida nya ngajat, nya baru bala orang bukai mega ngajat. Dulu ga bala sida ka lelaki, udah nya ditangkan ka bala oang indu.

Nyadi dalam pengerami nya bisi lelaki dua iko ke pemadu kering dalam menoa nya sama bisi enggau orang empuru dia. Samoa orang isi nengeri nya nadai telaban ka seduai dua iko nya. Siko nya Chemelik Lang Hari penama iya, lalu siko nya Jayum Tom Menoa, Bujang Singkang Kala. Seduai nya udah baum kadiri deka ngelaban Telajan memain, sabarang macham main ke temu seduai.

“Enda tau enda dipansut abis ka penemu tua ngelaban temuai nya buat. Kini ka tua ngalau iya nya wai. Lama amat ga tua belajar menya. Enti enda salah ingat angka bisi lima puloh taun nuntut ba Seletan Mansol di menoa Aki Seletan Tandok, orang mangkang Ati Langit,” ko seduai.

Kira tengah malam benong orang bukai ngajat, mansang meh seduai nya tadi lalu bejako ; “Ngadang dulu kita bukai awak ka kami dua buat tu ga bemain. Kendua buat deka mai unggal temuai nya bebuti tupai begagai turun tunsang. Enti kendua enda mai enggai ka iya lalu enda bemain. Ditu baru kitai nemu sapa pandai, sapa enda.”

Pemesai seduai nya ukai anchi-anchi, belakang seduai siko-siko bisi lima jengkal, pah, betis pen ngipak ka pemesai tuboh seduai mega. Datai seduai dia endang sikap enggau samoa perengka ke dikena bemain. Dulu seduai ngajat, udah tembu ngajat lalu main pedang. Pedang seduai baka pupu empa penajam mata, lalu bisi sedepa pemanjai, sajengkal pengeluar mata. Dia seduai lalu muka langkah bunga chekak. Udu amat jamah seduai. Indu anembiak nyau takut meda pemalat seduai iya muka bunga main. Udah nya seduai lalu muka bunga tembong, bepalu ngena kayu. Peda kayu dikena seduai mesai kisar, dikena bepalu enggau pangan diri, lalu nadai ga tekena ka pangan. “Amat sikar meh penikar dua iko tu,” pia ko jako orang maioh.

Benong seduai udah memain dia seduai lalu ngangau ka Telajan : “NI nuan unggal. Mansang meh nuan enggau kami dua buat tu memain meh wai.” “Au meh wai,” ko Telajan.

Ninga munyi nya lalu ditagang mentua iya dua iko, enda ngasoh iya ngelaban seduai nya enggai ka iya bulih penusah ngapa. Orang indu pan lalu nagang iya ga. “O, anang meh nuan Telajan ambai wai, ngelaban seduai nya. Sema iya menang lagi ambai wai, enggai meh kami orang indu jadi enggau seduai nya. Anang meh nuan Telajan anang.” Pia ko jako orang indu.

“Nadai ko enggau meh ambai wai. Nguji ngapa meh tu laban bangat enda kala bemain,” ko Telajan. “Lubah ka unggal,” ko iya ga ngangau ka seduai nya.

Udah nya lalu disintak iya pedang, peda mata ka mesai laja kirai, lalu pemanjai iya kira sajengkal. Tak ketawa meh seduai nya meda pedang Telajan bangat ngemit nya.

“Nyadi tu pia unggal, angka nuan bisi pedis laban kami dua, anang ngeransi laban nya sigi adat kitai bemain,” ko seduai iya.

“Seduai pan bakanya ga angka bisi pedis nama, anang ngutok pangan laban aku enda kala bemain, tang semadi seduai bangat mai,” ko Telajan.

Angkat seduai iya ada muka kuda-kuda, sereta lalu nanam diri ba midan main. Seduai lalu ngasoh Telajan ngerapat. Tang deh Telajan enggai ngerapat dulu, laban nya seduai iya ke dulu mai bemain, nya alai seduai ga dulu ngerapat. Dia iya lalu nanam diri, lalu ngasoh seduai nya ga ngerapat iya. Tak angkat Chemelik ada enda chechamang lalu mengkechit deka ngelempai Telajan enggau pedang iya. Tang Telajan nyingkir ka diri mimit lalu merejok sereta nepan ba tandan bau Chemelik. 

Dia Telajan lalu ngetis lengan Chemelik enggau pedang. Pedang Chemelik lalu tebelengka ari jari. Meda utai udah bakanya, lalu angkat ga Jayum deka mumpong Telajan ngena pedang. Angkat Telajan ari bau Chemelik lalu nepan ba punjong pala Jayum. Leboh nya Telajan lalu mantap tandan bau Chemelik, peda tudah Chemelik lalu tesungkor rebah luput. Telajan lalu ngetis ka pedang Jayum, pedang iya pelanting lalu patah. Jayum lalu ngangkat ka tudah Chemelik ke udah luput nya tadi. Didup ka iya dia lalu enda ngeleda. Udah nya baru Telajan negu pala Chemelik, nya baru iya mensugau lalu angkat.

“Kati unggal, nama main agi bai seduai ?” ko Telajan. “Main tembong empai,” ko Jayum. Tang ati iya sigi kesal ngelaban temuai nya. “Aku meh nganti sakali tu unggal, lagi nuan ngerapat,” ko Jayum. “Barang ia meh unggal,” ko Telajan.

Peda jamah Jayum kenu dia, nyau bepencha, bekuntau, betembong ngena kayu. Nya meh kayu tembong iya nyau merengong empa pemalat pusin. Mansang meh Telajan kia, lalu mengkechit mimit, tak lesap meh iya, peda tak lalu nekong tepisan jayum ngena tungkat penedat. Peda tak lalu rebah tudah Jayum. Kayu tembong iya lalu patah kena sangkut kaki telajan. Tak ditegu Telajan ba rusok nya baru iya ngeleda.

Udah nya seduai madah ka diri badu ngelaban, enti main bukai tentu balat agi alah, indah main ke endang dikandal ditemu seduai deh alah.

Udah nya baru Telajan ngajat amat. Peda kajat iya naka pemanah. Udah nya nyau ngentak ka kaki sapiak, peda nyau dua iko gamal iya ke ngajat. Entak ka iya baru kaki sapiak, peda nyau nyadi tiga iko, entak ka baru, nyadi empat, lima, enam, tujoh iko. Udah nya lesap enda lama lal bebali nyadi indu tiga iko. Enda lama udah nya lalu bebali nyadi kuda gemala. Lesap baru iya peda nyadi burong kenyalang mas tujoh iko udu pemadas. Lesap baru ga iya peda nyadi remaung tujoh iko betangkap diri sebala. Udah nya lesap baru peda nyadi gajah mas nyau liau-liau empa pemadas belalai iya. Nyau kelama udah nya, lesap baru peda bebali pulai nyadi Telajan ke selamatu.

Dinga munyi ka runtoh Astana laban tempap jari orang gaga ka iya landik bemain. Samalam-malam nya orang rami makai ngirup sampai ka tawas. Hari pan tawas pengabang maioh mulai ka diri. Udah nyau samoa pengabang maioh baru Telajan nempap peti injin didin iya, peda lalu bebali mesai kerubong machis baru lalu disimpan iya dalam peti gegulin hari. Sida lalu sama pulai ngagai rumah mentua iya Aya Rengayong seduai Pengiran Jurai.

25. NYALA
Nyadi hariI siti kira maia matapanas baru tengan niki pia, dia Telajan bejako enggau mentua iya. “Kati aya, bisi jala nuan kena nyala. Nyawa tu tetengok deka makai ikan idup ?”

“Nama penadai nya deh igat. Enggi aya nuan Pengiran Jurai bisi jala tengang iya siti panjai lima belas depa, lalu siti panjai delapan depa. Enggi kitai nya dia, jala tengang siti panjai dua puloh depa, lalu siti panjai tujoh depa,” ko Aya Rengayong.

“Enti pia, aya uji padah ka aya nyin. Aku pinta ulu ka iya nyala ngiga lubok ka maioh ikan.”

Dia deh bini iya ninga sida deka nyala lalu madah ka diri deka enggau laban enda kala meda orang nyala.

“Enti seduai deka enggau, nama nyalah nya deh ambai wai. Nya alai nengkira meh seduai,” ko Telajan. Udah tembu orang indu beradu sida empat lalu nyau nurun nyala. Datai sida di pendai : “Nya perau ke besai nya kena kitai nyala,” ko Telajan.

Sida lalu ngena perau ke pemadu besai bisi di pendai. Datai sida ba lubok Radai Baya, lalu ditagang iya perau, lalu deka nibar dia.

“Kami enda kala nibar ditu, igat. Sakali suba kami udah nyukat lubok tu ngena tali, bisi lebih dalam dua puloh depa maia ai langkang baka diatu. Kadua agi, baya enggau antu ai selalu ayan ditu. Agi ga ai ditu selalu nyadi. Enti nuan mending ka jako aku, igat, enda ngasoh nuan nibar ditu, enggai ka kitai bulih penusah ngapa.”

“Enti munyi nya badas lubok tu aya. Tentu tu rumah raja ikan. Tentu maioh ikan ditu laban enda kala dijala orang.”

Udah nya disambai iya jala panjai dua puloh depa, jarang sakaki, lalu ditibar ka iya ba puak lubok. Sepi ia jala empai terengkah tating nyau kebenyut laban ikan.

“Apu, bisi amat ikan dalam jala tu aya, tang tu bisi tekait mimit,” ko Telajan. “Enti pia runtun jala nya ulih diri igat. Ila nyeruri. Anang meh nuan nyelam. Ukai main lubok tu igat. Nadai tau nyemerai sida udok sida babi ditu. Baka enseluai berebut ka telu semut orang ngelaban ditu,”

“Baik meh nya aya,” k Telajan. “Tang sida iya tentu ngelala bagi mensia enggau sida udok, sida babi. Dini ka dikumbai iya udok ngapa. Kitu ka kita tiga, tan ka tali jala tu endor aku ngingkas ka tekait. Sayau ka jala enggai ka charik,” ko Telajan.

Angkat Telajan lalu terejun ka ai. Datai iya di baroh din lalu terengkah ba rumah Raja Ikan. “O, nama pejalai nuan Telajan ?” ko Raja Ikan.

“Bisi pejalai meh aku tu Raja. Aku deka beguna ka anembiak nuan nyadi soldadu jaga menoa kami, laban anembiak aku nadai tentu chukop jaga menoa. Nya alai aku beguna ka anembiak nuan, ninga nuan maioh tuboh,” ko Telajan. “O, amat nya igat. Ni ko pinta nuan, meri meh aku tu, igat,” ko Raja Ikan.

“Aku minta orang ke besai sereta kering, aya. Abis kurang sapuloh ribu iko, awak ka aku lalu mulin tuboh, barang ke dibai aku lalu enggau, barang ke enda, tinggal ga meh,” ko Telajan. “Au, pemilih nuan meh igat,” ko Raja Ikan.

Lalu dipilih Telajan dia sida empurau, sida semah ke pemadu besai. Sida ke biak nyau ringat ensepi diri enda kena pilih. “Kita anang ringat, barang maia aku datai baru dudi ila, aku mai kita,” ko Telajan.

Udah Telajan milih samoa ikan ke besai, jala pen nyau penoh laban ikan. Samoa baya ke kena tibar jala dasoh iya pansut magang. Nyadi sida tiga ke nganti di perau, nyau nyabak meda Telajan lama nadai pansut. Nya alai iya dikumbai sida parai dempa baya.

Udah Telajan tembu ngempong jala lalu tanchang iya atas tating enggai ka ikan laboh. Udah nya sepi sida tiga tak berenyut jala. Sida lalu sama megai tali. Peda telajan tak pansut begadai-gadai ari dalam ai, lalu niki ka perau.

“Akai-rai igat, kumbai kami parai nuan tadi, meda lama enda pansut,” ko Aya Pengiran Jurai. “Nyau lama ngutum ikan aku tadi aya. Tambah jala bangat maioh tekait. Nya kabuah aku nyau lama enda pansut.” “Au, lama meh dek tadi igat. Tak berasai endar kami nganti dek enda pansut.”

Udah nya baru Telajan narit jala ari dalam ai. Peda ukai main pemaioh, perau nyau ka karam muak ka luan kena tating ikan. Udah nya lalu isi sida ari ruang timba sampai ka kemudi, perau pen nyau umbas penyarat laban ikan. Sakali nya aja sida nibar lalu pulai. Udah sida nanchang ka perau sida lalu meri ikan siko-siko ngagai anembiak ke penoh pendai meda pemaioh ikan ulih sida pulai nyala. Sida empat lalu nyau niki ka rumah. Udah nya baru mentua iya dua iko nya lalu mupok ngangkut ikan, peda tak lalu enda puri tugong ikan dalam perau. Telajan lalu ngerara sida ngangkut ikan bakanya, enggai ka enda tembu alai hari malam. Dia iya lalu nurun ka perau lalu bejako enggau ikan.

“Kita ikan niki ka rumah bejalai kadiri, aku enda tangkut ka kita.” Tekala nya ikan lalu betekechit niki ka rumah, lalu ngali ka diri ba tikai di tanju. Enda lama iga lalu abis samoa sida niki ari perau ka rumah.

Mentua iya lalu belaboh meruti ikan : “Enti bakatu enda abis ikan tu ditetak samalam tu lagi. Uji nyeliah dulu anang semak tikai tu,” ko Telajan. Iya lalu mansang kia mai latok iya ke dibai ari Panggau suba. Datai iya dia, lalu dilanggup ka iya tikai, lalu dipepat iya enggau tikai-tikai. Sakejap aja peda udah ditetak iya magang samoa ikan. Kerat ikan lalu nyimpan diri ngagai tepayan lalu ngerami diri enggau garam. Sida lalu nyimpan diri dalam empuyong lalu nyalai diri empu di para.

Udah iya netak dibuka iya tikai, perut enggau isi udah bela kediri magang, lalu tikai pen mimit nadai ga charik. Iya udah nemu enggi sida dua pintu nya chukop pemaioh nya alai iya lalu ngasoh samoa ke agi ba tikai nya dibagi sida bukai. Penyampau nya kira bisi empat puloh pikul. Sida sarumah nya dia lalu bebagi ka samoa ikan nya. Samoa orang alit ati meda penyelai utai digaga Telajan.

26. INI MANANG EMPELAI
Tiga bulan Telajan diau ba menoa orang nya. Nya alai lemai siti dia iya empuru ka kaban mentua kaban ipar iya, lalu madah ka diri deka mupok baru ngambi indu siko da, di pemadu langit datas din. Orang nadai jako, nadai jalai nan ka iya, laban sida nemu timpoh antu enggau iya.

Bini iya lalu nengkira ngepan diri ke mindah nitih ka Telajan. Udah tembu makai, tembu indah pagi siti, nya baru Telajan mantai ka sumpit kilat menoa, lalu ditempap iya peda nyadi daun limba limbi. Sida lalu madah ka diri mupok ngagai samoa orang maioh dia. Udah tembu nya baru sida lalu besakai ka daun limba limbi. Sida lalu angkat begadai-gadai ngejang ka nengeri orang nya. Orang maioh pan lalu begau ga meda sida angkat. Tujoh bulan sida terebai baru nimpai menoa orang di ;

Sapak Batu Pirak
Sarang kutak ubat padi
Sapas Batu Mas
Baka paras pasu bebeli.

Bini iya pan lalu dikusok iya nyadi telu manok, lalu disimpan dalam peti gegulin hari.

Nyau datai semak nya peda nengeri pemadu pemesai. Dinga tinchin iya bejako, “Apai, nuan anang enda jimat-jimat angka orang ditu bisi nyaing muting geraji, bisi chendik lelayang lelaki. Uji nuan mantai ka kira raja ngakal mensia, mudi orang . Nuan nurun ditu apai ari ili nengeri orang.” “Au, meh Endu,” ko Telajan. Iya pen lalu nurun lalu terengkah di rumah Ini Empelai dua iko diri menyadi, Ini Nyelutong dua iko bebandong. Tak ditempap iya daun limba limbi nya tadi peda lalu bebali nyadi sumpit baru. Ini Manang pen lalu meda ia ; “O, niki uchu Telajan, niki,” ko Ini Manang.

Telajan pan lalu niki. Tudah Ini Manang nyau nganchau tikai, lalu berapi mega ka iya. Asi pen udah mansau lalu berenah makai ga tudah tuai. Udah badu Telajan makai, dia Ini Manang lalu mantai ka baju ari peti. Gamal Baju nya dipeda baka ka manah, tang enti dipasok ngasoh tuboh jai. Bisi meh nya kedua ngasoh kaki tebu, ngasoh lusong, lalu bisi ngasoh kulit chelum. Udah nya lalu dipasok ka iya baju salambar ngasoh kait, lalu enda tegar bejalai, semadi betungkat. Moa iya lalu bebali chelum, bok lalu nyeregu baka madang resam.

“Apu ini, jai amat gamal aku,” ko Telajan. “En uchu, sigi baka iya nya dah. Uji nuan becheremin.” Iya lalu meda gamal diri ba cheremin. “Engai aku ngena baju tu ini, enti iya mar dibuka.” Ko iya.

Dibuka iya dia peda gamal iya nyau sigat agi ari selama tu. “Oh, ka ga aku Ini, enti bakatu.”

“Dini dek tau enggai deh uchu. Enggai ka dek alah uti laban orang di menoa tu. Laban orang ditu bisi pedas ari kayas ulih ngungki, munoh ari ipoh ngujong jenggi. Lalu nama dek leboh ngena baju tu :

Runggai bejalai ngembing dinding, Runggai gali garing-garing.

Duku enggau peti pen bebali jai magang. Duku nyadi jempul simbang sakali, peti nyadi gari kandi. Iya pen lalu bejalai ngejang ka rumah Ini Manang Empelai. Peda rumah ini Manang tak nyau lesap nadai agi dipeda. Enda bangat jauh iga iya udah ngejang ka nya, alai iya datai ba pendai orang.

27. BEKETAN MANJU
Hari maia nya, orang ka indu mandi lemai. “Apu temuai,” ko anembiak. “Jai bendar gamal temuai nyin deh ibu,” ko sida. Orang maioh nyau takut ngumbai iya antu, lalu rari.

“O, anang rari, igat. Ukai antu aku tu, mensia baka kita nya, tang antu ke ngaga aku jai bakatu,” ko Telajan.

Nyadi dia bisi orang siko penama Beketan Manju, gamal iya chelum sereta lupis kaki sapiak. “Eh, kaban aku nya. Anang kita takut. Mandi dulu unggal. Udah nya sereta aku niki lagi. Nyin pelaboh ujong tanju, enggi aku nyin unggal. Deka ngaga rumah manah, laban enda dapat,” ko Beketan Manju. “Au meh unggal,” ko Runggai

Udah seduai mandi lalu niki. Peda bala jejaga ke jaga jematan pirak ukai mimit. Sida lalu meresa tuboh Runggai takut ka iya bisi mai utai mali. Enti orang nadai kaban dituju, lalu nadai orang jamin, enda tau diau di menoa nya. Tang tudah Runggai tu tadi pama mimit laban bisi Beketan Manju nya jamin iya. Enti enda pia, iya enda diterima orang diau dalam nengeri nya. Niki kenu iya sepi tanah sakayu nengeri nya ada kayak-kayak. Samoa orang lalu begau ngumbai tanah deka runtoh. Semadi iya udah dudok nya baru tanah badu agi begunchang.

“Apu, pama dek tu unggal. Tenu antu dek tu,” ko Beketan Manju. “Ee, bidik dek nemu antu. Sigi ga tanah menoa kita ditu deka begunchang,” ko Runggai. “Aku tu merinsa unggal, nadai pemakai. Makai mulong nya meh tua lagi,” ko Beketan Manju. “Aku bisi mai bekal unggal,” ko Runggai.

Lalu dibantai ka iya berau tujoh leka. “Ni nya unggal, umbas pakai utai nyampau nya,” ko Beketan Manju. “O, maioh nya unggal. Bisi tu empa tua tiga taun,” ko Runggai. Lalu danjong Beketan Manju kebilik, simpan dalam tajau, peda tak lalu meruap. Gaga meh bini iya penama Perentong. Iya lalu berapi.

“Kitai nadai lauk, Manju,” ko bini iya. “Bisi bubu dek unggal ?” ko Runggai. “Bisi meh nya dia unggal. Tan aku lemai kamari, pagi tadi dabas aku nadai bulih utai.” “Uji abas baru lemai tu unggal, bisi iya bulih semah tiga iko,” ko Runggai. “Eh, indah malam deh enda bulih, unggal. Dini nya ka bulih siang hari tu, “ ko Manju “Enda unggal, uji abas ulih nuan,” ko Runggai.

Udah nya nyau meh Beketan Manju ngabas bubu, peda amat bulih tiga iko. Gaga meh iya mai nya pulai. “Bisa amat jako unggal Runggai tu,” ko ati Manju din. Datai di rumah lalu dipandok bini iya. Sida pen lalu berenah makai.

Udah badu makai seduai pen berandau, nanya ka penatai lalu nanya ka pejalai temuai. Dia Telajan-Runggai nya tadi madah ka diri datai ari ;

Tapang undang nyempayang bungkong
Genusi lubang Mabong
Lalu penama bendar iya
Runggai bejalai ngembing dinding
Runggi gali garing-garing.

Runggai lalu nanya ka penama Raja sida di menoa nya, lalu nanya mega sakalika sida dia bisi indu ke pemadu bajik. Beketan Manju lalu nyebut nama raja sida ;

Raja Bengkong Pengumbong Bulan
Bengku Terutu Danan
Anak Dara iya penama ;
Endu Keniung Kandong Padi
Embun Sataun Mali Nawang
Pintu Dinding Hari
Nyingkum Rapit Nadai Meranggang.

“Ko orang badas gamal iya unggal, aku empai kala meda, laban iya diau datas din nyau ka enda dipeda ari baroh tu. Maioh ga orang deka ngayap ngagai iya tang nadai datai din, laban indu nya bangat maioh orang jaga. Ukai berapa ratus jejaga ngintu tangga meligai nya. Lepas jejaga nya ditangkan ka bala remaung tujoh iko, udah nya bala ular, lalu ditangkan ka antu gerasi. Enti orang enda telaban ka sida nya, enda mega tau jadi enggau indu nya. Tambah agi indu nya bisi mimpi, enti oang enda datai ba iya din sigi enda tau ka laki iya. Tang enti bisi orang datai din, jai manah pen jadi ga enggau iya, ko jako apai iya unggal. Aku enda nemu semina ninga orang nusoi iya aja. Enti baka gamal tua tu jauh meh unggal tau ka laki iya,” ko Beketan Manju.

“Amat meh nya unggal,” ko Runggai. “Tang enda jerih ungal, enti tak ulih datai ba iya din pama. Angka Petara nyangkong tua ke jai ti,”

Lapan hari, lapan malam iya udah diau dia lalu enda ngayap. Sakumbang nya tudah Beketan Manju nyau berasai senang ; samoa utai ke nadai nyau bisi magang. Babi, ikan pen nyau bisi, lalu belanja pen bisi ga iya. Lemai hari ka semilan dia iya pinta anjong Beketan Manju ngayap.

“Pinta anjong nuan ngayap aku unggal,” ko Runggai. :Ngayap ngagai indu ni nya unggal ?” ko Manju. “Ngagai indu ke bajik ko dek suba meh unggal,” ko Runggai. “Ngagai anak dara Aya Bengkong.” “Oh, enggai aku nganjong nuan kia, enggai ka aku dibunoh orang,” ko Manju. “Enti dek enggai enda iboh meh unggal,” ko Runggai.

28. ENDU KENIUNG KANDONG PADI
Kira maia tengah malam lalu angkat Telajan mansang ngayap. Datai iya di kaki tangga lalu ditan ka bala jejaga dia. “Enti nuan nadai duit tasih kaki tangga lima ribu ringgit, nuan enda tau niki,” ko jejaga nganu iya.

Tak dikerok iya duit mas lima ribu lalu diberi iya ka bala jejaga dia. Bala jejaga lalu nyumpah iya empa remaung. Datai iya ari atas nya lalu betemu enggau bala jejaga sabengkah agi. Dikerok iya duit mas sapuloh ribu lalu diberi iya ka sida nya.. bala jejaga alit ati meda penjai gamal iya, lalu sida takut meda pemaioh duit iya. Udah abis bala jejaga nya tadi, nyau jauh datas din, nya baru iya besatup enggau bala remaung tujoh iko. Sida nya selalu diberi makai mensia tujoh iko genap taun, lalu kambin tujoh iko genap hari. Mnsang sida tujoh nya lalu deka nerekam Telajan.

“Anang kita nerekam aku, enti kita kaban apai aku Aji Berani tau tenong, Raja Suka Remaung. Kita anang ngelaban aku, nama kita enggai parai,” ko Telajan. Tuai sida lalu ningkap ka diri minta ampun. Nya baru iya nemu Telajan nya kaban sida.

Lepas nya baru Telajan datai ba panggau sarang ular nabau dua iko. Seduai nya lalu merangap ka nyawa deka nelan iya.

“Enti seduai kaban aki aku Raja Nabau ngerarau langit, aki tedong ngelingkong bukit, seduai anang nelan aku ngapa enggai ka seduai mati ila,” Ninga munyi nya seduai nya lalu nundok ka pala diri minta ampun, laban udah saru.

Datai iya semak meligai dia iya meda antu Gerasi dua iko. Seduai nya sigi enda tindok enti malam hari, sigi mengkang jaga berari-ari. Datai Telajan-Runggai semak Antu Gerasi, seduai nya lalu angkat deka nangkap iya. “O, anang seduai nangkap aku, enti seduai kaban aki aku Antu Separu Anya, aki tunggal ngeli sigi saleka-leka.”

“Apu, sapa nuan tu ?” ko Antu Gerasi.

“Aku tu Genuling Tandok Gading
Lelayas Simpai Mas
Apai aku Keling Gerasi Nading
Bujang Berani Kempang.”

“Oh, enti pia uchu kami dua meh nuan deh igat. Nyadi kami dua tu jaga indu dara nya meda iya bajik. Iya sigi nganti kita Panggau datai ngambi iya ka bini, tang enti orang bukai sigi dilaban kami dua, angka orang bukai enda tegaji ka kami dua,”

“Kati berapa gaji seduai deh aki ?” ko Telajan-Runggai. “Nadai ga maioh uchu, kira saribu iko munsoh beri ka kami dua siko-siko.” “Enti pia anang guai beterima seduai diatu aki, laban empai bisi munsoh, nganti sabulan da baru aku ngaji seduai.”

“Pia meh uchu,” ko antu. “Ngayap meh dek uchu. Sigi ungkup dek meh indu nya. Enda iya mudah enggai ka dek uchu. Tu kami dua udah ngasoh dek ngayap.”

Niki meh iya ari nya, lalu datai ba tangga mau, apus tangga nya baru iya datai di pintu meligai. Telajan-Runggai lalu ngelesap ka diri nyadi angin, nya baru iya ulih masok. Datai di bilik, peda iya tampak dipandang orang indu ke tindok dalam kibong. Panggau gantong iya betekijap empa pemanah. Samoa perengka penindok orang indu enda nemu nusoi agi pemanah. Telajan-Runggai pen berasai kesal ati angka orang indu tak enggai ka iya. Iya agi mengkang ngarong diri ngena baju Ini Manang Empelai, tang ati iya arap ka orang indu nya ngelala iya. Iya lalu tama kibong sambong menoa dua puloh serak. Dinga panggal enggau bunsu balong lalu nyerarat madah ka orang indu bisi antu datai ngayap. Tang orang indu enda ninga, laban iya benong tindok jenak. Udah nya Telajan-Runggai lalu ngimbai iya lalu ngerak ; Dani unggal dani. Enti nuan dani, dudok berandau meh tua wai.”

Orang indu ngalih lalu nanya iya ;

“Dini kala ngerayap dada
Dini nyelipan niti lengan
Nyawa ngaba bau sima
Bulu nyeregu asai laja
Kukut ngerantam asai lungga.”

“Nadai ditanya ka nuan unggal ;
Kami di munggu jengku nikal
Kami di Langgar matahari mati
Di Bukit Tibak Tangkal
Laman selampai jelu babi
Penama aku Runggai
Bejalai ngembing dinding
Runggi gali garing-garing.”

Orang indu pen lalu dani, lalu tepeda ka orang lelaki. Iya merening lelaki nya ari kaki sampai ka pala. Iya lalu meda pesabong bunsu baju ke dikena orang lelaki nya. Iya lalu bejako : “ Amat pandai meh nuan tu unggal wai, tang ba jawang orang indu tu ;

Disalam ka nuan rian
Tampak meh bau
Ditungkus nuan abus
Tekebu meh abu
Dibungkus nuan landai
Chechukak meh bulu
Disalam ka nuan
Nemu meh aku.

Nuan tu orang Panggau Ragai
Kededinggai bintih langgai
Kechuai nandang
Orang Panggau Diri, meh nuan tu
Entam kaki kuta begitang
Tentu nuan tu meh unggal
Anang enda nyamai ati
Nuan ka nguji aku,
Penama nuan Telajan Nempap Bukit
Tumpur anchor nyadi emperan
Tedong nyengkong mantok melit
Iko bebelit dalam bulan.
Enti nya ukai penama nuan
Enda patut sakali aku
Dikumbai Indu Bentang Tiang Meligai
Indu Ginti kapala pandai.”

Lalu dichabut iya baju Telajan-Runggai ari puchong pala, lalu dengkah iya ka tisi, peda Telajan nyau gising-gising ketawa, ensepi diri dikelala orang indu. Peda gamal seduai ke bebanding dia siko en enda ga talah ka pangan, laban iya udah ngena baju Ini Nyelutong seduai Ini Empelai.

“Amat pandai meh nuan tu ;

Endu Keniung Kandong Padi
Embun Sataun Mali Mawang
Pintu Dinding Hari
Singkum Rapit Nadai Meranggang,”

ko Telajan nanya indu nya, “Kati nya amat nama nuan wai.”

“Kapa dek nanya, dek ga udah nemu,” ko orang indu.

“Nyadi aku,” ko Telajan. “Tu nuan udah nemu, udah ngelala aku, sampai udah disalam ka aku enda ga alah lalai ka unggal. Diatu aku madah ka mimpi diri. Mimpi aku unggal, asal orang indu ngelala nama aku, iya sigi enda tau enda ambi aku ka bini. Anang dikenang ti iya agi dara, sema udah belaki pan enti indu baka nuan tu sigi aku taban ka meh. Nya alai ambai wai, jauh ga pejalai aku tu udah, lalu empai aku tetemu ka indu sabaka enggau gamal nuan.” Ko Telajan

“Aku pen bakanya meh Telajan,” ko orang indu, “nuan tu meh terubah orang lelaki datai ba penindok aku lalu udah epansa ka bala jejaga tangga meligai. Ke udah tu maioh orang udah nguji tang sida nadai tedatai ka diri ditu, laban sida aki aku Nabau enggau aki aku Antu Gerasi Nising enda nerima sida. Nya alai ti sida udah enda nerima nuan, tentu nuan enda ulih datai ditu. Aku sigi enda tau ngelangkah jako sida nya.”

Udah nya orang indu lalu ngulih ka insap selutu langit, peda asap nyau liat ulih ngetas ari mulut. Dulih ka iya mangkok gegulin matahari, peda nyau besinja gamal, dia iya lalu meri Telajan ngirup macham ai bisa. Nadai utai dikenadai ka, samoa pemakai sedia pansut ari tapa jari kanan orang indu. Orang indu madah ka diri enda nguji iya, laban penguji udah bisi nguan tangga meligai.

“Maia aku udah dara lalu sampai ka diatu, remaung dua iko enggau nabau nya enda tusah diberi makai laban sida iya sigi kenyang belama makai mensia ke bisi nguji diri ngayap ngagai aku. Enda nemu berapa ratus iko mensia udah dempa sida nya. Nya alai nadai kabuah aku nguji nuan agi, laban sida udah enda nganu nuan,” ko orang indu. Udah nya seduai lalu sama gali.

Daun kelapan daun belayar ka nanga Tebas, lapan belas kenyap hari pen tawas. Kira maia manok mengkukok katiga kali dia Telajan pan madah ka diri pulai.

“Aku pulai ambai, tang aku minta tinchin indai empulu lilin.” Lalu disua ka orang indu idong nempuah lalu.

“Aku minta ubong wai indai burong tiong,” Lalu disua ka orang ke indu jungkal mulut tusu. Udah nya lalu dipasok ka iya baju Ini Empelai, iya lalu bebali jai. Iya lalu nyau nurun tangga meligai. Datai ba antu Gerasi gaga mega seduai nya meda iya gali ba orang indu. Lalu pia mega Nabau enggau kaban bala Remaung bela ensium iya madah ka pengaga diri, lalu bakanya ga bala jejaga sereta nabi iya. Sida takut magang meda iya pulai gerai nyamai nadai satu apa. Sida nemu iya sigi orang pugu berani. Datai iya di baroh, empai tentu tawas hari, iya lalu tama ngagai pelaboh Beketan Manju. Pansut Beketan Manju ari bilik lalu sedekan ensium bau minyak enggau bau bangkit penindok orang indu. “Apu, ngayap dek demalam unggal ?” ko Manju.

“Enda unggal,” ko saut Telajan. “Dipelaba aku tentu ngayap dek unggal. Enda kala aku ensium utai bangat ngemanah tu bau,” ko Beketan Manju.

Udah badu seduai berandau ka utai nya dia iya ngasoh Beketan Manju ngabas bubu. Datai Beketan Manju ba tampon bubu, peda iya penoh laban semah bulih dua puloh iko. Nyau umbas bai iya pulai. Datai di rumah lalu gaga meh bini Manju mela ikan semah. Tudah Beketan Manju tak nyau berasai nyamai diau sekumbang Runggai udah datai dia. Samoa utai diketengok ka iya tak bisi magang. Seduai melaki-bini siru bendar enggau tudah Runggai.

29. BUJANG LENGGANG TEMAGA
Kira lima malam iya udah ngayap ngagai indu meligai lalu hari siti maia hari tengah ngalih dinga beguru langit sapiak laban rauh utai. Orang lalu pansut katanju ngumbai nya guru hari jai. Datai di tanju nadai ga mea moa hari. Dinga sida rauh utai nya mansang semak-sasemak. Udah nya tinchin Telajan lalu bejako madah ka nya daun limba limbi ;

Bujang Lenggang Temaga
Nili ka Berani Ati
Numbang ka menoa
Nya orang mangkang
Gerugu Langit Mit
Anak Tuai Raja Lumut.

Enda lama udah nya dinga daun limba limbi nya pen sangkai di padang besai. Orang lalu ngandak penatai anak temuai nya. Temuai nya pen lalu niki ka rumah, iya lalu dudok ba ruai Aya Bengkong. Udah makai lemai nya, temuai lalu ngasoh Aya Bengkong empuru ka orang maioh. Iya lalu madah ka diri deka nanya anak dara Aya Bengkong. Apai indai indu lalu nyaut madah ka diri nerima jako orang lelaki, tang sida agi bepanggai ba orang indu empu. Udah nya indai iya lalu mukol tali kangau ngagai meligai orang indu madah ka apai iya udah nerima jako orang lelaki ke datai ari sungai Gerugu Langit, penama iya BUjang Lenggang Temaga. Orang lelaki nya sigi patut ka laki anak dara iya nya.

Dia anak dara iya lalu nyaut : “Aku indai udah bisi lelaki temu aku empu. Aku enda nerima lelaki ko kita nya, laban aku udah bisi laki. Tang aku empai madah ka kita ngelamatu. Nya kabuah aku enda nerima Bujang Lenggang Temaga. Jai badas pen iya ke enggau aku dulu betemu nya ga ambi aku ka laki.”

Pansut indai iya ari bilik lalu madah ka anak iya enda nerima jako Lenggang Temaga, laban iya udah bisi lelaki siko ke udah diterima iya. Ninga nya apai indu lalu ngenong laban iya enda nemu anak iya udah bisi orang ngayap. Iya lalu ngasoh orang nanya ngagai kepala jejaga tangga meligai. Kepala jejaga nya madah ka anak temuai ba Beketan Manju bisi ngayap katas ngelamatu. Ninga pesan munyi nya, apai indu nadai jako, laban nya sigi anak asi iya, jai badas pen sigi peneka ati iya empu. Lalu pikir ati iya enda patut Runggai nya datai ba penindok orang indu, enti iya nadai kekira, laban iya nemu maioh penusah nengah tangga meligai. Tang orang bukai sayau magang ka indu nya jadi enggau Runggai, laban gamal iya bangat jai.

Nyau kelama, nya baru Aya Bengkong nyaut ; “Enti nuan deka ngabas pengamat jako, tau ga igat ngayap katas angka sida Endu deka, enti udah meda nuan.” “Au, badas meh nya Aya,” ko Anak temuai.

Malam nya iya pen lalu ngayap. Datai di tangga meligai dia iya lalu ditagang bala jejaga, tang iya madah ka diri dasoh Aya Bengkong. Nya baru jejaga ngasoh iya niki katas. Datai iya ba panggau bala remaung lalu angkat bala sida deka nerekam iya, lalu disintak iya pedang. Pantap iya dia remaung tang enda masok, pantap iya enda ga telih. Udah nya angkat bala remaung sereta tujoh iko sama ngetup, sama ngeramak iya, peda abis rajai moa, rajai dada, belakang iya digasak bala remaung. Ensepi bangat enda alah laban bakanya, dia iya lalu nyau nikal baru pulai ka baroh. Enda meh ga iya nyadi ngayap malam nya, tang tudah Runggai ngayap mega baka selama.

Pagi nya Bujang Lenggang Temaga ngasoh orang madah ka Runggai laban iya mai baum bepekit. Datai Runggai dia ; “Nadai aum bukai tua tu unggal, laban tua berebut ka indu siko nya. Nya alai aku mai nuan bepekit. Sapa tua alah enda empu bini,” pia ko Bujang Lenggang Temaga.

“Aku nadai penegar unggal, sereta gamal amat jai, iya ga enda tentu dapat. Tang nuan mai bepekit, semadi nurut ka bai pangan meh tu unggal. Enti nunda ka ati tu tak enggai mega ngelaban nuan,” ko Runggai.

“Aku mai nuan bepatis unggal,” ko Bujang Lenggang Temaga. :Lalu ditan iya dia betis. “Enda pia unggal, nuan dulu matis aku. Nuan ga dulu mai bepatis,” ko Runggai ga. Lalu ditanam Runggai betis iya, lalu dipatis Bujang Lenggang Temaga. Patis enda ulih, jamah enda alah. Udah nya Runggai ga malas matis. Patis iya dia peda patah betis kanan Bujang Temaga, patis iya baru peda patah ga betis kiba. Dinga iya nyau rauh-rauh madah ka diri pedis ;

“Badu agi unggal, badu,” ko Bujang Temaga. Meda bakanya lalu dunsut Runggai enggau tai manok lintong. Nya baru betis Bujang Temaga nya betampong baru, tang deh lalu sampai ka diatu agi ga betis iya nya bau tai manok lintong.

Udah nya iya mai Runggai bepancha, batak lampong. Tang iya alah berari-ari laban Runggai. Udah nya iya mai nunu ai. Nunu ai pen alah mega iya laban Runggai. Pengabis pekit seduai dia iya mai Runggai naji bekuta besi, nyabong bekuta betong.

“Nya alai pagila unggal, tua naji bekuta besi, nyabong bekuta betong. Sabarang sapa tua alah enda ngempu bini,” ko Bujang Lenggang Temaga.

“Au meh unggal, pemai nuan, tang aku minta nuan betesau bala kulu kili. Enti mina kadiri tua enda tentu nyamai iga nengali bunoh. Asai ka agi mekang meh nuan unggal ti baka ke udah ngelaban aku tadi,” pia ko Runggai. Tak lalu dikauk iya pasir sapuloh pasu pasok delapan . “Mesa pasir tu meh unggal pemaioh bala bai nuan baru nuan unggal tau ngelaban aku,” ko Runggai.

Peda tudah Bujang Lenggang Temaga nyau lubah ngambi pasir dikena iya nesau bala. Hari siti iya pulai mai pasir sapuloh pasu. Datai di rumah iya empu lalu belaboh betesau.

Betesau kenu iya sabulan-bulan
Sataun-taun nya, selama-lama iya
Lalu datai si Senganjar
Langgar matahari mati.
Orang di Perentong
Tinggang tambong embawang ngeledi,
Menoa Laja Inda Bekia
Apai Tali Sentagi Nanit
Dipit Kumang Gelemang Langit
Mentua Bujang Sampang Jawa
Segemba Gembi
Bediri di gelamit ubong benang
Sigi Seberu Hari
Tata bunyi guntor betinggang
Bujang berani ati
Ngerentap ka nengeri
Ngeruboh menoa orang.

Menoa tasik abis dipadah, menoa langit pan abis ga dipadah ka iya. Nya alai lima taun Bujang Lenggang Temaga betesau baru pasir abis, nya baru iya pulai lalu betimpoh hari enggau samoa orang ke udah ditesau iya. Udah iya datai di rumah, timpoh pen udah datai ga, bala pengayau pen nyau nuntong ga nguang padah iya. Hari siti sida lalu terebai ngena daun limba limbi. Peda lindap menoa laban daun limba limbi sida empa pemaioh bala pengayau.

Diatu kitai ngenang Telajan ke diau di meligai kirai orang indu. Iya lalu jadi mega enggau orang indu nya, tang karong iya empai dibuka, semadi leboh tindok malam aja baru iya muka. Tindok iya malam siti lalu bisi mimpi. Mimpi diperaka Ini Langau Lanchong, lalu dicharik ka iya di kain, udah nya ganti iya baru.

Ini Langau Lanchong lalu bejako : “Jaga dek uchu. Pagila datai bala Bujang Lenggang Temaga. Maioh amat uchu bala iya. Bisi meh sida iya pukang indu jelu, bisi badak indu chemaru. Angka tepantup meh tetengok nuan serak tu uchu. Dani nuan uchu. Mimpi nuan tu,” ko Ini Langau Lanchong.

Telajan pen dani lalu mensugau angkat. Meda iya bakanya lalu ditempap bini iya jari. Tak lalu pansut pedera tujoh kali lima kena iya nanya laki iya. Udah iya makai lalu pedara baru. Nya baru iya madah ; “Dinga nuan ambai wai tuju bangkai, bini ketuju ati. Saharitu lagi datai meh bala Bujang Lenggang Temaga. Bisi nyaing meh orang dibai iya muting geraji, bisi tajam ari bulan mata besi,” ko Telajan.

Benong iya agi berandau enggau bisi iya dinga menoa nyau munyi ka runtoh ditujah daun limba limbi dikena bala Bujang Lenggang Temaga. Enda lama udah nya peda nyau sangkai di tengah padang. Tak penoh padang besai alai sida sangkai. Peda bala munsoh enda anchi pemaioh, enda ulih itong sula dabong jarang, enda ulih telah enggau dilah baroh rang.

Dinga nyawa Bujang Lenggang Temaga ada kalau-kalau ngangau ka Telajan ari padang besai. “Ni nuan saum ! Nurun nuan saum ! Umbas meh diatu ! Udah datai meh aku tu saum wai,”

“Lubah meh saum wai. Lama kepayang meh kelampai, lama laun kitai meh. Enda ulih dikenggai,” pia ko Telajan. Nya baru ada dikesai ka iya karong. Peda pengering gamal iya enda nemu ko nyebut agi. Tak nyau rentu-rentu meh gamal iya dia. Nya baru ada :

Ditangkin iya belading unding
Simbing penulang
Dajap tajam penyapan randang
Nyabur chudor pengundor
Rantu darah langkang
Tangkin iya mega
Pedang Tangga Sabayan
Peda geguchor turun darah
Nya baru pasok ka iya
Gagong kulit kijang langit
Bulu sabit nansang ka belakang
Gagong kulit remaung
Nyawa negong di moa lubang
Nya baru tangkup ka iya
Ketapu linga lingu
Ujak bulu belajau lelang
Lalu disan iya
Enteran banang tunsang
Japai iya terabai
Simbang di punggang
Nya baru iya nurun
Lalu manjong Telajan kalau-kalau
Nengkais dudi dulau
Laboh bulan naban ka pandau
Runtoh langit mesai langkau
Tusor bukit nyadi danau
Lalu bedidit meh panjong iya
Ngilah langit lebih ari bulan
Tak berebigi meh panjong ka alam ai
Ngilah kerangan
Bedigah ka alam tanah
Ngilah sabayan.

Ada mengkechit meh Telajan ngagai padang besai ;
“Sambut aku saum, sambut. Ngadang nuan unggal, ngadang.

Tu aku Telajan meh tu nempap bukit
Tumpor anchor nyadi emperan
Tedong nyengkong mantok melit
Iko bebelit dalam bulan.”

Lalu ngenchanang meh Telajan baka lang nyanggai manok, lalu ngelantar baka ular ka mantok.

Tiga kali besundang Telajan ngabong tembong bala orang, nepan atas angin. Ka empat iya berundang, baru iya terejun ba padang besai, sereta disambut bala munsoh enggau sangkoh. Empai iya terengkah di tanah dulu iya bejalai nengah jerungkang mata sangkoh. Lepas nya iya nyintak nyabur lalu nepan di punjong pala munsoh. Nya baru iya ngasak ka bala sida.

Lalu dansak iya kulu
Bulih sapuntang malu nuba
Gasak iya kili
Bulih sapuntang bujang nyala
Ansak iya ka ai.
Ngagai reni raja baya
Lalu barang ke bebaju besi
Tikau ka lubok dalam enam.
Barang ke tinggi
Kait ka iya di puchok
Galau perawan
Barang ke paga
Entak ka di tanah ngalan
Pantap kanan dua puloh lapan
Tuju moa tiga puloh tiga
Ka belakang enda ulih bilang
Jarang sejarang lantai para
Penyalai ikan igi rian.
Munsoh maioh midang
Lela baka padi mati nawang belayan
Lalu digasak ka iya dia
Tawas hari belaban
Malam hari diau
Lapan hari, lapan malam
Baru munsoh bukai abis
Semina orang ke pugu berani
Tujoh iko aja agi bedau tinggal.
Sida nya penama ;

Bujang Lenggang Temaga.
Pedang Limbi
Jayum Tom Menoa
Rengayong Tutong Nengeri
Manggi Berani Ati
Ribut Nyepu Begulang Galu, Numpor ka Batu Gerugu Langit
Enggau siko agi penama ;
Bujang Sampang Jawa

Dulu mega Bujang Lenggang Temaga, Pedang Limbi enggau Jayum Tom Menoa belaban enggau Telajan. Tak mengkechit meh Telajan dulu ka rumah lalu mansut ka samoa bini iya ngambi sida meda pemaioh munsoh ke udah parai, sereta mega meda iya ngelaban orang pugu berani, sereta kebal. Udah nya ada betitir meh sida empat, munsoh tiga iko, lalu Telajan siko ngelaban sida. Ditumbok sida tiga Telajan dinga tak semetik munyi ka numbok tekang besi. Peda sangkoh sida tiga bekilong. Telajan pen lalu malas. Sida sama enda tulih ka pangan.

Lalu bepantap ngijap bubu
Betumbok belaboh alu
Ensepi betumbok enda ulih
Dipantap enggai telih.

Lalu tekala nya Telajan ngeleka ka senyata iya lalu digerempong ka iya kaki sida tiga lalu dipeling ka iya nengah gerugu langit. Pangka iya ka kiba, pangka ka iya ka kanan. Mansa batu pangka ka di batu, mansa bukit empas ka di bukit. Dinga nyau rangau-rangau sida tiga madah ka diri parai. “Badu agi unggal, badu agi. Parai meh kami tiga tu, unggal.”

Udah nya lalu dipangka ka Telajan ba tekang batu besi. Peda dilah sida tiga sama nyau melulor. Pala pen pechah ga. Sida tiga lalu parai dia.

Udah nya lalu ditikam ka bala bini iya asi enam kempok, ilum pinang enam iti, insap enam batang. Udah Telajan makai samoa utai nya, iya pen nyau kering baru. Udah alah sida tiga nya tadi, angkat mega tuboh tiga baru ngelaban iya. Sida tiga nya, Ribut Nyepu; Rengayong Tutong Nengeri ; enggau Manggi Berani Ati. Sida nya diri menyadi, endang orang mangkang menoa panchor langit.

Ada mengkechit meh sida tiga, enda chechamang lalu mantap sereta numbok enda beselada, tang Telajan mina nat ka pantap sida dulu. Peda duku enggau sangkoh sida sama nadai tulih ka iya. Udah nya malas mega Telajan lalu digasak iya sida tiga nya, enda ga ulih. Udah nya lalu dipasong sida enggau jala bok. Tak pansut meh guntin menoa Telajan dinga tak gemerik munyi ka ngempat kain. Angkat Telajan ari nya lalu nangkap sida tiga nya lalu dipeling ka iya nengah tisi langit, lalu dipangka ka iya ba batu. Tumpor mega batu, dipangka ka iya ba bukit tusor ga bukit. Lalu bejamah meh sida empat dia, langit pen nyau berenyang-renyang, menoa nyau guyang-guyang, bedau ga sida nadai ruji. Udah nya sida lalu ngetu, lalu nikau ka lunju mali lebu, terengkah mali salah.

“Jaga nuan unggal,” ko sida tiga. “Tengkadah dulu langit. Enda mudah meh lunju mali lebu, terengkah mali salah kami nya unggal.” “Nadai ko meh unggal, enti aku parai, kati ko enggau.”

Dinga tak rengong-rengong munyi lunju nurun ari langit. “Ngadang nuan unggal. Nya lunju kami tiga ka datai.” “Au meh unggal.” Ko Telajan.

Tak datai meh lunju, peda ada ngentak tungku tiga nisi tuboh iya. “Udah nuan unggal,” ko sida tiga.

“Salah unggal bedau aku tu,” ko Telajan. “Uji aku mega unggal nikau ka lunju aku mali lebu, terengkah mali salah.”

Lalu dulih ka Telajan sumpit kilat menoa. Dinga tak gemetar belah langit sapiak tumpu penyaris munyi sumpit nya terebai. Tak munggang baru ga sumpit nya ka tanah, dinga dunya munyi ka charik.

“Ngadang kita unggal,” ko Telajan. “Au meh unggal,” ko sida tiga sereta nyaut. Sumpit pen datai nutok pala siko pansut ari nya lalu nutok siko, pansut ari nya ngembal ka siko ga da. Dinga panjong sida tiga ada betekalau madah ka diri parai.

“Apu, pama amat meh orang tu,” ko Ati Bujang Sampang Jawa, Gebimbi bediri di gelamit ubong benang. Lalu ati iya din tak nyilu mimit mega ngelaban orang nya. Tak manjong meh kenu iya dia. Telajan sama manjong, dinga panjong seduai sabaka penyaris, sama bedidit ka langit ngilah bulan, sama bedigah ka tanah ngilah sabayan. Lama seduai bayam pangan. Telajan irau mimit ati meda gaya orang nya, tak nadai besibil sakali sigi baka orang Panggau Libau. Pengering seduai sabaka, penyigat pen sama ; Datai ka sintai sirat pen sabaka. Ka enda ngelaban iya laban iya sigi tanah munsoh. Dinga bala bini Telajan bejako enggau pangan diri ;

“Adoh saum wai ! Sabaka meh gamal munsoh nyin saum enggau ambai kitai ka tuju bangkai, enggau laki kitai ka tuju ati. Kati dini meh menoa munsoh nya deh saum, wai. Sayau amat meh lelaki nya saum, enti iya lesi ngelanggah hari, enti iya sulai lagi saum, ngelanggah lemai.”

Nyau besatup mega seduai iya ;
Pantap seduai bela penyampat
Betumbok seduai bela pengelanchat
Bepantap pen sama enggai telih
Betumbok bela enda ulih.

Leka ka nya lalu ngentak ka diri ga Telajan nyadi remaung, munsoh siko nya sama nyadi remaung. Lalu berekak mega seduai dia enda ga talah ka pangan. Udah nya ngentak ka diri baru Telajan lalu nyadi nabau ngerarau langit, nyadi tedong ngelingkong bukit. Siko nya pen lalu bakanya ga, lalu bebelit bepantok seduai iya dia begiling idas. Bukit abis tumpor menoa abis anchor endor seduai belaban. Ngentak ka diri ga Telajan lalu nyadi mensia baru. Siko nya pan lalu bakanya ga.

Dinga menoa nyau rentum-rentum
Dunya degum-degum
Langit berenyang-renyang
Menoa guyang-guyang
Nyau sabulan nandan di langit
Sataun nampan di bukit
Seduai iya belaban.

Nyau kapuas-puas datai di selungkong langit gadong, menoa Engga Satangga Tali, Bujang Kemping Padi, lalu ninga mega indai iya, Dayang Sapat, lalu ninjau ari Tom Indu Benda, Kelawah Besai Moa. Dia iya meda Telajan belaban enggau Bujang Sampang Jawa. Iya lalu madah ka laki iya ngasoh ngerara seduai nya. “Nama kabuah seduai nya bangat bejamah ngudu nya.” Pia ko iya.

Lalu angkat Kemping Padi, mengkechit datai din, lalu diselepak iya di tengah. “Badu, anak badu. Nama utai dipelaya ka seduai anak wai ?” “Apu, dek apai. Sapa meh iya tu deh apai wai ?” ko Telajan. “O, anak wai. Tu aka nuan, Bujang Sampang Jawa, Gebimbi Bediri di gelamit ubong benang.”

“O, enti pia apai, saru meh kami dua aka. Enda ngutok meh nya bangat liat dilaban aku. Seninjik duku emperaja nyengkong aku enda ulih sintak. Bebadi nuan tadi aka, enti duku nya ulih sintak. Enti apai empai datai ngerara tua, tentu parai nuan aka, laban duku nya.” Ko Telajan.

“Au meh adi, aku pen enda meh tan enti orang ngelaban aku ngena duku nya.”

Seduai iya lalu beberap gaga ka pangan diri, lalu sama niki nitih ka apai seduai iya Kemping Padi. Datai di rumah dia apai iya lalu ngerak Menteri Manggau ka bekubau nengan langit. Lalu dibai iya tukol kena iya ngerak Menteri Manggau. Tujoh kali iya malu tungkol idong, baru iya dani.

“Nama kabuah nuan ngerak aku deh apai wai ?” “Bisi anak, bisi kabuah, laban menyadi nuan dua iko bisi datai. Nya kabuah aku ngerak nyan.”

Angkat Menteri Manggau ari penindok iya, lalu mengkechit terengkah di bukit seberai, mengkechit baru, nya baru iya terengkah di tanju rumah sida empu. Sepi rumah asai ka tungkup ditepan iya. Tama iya ka baroh lalu betemu enggau Telajan seduai Sampang Jawa. Iya lalu nanya ka pejalai seduai nya. Seduai madah ka penyaru diri bebunoh kena sabong orang. Kategal enda ngelala menyadi diri empu di menoa orang ;

Di Sapak batu pirak, Sarang kutak ubat padi
Di Sapas batu mas, Baka paras pasu bebeli.

“Amat salah bendar seduai adi, nasit seduai nyau datai ditu, sida indai bisi ngelala seduai. Enti enda mansa tu tentu agi seduai belaban. Tang badas nya adi, ngambi kitai udah nemu ngasai ka belaban enggau diri madi. Seduai mega udah ngasai ka ngelaban orang bukai.”

Samalam-malam nya seduai dia, lalu sida maioh randau bukai. Aka seduai iya Menteri Manggau meri maioh macham ajar bukai enggai ka sida agi saru ka pangan diri ka diau di maioh bengkah menoa. Lalu iya mega bisi ngenang menoa Mabong Kenujong Tujoh ;

“Peda aku adi,” ko iya “Nadai nengeri rami agi ari nengeri Mabong Kenunjong Tujoh, nya orang mangkang Batang Panggau Langit, lalu ngembuan pun Kayu Bangkit, Batang Purang Kunyit. Nya meh adi, menoa ke rami udah dipeda aku. Tang enti aku diau di Panggau Libau, baka seduai sigi aku taban ka Batang Kayu Bangkit nya, adi,” ko Menteri Manggau.

Telajan seduai Sampang Jawa sama enda nyaut mina mending ka ajar iya aja. Nyau hari siti, udah makai, udah samoa lalu ajar apai seduai iya Kemping Padi pan udah ga abis, Telajan pen madah ka diri deka mupok mulai ka diri ; “Kami dua aka tu deka mupok mulai ka diri ngagai ;

Sapak Batu Pirak, Sarang kutak ubat Padi,

Enggai ka dikumbai bala bini aku din parai. Kadua agi aku wai, aku madah ka seduai apai, pemulai ari tu ila angka aku nyau ka mutar ka diri pulai ka Batang Panggau, laban dua puloh taun tu aku udah ngejang ka menoa kitai. Sigi udah semaia enggau sida apai udah abis timpoh aku ke bejalai ngiga orang indu, aku enda tau enda pulai,”

“Nadai ko meh adi. Enti seduai nyau ka pulai tang enti pulai ka Panggau seduai anang betinggal ka pangan diri, enggai ka agi maioh ulah di menoa orang.”

Udah nya lalu dibatak Telajan sumpit kilat menoa, lalu ditempap iya peda tak nyadi singa nyanggai, daun terebai. Seduai lalu betabi enggau Menteri Manggau seduai apai seduai iya Engga Satangga Tali, Kemping Padi sereta enggau indai seduai iya mega, Dayang Sapat, indai Menteri Manggau.

Pengudah nya seduai nepan di daun limba limbi lalu nyau. Terebai meh seduai enda berasai, lalu ninjau menoa Aya Bengkong, Pengumbong Bulan, Bengku Terutu Danan. Enda lama udah nya alai seduai sangkai ba tugong bangkai munsoh. Terejun seduai dia lalu ngidup ka munsoh ke sigi pugu berani. Dunsai Telajan enggau ai ubat penampong seput, lalu dani magang meh sida Bujang Lenggang Temaga, sida Ribut Nyepu; Pedang Limbi; Rengayong Tutong Nengeri; Manggi Berani Ati enggau Jayum Tom Menoa. “Apu, unggal, wai,” ko sida. “Kapa nuan ngerak kami tindok jenak, ngenani ka kami tindok bemimpi.”

“O, unggal wai, ukai tindok meh kita unggal. Parai nyah kita ngelanggah lemai, lesi ngelanggah hari. Alah bunoh ngelaban aku meh kita unggal.”

“O, amat meh nya unggal. Badu meh kami tu unggal ngelaban nuan. Udah alah meh kami tu unggal wai.” Ko sida.

Angkat tudah Bujang Lenggang Temaga lalu minta ampun ngagai Telajan. “Kati sapa unggal siko nya deh ? ko sida.

“Tu menyadi aku ketuai, Bujang Sampang Jawa. Kami dua bebunoh disabong nuan unggal, laban iya kena ambi nuan ngelaban aku. Tang apai kami dua Kemping Padi ngelala, lalu ngerara, nya kabuah aku lalu ngelala madi diri empu. Tang enti kita agi deka tau ga unggal.” Ko Telajan.

“Anang nyebut nya agi unggal, tang deka enda, nguji ngapa meh ngelaban kita orang Panggau, unggal. Ti bakatu sigi enda alah laban kami meh kita Panggau, unggal. Tang ti menoa bukai tau ga kami dipanggil nuan ambi ka bala nuan, angka sema nuan ngayau jemah ila.”

“Nama kabuah enda madah ka kita deh unggal, enti kita pinta padah ka kami,” ko Telajan.

Udah nya Telajan lalu ngidup ka sapuloh iko ba tiap nengeri enggai ka nadai mai berita pulai ka menoa diri empu. Lalu dikangau ka iya Antu Gerasi ke jaga tangga meligai dasoh iya makai bangkai munsoh. Udah nya iya ngangau ko iya ; “Ni nuan aki aku Antu Separu Anya, Aki Satunggal Ngeli Sigi Saleka-leka. Kitu ka meh nuan aki, maioh meh bangkai munsoh ditu aki.”

Dinga ada berenyang menoa, laban penatai aki Antu Separu Anya. Datai dia enda chechamang ada ngulam mengulam bangkai munsoh. Enda lama peda nyau tawas padang, darah abis meh didilat iya. Dinga nyau madah ka diri pulai ; “Pulai aku uchu Telajan. Kenyang amat meh aku tu ucho.”

Bala sida Bujang Lenggang Temaga pan madah ka diri pulai. “Mupok meh kami unggal. Nuan meh wai ngetau padi, aku ngetau jambi. Nuan meh empu bini, awak ka aku buya nimpai. Nyau meh kami tu unggal,” ko sida. “Nadai ko enggau meh unggal,” ko Telajan.

Lalu samoa munsoh ke udah idup baru nya pulai magang. Pengudah nya baru seduai belator deka niki. Samoa piring alu sigi udah disedia ka orang di pala tangga, Babi belang ke besai udah dengkah di kaki tangga, lalu di pala tangga siko ga babi. Daai seduai di kaki tangga lalu digayang seduai ga babi. Udah nya Telajan datai di tengan tangga, ari nya iya nikau ka antu pala, lapan belas igi, lalu ditikau ka iya enggau jari kanan, sambut bini iya enggau jari kanan ga. Tikau ka iya enggau jari kiba, sambut bini iya enggau kiba. Tikau ka iya enggau kaki, sambut bini iya enggau kaki. Maioh macham mega jalai iya nikau ka antu pala dia nguji bini iya enam iko nya, lalu disambut bala bini iya nunda tikau iya ngagai sida. Udah abis antu pala nya baru seduai niki, datai di pala tangga lalu ngayang babi siko ga dia, mentua iya pen miau iya enggau manok labang, bala bini lalu nabor enggau letup sereta ngiri ka ai tuak. Udah nya seduai lalu dasoh orang dudok ba ruai Aya Bengkong. Chukop mega gaya mentua iya masa seduai iya.

Orang indu pan lalu belaboh naku antu pala. Tiga hari udah nya baru orang niri ka gawai Ngalu Antu pala. Lapan hari udah nya baru orang niri ka Gawai Enchaboh Arong. Samoa mensia di sakayu menoa nya dambi magang ngagai gawai nya. Tujoh hari ga udah nya lalu ditampong enggau pengawa melah pinang Telajan seduai Endu Keniung Kandong Padi, Embun Sataun Mali Nawang, Pintu Dinding Hari, Singkum Rapit Nadai Meranggang. Tujoh hari tujoh malam ga orang mengkang ngirup, makai dia. Sereta maioh main bukai mega dibuka orang dia. Nya alai sabulan-bulan nya orang agi mengkang rami, laban Aya Bengkong bangat pemadu pengaga bemenantu ka orang Panggau sereta pugu berani. Sida lantang ati laban nemu munsoh ari menoa bukai nadai berani ngachau sida, laban sida bisi manok sabong pemadu kering.

Pengudah lepas samoa pengawa nya, baru Bujang Sampang Jawa madah ka diri deka pulai ka Selukong Langit Gadong, baka Tempurong Layak Tanggi, Sapar Langit Luar Pandang sanjar matahari mati, menoa Anting Nyaing besumping tulang, Rerikut nangkin rajut gigi genali. Laban bini iya tiga iko bedau nganti iya. Penama bini iya, siko nya ;

Sudan Jejambam Bulan, Gemala Dunya. Lalu siko
Endu Kantok Bunga Buan, Dara Gemala Telu Bulan. Lalu siko agi iya nya ;
Endu Sendi Langit baka ka ngulit ngenang Dara tampak rita rega nengeri Batang Rajang.

“Nyadi aku wai empai pulai ka menoa kitai ka Batang Panggau, angka sapuloh taun da baru aku pulai, menoa kitai jaga manah ka ulih kita. Seduai Mabong badas-badas ka enti leboh orang bisi nguji ngalah ka kitai. Kita tau nutong ngagai kami dua aka tua Maja Singka Langit ke bedau mukat lubang gemala di tisi langit nyulor din.”

“Au meh aka, ko ati din mai nuan sereta pulai, tang enti nuan empai, nadai ko meh aka. Tang enti utai bisi ngawa nuan, anang enda manggil kami dua aka nuan Mabong meh nuan aka,” ko Telajan. “Pia meh adi,” ko Sampang Jawa.

Iya lalu madah ka diri mupok ngagai samoa orang maioh dalam nengeri nya. Enda nyamai mega ati samoa sida kena tinggal ka iya, laban maioh mega sida ka dara sigi udah masai iya. Iya lalu nyau terebai ngena daun limba limbun.

Kira enam bulan Telajan diau di menoa nya udah tinggal aka iya Sampang Jawa nya tadi. Apin ia angkat dulu iya ngajar sida di menoa nya jalai pengawa. Sida mentua iya berasai lantang, senang sakumbang iya bisi dia, laban utai ulih mudah, ulih gerah magang. Nyadi Telajan bisi ipar lelaki siko penama Bujang Limbang Berani, lalu ngajar ipar iya nya tadi macham kereja baka ke enggau menyadi iya empu.

Samoa pengaroh dibagi iya enggau ipar nya tadi, sampai ka liur iya pen diberi iya ngagai ipar, ngambi ka jako siko nya ngasi baka jako orang Panggau. Tinchin pengajih pen dibagi ka iya siti, sereta enggau nyabur, sangkoh enggau terabai ngambi ka ipar iya tau nan ka menoa diri ari langgar munsoh.

Iya lalu mangkat Beketan Manju ngasoh iya nyadi lumor dua kepala Menteri Perang di menoa nya. Gamal tudah Manju pan bebali sigat enda agi jai baka ke udah tu. Bini iya pan bajik baka indu meligai bukai di menoa nya. Pengaroh Telajan pan bisi ga diberi iya ngagai Beketan Manju seduai bini iya ngambi ka seduai bulih mudah bulih gerah. Pemadu pengaga mega ati Beketan meda diri nyau kering, sigat baka orang maioh tu. Lalu nama iya digelar orang : Beketan Mali Balang, Manju Mali Lebu.

Udah Telajan meri kuasa ngagai seduai nya, lemai siti dia iya empuru ka samoa orang sakayu nengeri nya ngagai Astana mentua iya. Dia iya nerang ka ngagai orang maioh madah ka Bujang Limbang Berani seduai Manju Mali Lebu Beketan Mali Balang udah dipadu ka mangku pengawa kepala menteri penyaga menoa. Iya lalu ngasoh sida di menoa nya arap sereta ngasi ka seduai nya, laban samoa macham ajar udah chukop diberi iya ka seduai. Udah nya Telajan madah ka diri deka pulai ka Batang Panggau, laban iya bangat lama udah ninggal ka menoa diri. Orang maioh madah ka diri asa bendar ati deka begulai lama enggau iya.

Tiga hari udah bekau nya orang lalu empuru baru deka ngila ka sida iya angkat. Betugong meh orang dia baka lempaung ngambong ka batang, empuru baka tematu buah bindang. Orang lalu besampi minta berekat awak ka sida ke tinggal dia tau bulih mudah bulih gerah baka iya empu.

Pengudah nya Telajan lalu mantai ka sumpit Kilat Menoa lalu ditempap iya peda nyadi daun limba limbi. Iya lalu ngasoh bala bini iya nepan. “Ni kita ambai. Nepan magang meh kita, ambai wai,” ko iya.

30. MABONG LANGIT
Udah lepas nya baru sida angkat begadai-gadai lalu meling nengeri nya lapan kali besundang. Pengudah nya ga baru sida iya ;

Ngunjam ka langit dalam
Baka gam batu galang
Baru nuju ka langit biru
Baka bichu rumah sambaing.
Dinga tujah Lang Bejambai
Rengong daun terebai
Didinga ari Sungai
Kerapa pisit lang ngabong
Singa ngentuchong
Didinga ari kebong gam langit.

Jalai Telajan pulai tu enda nengah jalai mansang laban iya deka meda ka nengeri orang bukai. Lalu dituju ka iya ngagai ;

Langit mansau baka kayu kain kesumba, Langit mirah baka darah mansau jera.

Terebai meh sida iya kebaroh-baroh kin, sabulan nandan di langit, sataun nampun di bukit. Nyau kelama lama maioh mega menoa dipansa sekumbang ke terebai, sida lalu ninjau kuta Mabong Kenujong Tujoh, nya orang mangkang Batang Panggau Langit. Peda kuta nengeri nya kuta batu lapan serak. Lalu atas nengeri nya diserambong enggau pukat langit endang nadai jalai tama kin. Sida lalu sangkai ngendoh ka diri ba tisi kuta nganti hari malam. Hari pan jauh malam lalu terebai baru ga daun limba limbi Telajan nya tadi semiyup sakali lalu datai di puchok kuta. Datai dia lalu dibantai ka iya guntin kempat menoa, lalu dikempat iya pukat langit. Udah terumpang meh jala pukai langit nya tadi, sida lalu nyau tama kedalam kuta. Peda nengeri orang nyampau pengerami, menoa udu pengeraja. Sida lalu ninga munyi orang ke besanggai, bedungai, memain bejugin, betawak, begendang, begong, bengkerumong, bebendai, bekerurai, belula, begita, belagu, benyanyi, bepencha, ngajat meh taboh orang dia. Samoa utai dia nempap kadiri, nebah kadiri, mangkong kadiri magang.

Peda batang Kayu Bangkit, Puchok Purang Kunyit nya berira, mandang menoa. Peda bedaun ka kusun kanggan kesumba, bebungai ka macham bunga pengeraja dunya, bebuah ka macham perengka temaga. “Amat manah meh kayu tu,” ko Telajan din. “Enda ngutok aka aku Menteri Manggau madah ka aku kayu tu suba.”

Tekala nya iya lalu ngusok daun limba limbi, lalu bebali nyadi telu kesa. Iya lalu ngajih ka diri empu nyadi indu kesa. Bala bini iya dikusok iya lalu bebali mesai leka ensabi. Sida nya lalu dipanggum iya ba nyawa. Dia iya lalu muai diri ari atas lalu terengkah di Puchok Kayu Bangkit Batang Purang Kunyit. Iya lalu nurun batang kayu nya samalam-malam nya. Datai iya di pun peda bala jaga enda nemu nesa agi pemaioh mangkang pun kayu nya. Bala jaga sigi enda berati ka mensia bisi datai nuntong ba pun kayu nya.

Datai Telajan dia lalu ngentak ka diri, peda lalu bebali nyadi Telajan baru. Lalu dichabut iya kayu nya, lalu dikusok iya simpan dalam temilah, lalu nyau ditaban ka iya mengkechit nengah jematan angin. Begau meh bala orang dia, angkat deh ninga ;

Kunchi Hari Singkum Rapit
Nadai Meranggang
Peti Kulit Enda Telenga
Mali Tetukang.

Iya lalu ngerak laki iya Mabong Panggau Langit ; “Dani nuan ambai tuju bangkai, laki tuju ati, Kayu Bangkit kitai udah ditaban ka orang Panggau Baroh, orang menoa bukai sigi nadai berani ngelaban iya, Mabong wai,” ko Dara Kunchi Langit ngerak laki iya enggau sabak-sabak.

“Lalu angkat mega Mabong Langit : “Ah,” ko iya. “Ngaga diri endar ga sida Panggau Baroh tu kau. Dini sida nya bangat tekelambong ka rita aku.” Lalu ditempap iya sumpit kilat menoa, peda tak nyadi daun limba limbun. Iya lalu nyau terebai nitih ka Telajan. Enda lama udah nya peda Telajan nyau ka ulih titih ka iya. Udah nya baru Telajan ensepi diri udah ditangkap Mabong Langit. “Apu, amat pama orang lelaki tu,” pia ko ati Telajan.
Seduai pen lalu belaban ; bepantap sama enggai telih, betumbok sama enda ulih. Nyau kelama seduai iya udah belaban angkat Mabong Langit lalu ngelengka ka duku, sangkoh enggau terabai lalu nangkap Telajan. Lalu dipeling ka iya nengah tisi langit. Dipasok ka iya ba injin langit, lalu rusak ga injin nya, enda ga Telajan pedis. Udah nya baru Telajan malas, lalu dempas ka iya Mabong Langit, dentak iya ke tanah, rembus ka sabayan lapan belas serak, pansut baru ga Mabong Langit. Lalu dirit iya nengah tisi langit, biau kiba biau kanan, enda ga alah. Udah nya Mabong lalu mali diri nyadi nabau, Telajan pan lalu nyadi nabau ga. Berekak meh seduai dia sama enda talah ka pangan. Nyadi remaung sama nyadi remaung, berekak enda ga talah ka pangan. Nyadi periok api sama nyadi periok api, meletup sama meletup enda ga talah ka pangan.

Udah nya baru Mabong Panggau Langit mantai ka tungkat penedat, jarin pengikat kena masong Telajan. Enda ga iya alah laban nya. Udah nya baru Mabong mantai ka lunju mali lebu, terengkah mali salah. Ditikam iya ka langit, lalu terengkah di tengah tanah enda ga kena Telajan semina nyelepak tunjok kaki iya aja. Angkat Telajan lalu malas ngena sumpit kilat menoa, lalu ditikam ka ia ka langit, dinga menoa tak bepangga laban munyi penerebai sumpit nya tadi. Laboh meh sumpit nya ka baroh, lalu ngentak ka tapa kaki Mabong, bumbus sapiak, lalu ngentak sapiak. Bedau ga Mabong enda parai, tang iya nadai agi daya ngelaban Telajan.

Udah nya baru Telajan nyintak duku emperaja nyengkong, chechandong limbai, tau terebai nengah langit, pedang panjang ngenchanang mantok melit. Lalu dileka ka iya duku nya peda nyelar baka kilat, dinga nyemetar sakali berembat gamal duku nya datai ari tisi langit. Enda sempat peda nyau datai, dia tudah Mabong pen nyau rebah. Tuboh iya luntang tiga digasak ka duku nya. Duku nya pan lalu ditangkap Telajan, lalu diselit ka sarong.

Udah Mabong Kenujong Tujoh parai, dia Telajan nyau bati sinu ka iya, laban iya sigi orang pugu berani. Lalu didup ka iya baru ga Mabong Langit. Udah iya ngeleda ;

“Apu, unggal wai. Amat alah meh aku laban nuan unggal menyadi. Maioh ga orang udah dilaban aku, empai meh aku kala ensepi asai nuan tu unggal. Enti bakatu, tau meh nuan empu kayu Bangkit, Batang Purang Kunyit. Tau meh nya dibai nuan pulai ka Batang Panggau Libau. Tang aku minta bagi ka nuan mimit meh wai menyadi, pengasih nuan mega meri aku.”

Telajan pen kasih mega meda iya, lalu dipatah ka iya dan siti, lalu disua ka Mabong. Seduai lalu beberap pangan diri, lalu udah nya sama pulai ka menoa diri empu.

31. PULAI KA PANGGAU
Tiga bulan Telajan terebai ari nya baru datai di menoa Panggau Libau. Samoa bala bini iya sigi udah sedia nganta, nganti diri nenjang indu di menoa Panggau.

Sida pan nyau semak, dinga tak berauh langit, lalu begau bala sida Bungai Nuing ngumbai nya bala munsoh. Begau mega sida Keling apai Telajan ; deka nyapai duku, nyau tejengkau ka kayu. Deka nyapai sangkoh nyau tejapai ka alu. Deka nyengkau terabai, nyau tebabak ka lelambai moa pintu.

Angkat Bunga Nuing seduai Pungga lalu nurun ngandak penatai utai ke munyi nya tadi. Datai seduai iya din, peda Telajan deh ke datai nya tadi ; “ Apu ! Buat,” ko seduai, “Anak kitai Telajan meh nyin Buat. Apu, remaung tua meh nyin buat,” ko seduai. Dinga nyau kekalau panjong seduai, lalu merap Telajan. Pungga lalu belanda madah ka Keling ; Bunga Nuing mengkang ngiring Telajan niki karumah.

Tekala nya Keling angkat lalu ngasoh bini iya Kumang enggau menantu iya Kunchi Hari, bini Mabong Panggau sedia ngator piring alu, kena ngalu anak iya Telajan pulai belelang. Babi sida ke besai udah mega sedia di pala tangga, piring alu pen udah sedia. Keling lalu bediri di pala tangga minching manok labang tujoh iko kena iya miau Telajan. Udah samoa utai sedia nya baru Telajan niki. Datai di rumah lalu didudok ka apai iya ba tikai peradani lapis enggau benang mas, disulam enggau benang intan. Indai iya Kumang lalu nanya, sakalika iya bulih utai ka digiga iya. Iya madah ka diri bisi meh bulih anak manok enam iko, tang sida nya mengkang dalam daun limba limbi. Ninga munyi nya, Kumang lalu ngasoh menantu iya Kunchi Hari enggau bala indu bukai ngambat sida nya.

Kumang empu lalu ngauk leka jawa dua belas pasu, minyak kepayang dua puloh empat baling, leka samakau enam pasu. Samoa utai nya tadi lalu dibai iya ngagai pala tangga kena iya nguji bala menantu iya ke baru ka niki.

Kunchi Hari ngenulu ka bala ngiring bala indu ka baru datai nya, lalu ditangkan ka

Dara Keniung, di entudi ka
Kumang Panggau Ranggang, lalu ditangkan ka
Endu Tengkelang Sampang Gading,
Dara Kemeli Tangkai Padi,
Dayang Linggang Nengeri enggau
Tanggi Nasi.

Lalu dentudi ka indu bukai mega dia. Ba genap gigi tangkal tangga ke ditengah sida berindik ba telu manok nitih ka indik Kunchi Hari. Datai di pala tangga dia sida lalu dasoh Kumang indai Telajan mentua sida nya nyiuh ka jawa dua pasu siko, leka samakau sapasu siko enggau minyak kepayang empat balang siko. Barang sapa bala indu nya tadi enda tepenoh ka utai nya baru, enda meh tau ka menantu iya.

Lalu angkat meh Endu Keniung, lalu disiuh ka iya jawa dua pasu, lalu digumpul iya baru peda penoh empat pasu, samakau sapasu nyadi dua, minyak kepayang empat baling nyadi lapan. Samoa sida bukai nya lalu bakanya magang utai disiuh lalu gumpol sida baru pulai bulih dua kali lipat siko-siko.

Dinga panjong Kumang seduai Lulong enda nemu agi ngenjing kekalau, seduai lalu merap menantu diri ; “Tu baru menantu asi, menantu ensui ke enda disagi selama-lama. Untong amat meh kitai bulih beliong enda ngamboh, betuah limpah meh kitai bulih peredah enda ningkoh.”

Sida indu bukai ngenong magang meda pemandai indu temuai. Kunchi Hari pen enda meh lebih ari sida nya ba pemandai sereta enggau gamal. Nya alai enda malu meh sida iya nyelat orang Panggau Libau.

Sida indu nya tadi lalu diring orang tama bilik sida Kumang, datai din lalu didudok ka orang ba setawak lapis enggau pua kumbu buah saribu. Nya alai chukop gaya, chukop basa meh sida Kumang nginta penatai bala menantu iya bini Telajan.

Sida Keling, sida Mabong Panggau pen pia ga gaga ka anak sida iya udah datai lalu bulih kayu pengeraja, kayu bangkit, batang purang kunyit. Dinga panjong sida iya munyi ka runtoh rumah gaga ka utai ke ulih Telajan. Sida lalu baum niri ka gawai besai pemadu iya, gawai nanam Kayu Bangkit, Batang Purang Kunyit. Samoa kaban belayan sida dipadah ka magang. Orang ke diau di langit padah abis, padah lengis datai ka Menteri Manggau pan dipadah ga meh. Sida Juntan Perembam Selangka Ruang Dada mega dipadah lalu enggau ga anak lelaki iya, anak Keling enggau Mini, Bujang Sinjong Gantong Hari. Segadu Telu Burong di langit din pan enggau ga anak bujang iya enggau Keling, penama Bujang Sabong Abong Sarong Taji, Sabit Mit Pengerunti Tali. Orang di tasik gilik gumbang, perua Jawa Mampang, sampal mega datai bala Ribai, bala Bundan.

Tujoh hari udah nya samoa pengabang nyau datai magang, lalu ari langit nyin di ulu ka Menteri Manggau. Sida datai ari ai di ulu ka Juntan, lalu sida ari tasik di ulu ka Ribai. Ukai main ga pemaioh bala pengabang, nyau betugong baka lempaung ngambong ka batang, lalu empuru baka tematu buah bindang, maioh ari beloh ngaban danau langkang, banyak ari lemetak Tinting Kedang.

Udah datai magang samoa pengabang, dia orang lalu ngadu ka piring alu. Orang indu pan lalu sedia ga mantil pengabang maioh ke niki ba pala tangga. Nya alai orang dulu niki ngenulu ka bala nya Kemping Padi lalu ditangkan ka Bujang Sinjong, lalu ditangkan ka Sabong Abong. Udah nya baru Ribai lalu ditangkan ka Bundan. Pupus samoa bala sida nya baru ditangkan ka pengabang bukai. Udah tembu pengabang niki, rumah Keling lima ratus pintu pan nyau madat ga laban bala pengabang betatam dia. Udah pengabang tembu tiki, tembu sambut orang, dia Keling lalu ngator piring turun tujoh belas kali lapan lalu dengkah ba tengah padang besai, babi tujoh iko, kerebau tiga iko, chapi lima iko dibunoh orang dia kena nanam Kayu Bangkit, Batang Purang Kunyit.

Samoa indu ke pandai-pandai nyengkaum bala bini Telajan dasoh nanam kayu nya. Bedau orang mansut ka kayu nya ari temilah, dia Keling dulu bejako ngagai orang maioh ;

“Aku,” ko iya, “Madah ka samoa kita pengawa aku u. Kasatu nyelamat anak aku Telajan ke udah pulai belelang. AKu mega lalu nyambut penatai bini iya. Kadua pengawa aku nanam Kayu Bangkit, Batang Purang Kunyit ke ulih Telajan di menoa Mabong Kenujong Tujoh. Lalu aku mai kita sama gaga enggau aku ka samoa utai tu,”

Udah nya baru indu meligai tujoh iko sama megai, sereta muka temilah sarang kayu nya. Udah nya Kunchi Hari enggau Endu Keniung, Kumang Panggau Ranggang matak kayu ari temilah. Udah iya pansut nya baru indu bukai lalu sama megai sereta lalu nanam iya. Dinga meriam lalu diselup orang tujoh kali ketungkah kayu nya didiri ka orang. Udah kayu nya bediri, nya baru orang indu lima belas iko nya sama nempap batang iya. Peda tekala nya lalu nyadi kayu raya ngayong menoa, nyadi kayu baung ngelindong kampong. Pun iya bisi lapan pemerap. Peda batang nyau berira, dan nyau besinja, daun nyau betusun kanggan kesumba, bungai mas berega, bebuah ka intan tekang gemala. Dinga lagu munyi gita, sayat munyi bedula, munyi pelandai leka ensera, pantun saribu leka, nadai ke nadai munyi lagu samoa bansa didinga di puchok kayu nya.

Udah nya Endu Kumang Panggau Ranggang, laban iya sigi Bunsu Ribut ke bempu injin didin, lalu mantai ka nya, sereta ditanam iya enda jauh ari pun kayu bangkit. Peda kenu dia lalu nyadi pasar mua pengerami, nadai utai ke nadai meh nya dia.

Nya alai lapan hari lapan malam orang rami ngirup dia. Samoa utai dipakai sigi peneka ngambi tak ada bisi. Keba samoa bala pengabang bela nyau puas magang makai utai leboh gawai nya.Ka semilan hari nya baru pengabang mulai ka diri magang.

Leboh udah puang pulai pengabang dia Telajan madah ka apai seduai indai iya enda tau enda diau semak pun Kayu Bangkit, Batang Purang Kunyit enggai ka kayu nya dichuri orang. Tekala nya Telajan mansang kin, lalu ditempap iya tanah dia, lalu nyadi Astana besai sedia enggau bala soldadu beribu-ribu bisi dia samoa. Astana nya digaga ari batu perenching burak kuning, batu gadong biru. Atas perabong iya bisi mensegit enam iti alai penindok indu ke ulih iya pulai belelang. Lalu ba tengah astana nya bisi bilik siti ke besai alai sarang injin didin iya.

Nya alai pemadu penyenang sereta rami meh menoa Batang Panggau Libau pengudah pemulai Telajan ke mai Kayu Bangkit, Batang Purang Kunyit ari Mabong Kenujong Tujoh. Tali ai injin didin pen bisi mega nuju bilik besai sida apai iya Keling. Keba ika iya Kunchi Hari sigi sama sabaka enggau pengawa bini Telajan bukai. Lalu samoa sida sabilik enggau sida sarumah bela madah ka diri, nyamai diau di Batang Panggau.

Sida iya lantang senang, gerai nyamai, nadai apa, nadai nama ; kitai pen pia ga lantang senang baka sida iya ka diatu lalu ka dudi hari ila, lalu sampai ka uchu ambu, ichit wit kitai jemah ila..