Nampung baru meh kitai ba tudah Apoi ke ngulu ke Jagu’ begiga ke jalai
kena ngerembus ke diri ngagai sungai bukai. Tudah Apoi tu tadi ke kena
ukum Jagu’ udah ia ke nubai ngelus ke ikan ba sungai. Ia pan lalu nyelam
ngagai lubuk nitih ke Jagu’ laban Jagu’ ke enggai nengah jalai darat
tauka pantai.
Nyelam meh seduai ia ko jerita, lalu ngili aie sungai nya. Sekumbang
seduai ia ke ngili aie nya, lalu nadai ga seduai ia tetemu ke jalai
muntang di kena meraka menua ngumbus ngagai sungai bukai. Tiap –tiap
kali ke ngiga jalai ko jerita, tudah Jagu tu seruran bebini belama-lama
peda Apoi. Mansa aja Jagu’ indu lalu ke bini ia, mansa aja lalu di ambi
ke bini. Nya meh tudah Apoi tu tadi bangat alit ati merati ke ulah Jagu’
nya ke ka amat bebini. “ Bulih amat ga Jagu’ tu bini neh, nyangka nya
sigat ga di peda Jagu’ indu kini, laban ia ke nyelaie ari jagu’ bukai,
ga jagu’ burak” pia deh ko Apoi bejaku ke diri dalam ati.
Nya meh ko jerita sekumbang seduai ia ke ngiga jalai muntang ari alam
aie din, Apoi lalu nadai ga tetemu ke jalai. Nyau ka nyida-nyida ga ati
tudah tuai, laban ke lelak ngetu belama bai Jagu’ nya ke seruran enda
tau meda jagu’ indu. “ Ni meh maya tua tu tetemu ke jalai muntang, nuan
tak seruran mai ngetu” pia deh ko tudah Apoi bejaku kira ke ka nganu
mimit meh jaku ia. “ Eh…ukai aku mai nuan ke bini deh, enti nuan bangat
ka, tau meh enti nemu jadi enggau bansa kami” pia deh ko timbaj jagu’
burak tu tadi. “ Eh…ukai nadai indu bansa kami bajik…kapa ku nya. Penemu
baru nuan tau meri, ti indu bansa kitak tau enda ibuh, Tusu ga nadai,
bakani ka nusu ke anak, tubuh ga nyau penuh tisik, bakani ko ka
merap…e..eee enda aku tau” pia deh ko Apoi ngelincum tuchum kediri
nimbal jaku Jagu’ burak tadi.
Tudah Jagu’ burak nyau ngerecham mua ia ninga jaku Apoi, tang enggai ga
nyadi ringat. Nadai ga ngulu ke ia ngiga jalai muntang. “Enti pia, enda
ga ibuh…..” nyu panjai anak sebut ibuh ia ngelawa Apoi tadi. Tudah Apoi
geli amat ati, ia nemu Jagu’ burak segi enggai makai ia laban nadai
ngulu ke ngiga jalai. “ Ni penemu be bini dek deh..uji padah ke aku” pia
deh ko Apoi majak ngelukih Jagu burak tu.
“ Ila meh…ti bangat ka, ba jalai dulu giga” pia deh ko Jagu’ malas tundi
jaku Apoi. “Sepi dek Apoi….ba anang nundi aku, aku nemu meh malas” pia
meh ko tudah dalam ati Jagu burak tu tadi. Nya meh ko jerita seduai ke
begiga ke jalai muntang ngelawa sungai bukai ko jerita bangat pedis
amat. Nadai kala temu, rembus seduai ia ba nanga sungai nya, nyau tetemu
ke aie masin ga seduai ia, asai ke ka luput ga seduai ia tetelan ke aie
masin.
Nya meh ke ngasuh seduai ia ngulu baru ga sungai nya ko jerita. Tudah
Apoi majak ringat laban ke kelalu lama muai ari begulai enggau Jagu’
burak tu tadi. Nyau di pandak ke kitai cerita.
Seduai ia lalu tetemu ke lubuk siti ke umbas ia pemesai sereta dalam.
Tudah Apoi lalu bejaku enggau Jagu burak nya, “ Enda ulih giga tua jalai
ke udah bisi, manah agi tua ngaga kediri ari tua ke muai ari baka tu”
pia deh ko Apoi bejaku enggau Jagu’ burak nya. “ Au..gaga meh enti nuan
ulih, aku nadai mantah, ga aku mina minta jalai ke muntang, asal meh
bisi” pia meh ko timbal Jagu’ burak tu tadi.
Nya meh ko jerita, Apoi lalu enda bedalih agi ia lalu ngeruk tanah ba
dalam aie din ko jerita, nyau keruh lubuk nya di gasak ke ia. Lalu di
kaus ia semua batu dia endur ia ngaga lubang jalai muntang ngelawa
sungai bukai. Nya meh ko jerita, lama amat ia ke ngeraus lubang meraka
menuanya ari alam aie. Ko sida ke nyebut, nyau ka ke bepuluh tahun ia
ngeruang jalai ke baka lubang gua nitih ke pemesai jalai ulih endur
jagu’ burak nya ngerayap ko jerita.
Nyau ngenang lubang nya meh kitai, nyadi diatu lubang nya ko jerita
tembus ba menua aie Batang Kanyau ke pati Batang Kapuas ba menua
Kalimantan Indonesia ko jerita. Jalai nya pansut ba lubuk siti . Sida ke
nusui menua nya bisi siti jambatan ke di kumbai jambatan batu Mataso
(dalam jaku maluh Mataso “Matahari, ko kitai”). Tang aku ( penulis)
enggai bula ke kitak enda kala kia. Tang laban ninga tusui bala Tuai
Lunbawang ke nyebut.Diatu agi meh bisi lubang nya ko sida ia. Ari lubang
nya meh sida Maloh suba mansut ke diri, nengah lubang Jagu’ burak nya.
Tang Lubang nya bisi udah di sempal bala Maloh kelia nya meh ke ngasuh
kitai enda ulih nengah lubang nya agi, laban sida Maloh ke lari ari
menua Ulu Baram kelia nyempal takut ke di titih ke bala Kayan.
Ko jerita bala Kayan ke nguan Ulu Baram enda rindu meda bala Maloh ke
selalu ngaga serang anak ba punjung menua sida ke besabung ba ulu menua
Gua Murut ke diatu. Suba Gua Murut nya betampung enggau Lubang ke di
gaga Apoi ko jerita, Gua nya endur Apoi mansut ke diri enseput ngambi
angin kena ia nyelam betah baru ngali lubang. Tang Laban bala maloh
kelia ke udah nyempal jalai ngena batu ko sida ia nyebut alai ke enda
ulih giga agi pati jalai ba dalam Gua Murut nya.
Kala kitai ke mansa cerita Gua Murut tu ko jerita, manah ga kitai
ngenang dulu utai ke bisi besangkut paut enggau jerita tu, ambi jerita
tu enda bangat bepusin kulu-bepusin kili. Ambi ke kitai sama nemu diak
meh endur bala indu petara utai tumbuh diau betanam ke utai ko jerita.
Lebuh Apoi ke nembus ke diri diak, ia bisi ati gila enggau siku anak
petara indu ke benama Dayang Siun. Tang Dayang Siun ko jerita enggai ke
Apoi, laban Apoi ukai lelaki ke di anti ia nitih ke di padah ke antu
dalam mimpi ia. Antu dalam mimpi ia madah ke ia enda tau belaki ngapa
enti enda jadi enggau lelaki ke di padah ke antu ba mimpi ia nya.
Nya meh ke ngasuh Apoi enda te ulih ke indu nya ko jerita, Naka meh
pemedis ati ia. “ Ngumba ke diri ga indu nya, ila nyepi, enti enda jadi
enggau aku bunuh aku laki ia ila, enti ia enggai bunuh aku enggau ia
empu meh” pia deh ko dendam tudah tuai. laban pengawa ia ke bedau tembu
ngerawang jalai ba baruh tanah din nya meh ke ngasuh ia ninggal ke
pengerindu ia enggau Dayang Siun enda lama. “ Ila ga aku ngambi, nganti
udah tembu pengawa, biar be bunuh, rebut ku meh indu nya” pia deh ko
janji ati tudah tuai ke benung di rachun ati rindu ke Dayang Siun.
Ba lubuk ati ia semina ia aja ulih jadi enggau indu nya. Nya meh ko
jerita, nyau pulai ngenang ia ke ngaga jalai tu tadi. Jalai muntang ke
di gaga Apoi ke Jagu’ burak pan lalu tembu, tembus ba menua ke di padah
ke aku ke dulu tadi. Lama meh ia nguan menua nya kelia begulai enggau
Jagu’ burak nuntut penemu bebini ari jagu’ burak. Ia ke nuntut tu ambi
bisi di kena ia be bini jadi enggau Dayang Siun ke agi kebal ati enggai
nerima ia.
……Lengka ke kitai dulu meh tudah Apoi ke bedau kiruh nuntut penemu be
bini ba Jagu’ burak, kitai pulai baru ngagai Sangor ke betemu enggau
indai ia ba Bukit pemadu tinggi nya……….
2.6 Sangor begiga bini
Nya alai ko jerita, sepengudah Sangor ke agi berati ke indai ia Dayang
Rinai ke melayang terebai lesap niki ke langit, dia baru ia nemu semua
utai ke nyadi, ke nyau ari ia ada nyentuk ke besai. Nadai meh ia nemu
ngelamatu seduai ia Apoi segi anak petara tang di ada ke ba lubang batu
di dunya baruh ari tu. Bisi ga ati ia gaga laban ke udah nemu asal diri,
tang bisi ga ati ia tusah laban ngenang pendiau diri ke mengkang
ngembuan sumpah Apai ia Raja Rua Riong di langit tinggi.
Tudah tuai segi enda nemu, nama meh batang sumpah kini, nyangka tu meh
sumpah ke nyadi kini, seduai ia menyadi enda kala lama begulai enggau
apai indai. Ari mit segi udah kampar, sampai ke besai. Pia deh ko gulu
simpul ati ia din. lama meh ia nukung ke diri, berati ke semua jaku ke
di padah ke indai ia Dayang Rinai ko jerita. Pemuas ia ke nukung, nya
baru ia ingat ke pesan indai ia ke mesti ngiga indu ke benama Dayang
Siun, ambi ke bini ia.
Nya meh ia tu tadi ko jerita lalu beguai nguing ke pejalai diri ngagai
menua utai tumbuh ke kala di pansa ia suba. Enti kitai ingat ke dulu ba
pun jerita, lebuh ia ke tinduk ba jugu tanah, bemimpi di asuh Dayang
Rinai ngiga bukit pemadu tinggi suba. Nya meh ko jerita ia lalu bejalai
nurun bukit nya tadi lalu nuju menua nya. laban tudah tuai ke segi udah
nemu tunga menua nya, kira ke nadai bangat tusah ga ia nyidi bekau ia
suba.
lalu bejalai meh ia besari-sari ngejang ke diri ari kaki bukit nya,
ambis menua, munggu di titi. Lebuh ke malam, bejalai ga ia betenggau ke
bulan, lebuh siang bejalai ga ia be pelasar ke tenggau matahari. Laban
ke segi berantu ko jerita , ukai nya bangat lama ga ia bejalai alai ia
ke rembus ba menua utai tumbuh nya. lebuh ia ke datai ba seberai
pendaie, diak deh hari benung ka nyerumba silau. Mayuh meh bala orang
indu di peda ia mandi diak. Diak deh ia merati ke sida ke mandi nya,
siku nadai meh bala lelaki. “ Ni bala orang lelaki kini, nama nya tak
indu magang-magang” pia deh ko ia bejaku dalam ati diri. Ia ke belalai
ari tebing seberai tu tadi enda bemunyi, takut ke di temu bala orang
indu ke mandi.
Tudah Sangor ke belalai diak, sekira ke ka nganti hari belabuh petang
agi meh ko ati ia, enggai ke orang empu menua bisi enda tentu rindu ke
ia ngerembus ke diri enda piga-iga. Semua indu ke mandi nya ko jerita,
bela bebajik magang, siku –siku bela bajik nadai pengurang ari pangan.
Lama mega bala indu nya mandi ko jerita. Lebuh bala indu nya mulai ke
diri, Sangor pan lalu pansut ari ke belalai tadi, ia lalu nyemerai
ngelayang aie ke seberai pendaie orang indu nya. datai ia diak, ia lalu
belabuh ngemasah ke tubuh diri mandi lalu begari.
Udah ke tembu ngemas diri, ia lalu belabuh nyidi jalai bala indu ke
pulai mandi nya tadi. Lebuh ke bejalai nya ko jerita, lalu nadai ga ia
tepeda ke rumah orang, rumah kediri nadai, rumah panjai nadai, langkau
pan nadai. Majak ga ia bejalai belubah-lubah. Enda lama dah nya baru ia
tepeda ke lubang gua batu sigi ke cukup ia pemesai ko jerita, lalu semak
agi ga ia bejalai gadai-gadai nuju gua batu nya. Kira ke udah bisi 30
kaki penyauh ari pintu gua, ia lalu belalai ba tugu batu sigi. Belalai
meh ia diak nguji ngelilik pendiau mensia ke dalam lubang gua batu nya.
Semua ulah bala indu ke diau diak ulih di peda ia, nya baru ia nemu bala
indu nya ke mandi ba pendaie din tadi. Lebuh ke belalai nengkila ba
tugu batu nya, diak deh ia lalu ninga bisi orang ngangau enda inggar. “
Sangor….sangor…sh..hh..malik kitu nuan, ditu aku.” pia deh ko orang
bejaku ba tisi muak ke sepiak di dinga ia. “ Sapa meh orang tu tak nemu
nama aku, pia meh ko ati tudah tuai. malik ia ngelawa tugu batu muak ke
sepiak, peda ia tak inie tuai siku naka ngenyaie nya gamal peda ia.
“ Endai, kitu meh nuan Sangor, aku meh tu, aku di asuh indai nuan Dayang
Rinai ngabas pejalai nuan kitu laban nuan ke bedau nemu pendiau orang
ba menua tu” pia deh ko inie tuai nya bejaku. Ninga munyi nya, Sangor
lalu engkunduk ke diri bejalai ngagai inie tuai nya. “ Aram uchu Sangor,
nitih ke aku. Enggai ke nuan di peda Dayang besai lagi. Enti ia meda,
di bunuh ia nuan lagi” pia deh ko inie tuai nya bejaku baru sambil ke
narit ke lengan Sangor bejalai nitih ke ia. Tudah Sangor nitih aja. Ia
nadai ga tentu nemu nama utai ke patut di kereja.
Lebuh ke datai ba dunju inie tuai tu tadi, Inie tuai nya lalu madah ke
Sangor. “ Nuan uchu, mesti bejimat enti ba menua tu, laban kitak ke
lelaki segi enda tau mansa menua tu. Mayuh sidak ke pungka lelaki udah
mansa menua tu, enda kala tepulai ke diri. Sida ia deka parai laban enda
masuk makai ngingat ke pemajik indu ba menua tu.Nya alai enti ukai anak
petara, raja berani ke ngembuan penemu enda ulih ngelawa menua tu.” ko
inie tuai nya bejaku ngagai Sangor.
“ Pia..bakani ko chara aku ulih ngiga indu ke di padah ke indai aku deh
inie?, bangat pedis amat ga ngulih ke nya…” ko Sangor ga nanya inie tuai
nya, ninga ke cukup pemedis enti nadai dinding bulu ba menua nya.
“E….ee nya meh kebuah aku ke kitu uchu, anang tusah nuan. Uji bulu mata
nuan unsut enggau abu tu dulu, ngambi ke semua indu nya enda bajik peda
nuan” pia deh ko inie tuai nya madah ke sangor lalu nyua ke abu nya. “
Nyadi aku bisi pesan uchu, abu tu mesti di buai nuan ila enti nuan udah
tetemu ke Dayang Siun, enggai ke nyau enda bajik ga ia di peda nuan ila.
Enti nuan udah tetemu ke ia, lalu taban ke ia ila, laban ia segi benung
nganti nuan diatu” pia deh ko inie tuai nya bejaku ngingat ke Sangor.
“ Nama kebuah aku mesti lari naban ke ia deh inie? nadai ka nyadi
bakanya, salah pengawa nya. Kati ko apai indai ia deh?” ko Sangor alit
ati ninga inie tuai nya ngajar ia naban ke Dayang Siun. “ Eh ..anang
irau dek uchu, Dayang Siun nya segi nadai apai indai, ia diatu di jaga
Dayang Besai, Dayang Besai meh ke selalu ngemedis ia , nganu ia, malu ia
lebuh ke madah kediri mesti belaki jadi enggau nuan. Nuan anang irau,
ia segi nganti penatai nuan” pia deh ko inie tuai nya bejaku nimbal
Sangor ke agi rangap-rangap nya tadi.
Lalu di unsut inie tuai nya tadi bulu mata sangor ko jerita ngena abu
nya tadi. Lalu di pusin ke inie tuai nya 7 kali tubuh ia ngelaban pusin
jam kitai ke maya hari tu. Lebuh ke musin ke nya inie tuai tu tadi lalu
macha leka sampi, ke dinding tubuh Sangor. Udah ke tembu diak Sangor
lalu menchelak ke mata, malik ia ngagai inie ke bediri nya tadi peda ia
lalu lesap tekalanya. Enda sempat betanya utai agi tudah tuai. Ia pan
enda meh nemu kini tunga inie tuai nya tadi.
Ia meh udah cukup maya, malam pan nyau tuai. Sangor lalu mansang
belubah- lubah nuju mua lubang gua batu nya tadi. lebuh ia ke tama nya
diak deh ia lalu meda semua indu nya benung tinduk jenak amat ko jerita.
Siku nadai meh bemunyi. Gamal bala indu nyau naka penyaie utai di peda
ia, laban ia ke udah ngena abu dinding bulu ba bulu mata. Enda ke-kebut
meh sida nya ke benung tinduk. lebuh ia ke bejalai majak ngelilik endur
nya, diak ngumba endar ga ia lalu te duju ka batu sigi lalu te tingkap
meh ia terap ngejung ke ia nyau teperagau teberap ke indu siku ke benung
gali tinduk.
Lalu manjung meh tudah orang indu nya ko jerita, “oiiiii…mati…mati….sapa
kitak ke datai ka munuh kami…dani wai…dani kitai, bisi orang jai,
ngachau kitai” pia deh ko jaku tudah indu nya tadi. Indu ke nyerauh
tekenyit nya ko jerita lalu engkechit angkat nuju bala indu bukai ke
sama-sama ngereduas angkat ari ke tinduk jenak. “ Ah…dah..ni munsuh
wai?, ni…, nadai meda a…” pia deh ko bala indu bukai nyaut siku ke
nyerauh nya tadi. “ Nyin…nyin, ba endur aku ke tinduk din…..”pia deh ko
indu nya madah ke bala ia. Nyadi ambi ke kitai sama nemu, bala indu nya
tadi di jaga Dayang Besai, sida ia bisi tubuh 6 iku ke gali diak. Nyadi
ko jerita, semua Dayang biak ke di jaga Dayang Besai bisi 7 iku, tang
laban Dayang Siku ke benama Dayang Siun udah di kurung sida ia dalam
peti, nya meh ke ngasuh bala Dayang Biak ke agi ayan di peda semina 7
iku.
Kebuah Dayang Besai ngurung Dayang Siun ba peti, laban takut ke ia lari
ari menua nya lalu ngiga lelaki ke benama Sangor ke deka jadi enggau ia.
Laban Dayang Besai udah bejanji enggau semua Dayang Biak lebuh ke nurun
ari menua langit menya, sida ia enda tau jadi enggau mensia lelaki ba
dunya tu. Barang sapa ke ngelanggar janji deka kena ukum bunuh lalu di
anjung pulai ke langit baru.
Nitih ke jerita, bala Dayang tu di asuh bala petara bukai di langit
ngiga menua ke manah di kena betanam ke leman utai tumbuh nyadi ke
pemakai. Laban menua langit din ke nadai tanah baka menua di baruh tu,
nya alai sida ia lalu nurun ngagai menua kitai mensia lalu tetemu ke
tanah ke manah lalu ulih endur nanam semua utai ke ulih nampung pemakai
sida di langit din. Nyadi menua ke endur bala Dayang tu diatu di sebut
kitai menua “Gunung Murut”. Enti nitih ke jerita lama bala Lunbawang,
segi diak meh endur bala (Dewa-Dewi) petara lama dulu numbuh ke utai di
tanam.
Nyau nampung baru ga kitai ba tudah Sangor ke tetingkap lalu teberap ke
siku ari bala Dayang Biak nya. Nya meh tudah Sangor tu tadi lalu
beguai-guai neresap ke diri belalai sebelah selepak batu ke besai-besai.
Nya meh bala Dayang biak lalu be padah ngagai Dayang Besai. Laban
Dayang besai ke sigi ngembuan penemu ke cukup bias ko jerita, diak ia
lalu ulih nangkap Sangor semina enggau sampi/puchau aja. Nya meh lebuh
Sangor ke udah kena puchau tu tadi lalu enda ulih nginsit ari ia ke
bediri.
Kira ke nyamai amat meh bala Dayang tu tadi nangkap tudah tuai. Ia lalu
di bai sida ia nuju lubang batu ke endur Dayang Besai diau. Datai din ko
jerita Dayang Besai bangat pedis ati, “ Sapa nuan bangat berani ngachau
menua kami?” pia deh ko Dayang besai merak tudah Sangor, nyau bengingit
lubang pending jamah munyi penginggar jaku Dayang Besai. “ A…a..aku
enda sengaja, tesat aku tadi ari menua kami, lama aku udah bejalai. Nyau
rembus ba menua kitak tu. Nyadi nama aku ‘Labo’ ( Chit/ tikus= jaku
Lunbawang)” pia deh ko ia nyaut Dayang Besai. Ia segi enggai madah ke
nama diri. Enggai ke bala Dayang nya nemu tuju ia ke datai kia.
Nya meh ko jerita, Sangor ke di tangkap sida tu tadi lalu di guna sida
Dayang tu tadi nyadi ke ulun nyaga utai tanam. Siang ia di kurung sida
ba Lubang batu, enti malam asuh sida ia bejaga ga. Nya meh ke ngasuh
tudah Sangor ke bebali nama ‘Labo” tu tadi lama amat begiga ke jalai
ulih naban ke Dayang Siun. Tambah mega ia bedau nemu dini endur Dayang
Siun lalu ni bagi sida Dayang Biak diak ke Dayang Siun.
Nyadi lemai siti, lebuh siku ari Dayang Biak datai ngelawa lubang ke
endur ngurung Sangor ko jerita, diak deh indu nya lalu bejaku. “ Sepi
dek…ah..ah…, kah..kah” pia deh ko indu nya ketawa ke Sangor. “ Nasib
nuan ukai Sangor, enti nuan Sangor udah nuan bunuh kami….kah,..kah” Ko
indu nya ga bejaku sambil ke ketawa. Tudah Sangor lalu semak agi nunga
Dayang nya tadi be entara ke teling lubang sigi. Ia lalu ngemerani
kediri betanya, “ Sapa ke Sangor deh….enda ku kala ninga.” Pia deh ko ia
nguji nanya indu nya. “ E….ee Sangor meh ke ngasuh Dayang Siun gila,
bakani meh penyigat sangor nya kini, bangat ngasuh madi kami ke biak nya
nyau ka gila belaki”pia deh ko tudah Dayang Biak ke siku nya bejaku.
Nya meh ke ngasuh tudah Sangor tu tadi majak berani ka betanya seraya ke
kena muka rahsia semua utai ke nyadi ba Dayang Siun. “ Ni Dayang Siun
diatu deh, nama ku enda kala meda…beli’ amat ga ia ka belaki neh.” pia
deh ko Sangor, kira ke ka gerinek-gerinek mimit meh jaku. “ Oooo…kapa
dek ka nemu deh, nadai guna dek nemu, nadai ulih peda agi ia nya, udah
di kurung Dayang Besai ba peti. Din endur peti ba lubang Dayang Besai
empu” pia deh ko indu nya bejaku, indu nya enda sedar ke diri nyau
telabuh bejaku. Nama agi deh, gaga amat meh tudah Sangor laban ulih
ngelukih Dayang Biak nya tadi. “ Enda ga bangat pintar bala Dayang tu,
bisi gak ke beli’-beli’” pia deh ko ia bejaku dalam ati tuchum kediri.
Nya alai lebuh ke nyaga utai tanam malam nya ko jerita, diak deh sangor
lalu muka karong ‘ Labo’ ia. Tubuh ia di asuh ia nyaga utai tanam,
‘Labo’ chit ia tadi lalu nyau bejalai nunga ke lubang gua batu nuju
lubang Dayang Besai. Laban ia ke udah bebali nyadi chit tu tadi, senang
amat ia ka tama ngagai lubang Dayang Besai. Ia mega nemu jalai ngagai
endur nya. Nama agi deh, laban tubuh ke udah bebali mit, ia lalu masuk
ari lubang mit sigi ngagai peninduk dayang Besai. Datai ia din ia lalu
begiga ke Peti.
Udah ia tetemu ke peti nya ko jerita, ia lalu ngerit rantai ke di kena
nambit peti nya. lalu di kerit ia semalam-malam nya. Nya meh ko jerita,
bebendar amat ia ngerit rantai nya. Ia mesti mansut ke Dayang Siun
sebedau ari kerebak tawas. Laban ke segi sabar ati, nyau pemuas-muas
baru rantai nya ulih di putus ke ia. Ia lalu ngerit peti nya tadi
beguai-guai lalu tama nengah lubang nya. Tudah Dayang Siun ke dalam peti
nya peda ia nyau kurus, ia lalu nelai Dayang Siun “ Wai….aku tu, Sangor
tu, tang aku bebali dulu nyadi chit. Pansut tua ari tu begadai-gadai,
udah buka aku rantai tadi” pia deh ko chit tu tadi bejaku. Nya meh tudah
Dayang Siun gaga amat ati, chit nya tadi lalu di simpan ia ba selepak
baju ia.
Tudah Dayang Besai ko jerita, nadai nemu utai ulu-ili, laban ke enda
nyangka utai ke nyadi. Jenak amat ia tinduk. Dayang Siun lalu
belubah-lubah muka peti nya tadi lalu merejuk mansut ke diri. Ia ke
bejalai tadi segi bejimat-jimat ambi ke nadai di dinga bala Dayang Besai
enggau Dayang Biak tinduk. Udah seduai ia ke pansut ari lubang gua batu
nya tadi. Chit lalu bejaku “ din endur tubuh aku wai, bai kin ke dulu
aku” ko chit nya tadi madah ke Dayang Siun. Nama agi deh, lalu di bai ia
chit tu tadi ngagai tubuh Sangor ke duduk dugau-dugau nunga utai tanam.
Udah ke mulai ke tubuh diri ke asal, baru deh tudah Sangor madah ke
semua utai ngagai Dayang Siun. Nya baru Dayang Siun enda berasai labuh
aie mata chukup pengaga ati, laban amat meh ko mimpi ia suba. Sangor meh
ke bediri ba mua mata ia ke diatu, lelaki ke selalu ayan ba mimpi ia.
Nyata meh mensia ke benama Sangor tu sigi bisi idup. “ Anang lama tua
ditu wai, aram mupuk tua. Mupuk laju, lari. Kin ke tua pulai ngagai
menua kami” pia meh ko Sangor madah ke Dayang Siun. Tudah Dayang Siun
nitih aja, laban ke segi betahun-tahun ke udah nganti Sangor ngambi ia.
Tu meh maya ia ngelepas ke semua pengerindu enggau penusah ati ia ke di
kurung Dayang Besai betahun-tahun ke udah lalu. Nya meh ko jerita lalu
mupuk meh seduai ia nadai malik ke belakang agi…………..
….Lengka ke dulu meh Sangor enggau Dayang Siun ke mulai ke diri ngagai
menua Sangor tu. Kitai ngenang bala Dayang Besai ke tinggal ba Gua
Batu……….
2.7 Sumpah Dayang Besai
Nyau ngenang ngagai bala Dayang Besai ke diau dalam lubang batu meh
kitai. Pagi nya, Dinga nyau munyi ke ka runtuh deh lubang batu diak ko
jerita jamah Dayang Besai ke nyeradak merak bala Dayang Biak. “ Nadai
guna-guna semua kitak tu, siku pan nadai nemu utai ke nyadi. Aku ke
ngarap ke kitak tang, semua enda nitih ke utai ke di karap ke aku”pia
deh ko dayang Besai ringat amat pagi nya.
Nya meh bala Dayang Biak 6 iku nya tekenyit amat. Sida ke dani pagi nya
ukai nya bisi nemu utai. Nya meh Dayang Besai lalu madah ke sida ia
semua utai ke nyadi. Sida ia lalu be perening pangan diri, nadai
sekali-kali sida ia nyangka lelaki ke ngumbai diri Labo’ nya Sangor
empu. Dayang Siun mega udah di taban ke Sangor lari. bakani meh ka
ngiga, ukai nya mit menua. Enti di giga, sapa ke ka nyaga utai tanam
diak. Pia meh ko runding bala sida ia.
Nya meh ko jerita, sepagi-pagi nya sampai ke tengah hari nya meh tudah
Dayang Besai agi nganu bala Dayang Biak. Udah ia ke bangat enda puas
hati nya tadi. Diak deh Dayang Besai lalu bejaku nyumpah Dayang Siun. “
Laban nuan ngelanggar janji petara, nuan ila Dayang Siun enda ulih pulai
ari menua mensia, pemarai nuan ila chukup pemerinsa, seduai nuan Sangor
di sumpah aku enda ulih begulai lama” pia meh ko jaku sumpah Dayang
Besai.
Udah ia ke bejaku nya, ia lalu ngemai 6 iku Dayang Biak nya ngemas semua
utai ke ulih di bai pulai niki ke menua asal sida ia di langit. Sida ia
mesti pulai madah ke berita nya ngagai petara tuai sida ia. Lebuh sida
ke bekemas nya tadi, diak sida ia lalu ninga orang ngagau, “ oiii, bisi
orang diak?..aku tu Apoi, enti kitak bisi aku ka ngenduh ke diri enda
lama.” pia deh ko orang nya bejaku ngagau di dinga sida ia. “ ooo..Apoi,
kami tu ka mupuk pulai ke menua, enggai nyadi enda pulai. Bisi penyalah
kami tu, kami enda ulih nguan dunya kitak mensia agi, terima kasih meh
ngagai nuan laban nulung ngagai lubang batu ke kami suba” pia deh ko
bala Dayang nyaut ia.
“ Nama penyalah kitak deh? nadai ga aku meda penyalah kitak” Ko Apoi ga
bejaku baru ka nemu nama utai ke nyadi. “ Nya meh penyalah kami , laban
enda tetagang ke Dayang Siun udah lari nitih ke orang lelaki, kami mesti
madah ke petara tuai kami di langit din enggau lengkas” pia deh ko
tudah Dayang Besai nyaut. Ninga nya tadi tudah Apoi asai ke begirau
atau, asai ke di runtuh ke tampuk ati lelaki tudah tuai. Ambai peruji
ati ia udah di taban ke orang lari. Sapa meh mensia ke bangat ulih
ngenchuri ati Dayang Siun ke ngenyadi-nyadi nya. Pia deh ko ati ia. Nyau
begetar tubuh tudah tuai. Munyi ko dalam ati ia suba, baik ke orang
tauka Dayang Siun empu mesti di bunuh, nadai orang ulih jadi enggau
dayang Siun enti enda ia.
Udah bepuluh tahun ia nuntut penemu kena ngambi Dayang Siun nyadi ke
bini. Rugi amat sepi ia muai hari ngapa nuntut enti enda jadi enggau
indu ke deka ati. Alang –alang mandi dulang, nyamai agi mandi daie, …pia
deh ko dalam sempama ati ia. Tudah Apoi lalu mupuk enggau lengkas nyidi
bekau orang ke naban ke Dayang Siun ko jerita.
Nyadi bala Dayang Besai ke tinggal lalu deka ngejang ari menua nya,
Sebedau ke mupuk diak deh Dayang Besai ke enda puas hati nya lalu
nyumpah baru ko jerita, lalu di sumpah ia munyi tu “ Kena aku ke
bebalas, ila bala anak mensia ke betanam ke utai ke di ambi ari paung
enggau leka utai kami tu deka bisi penulah, tulah sida ia ke nanam ila
kena serang Labo’ ( chit) nitih ke gamal Sangor ke bebali nyadi chit
ngayah ke kami.” Pia deh ko sumpah Dayang Besai. Nya alai sumpah nya agi
bisa nyentuk ke sari tu ko jerita bansa Lunbawang. Bala Chit(labo) tu
segi sampai saritu selalu ngerusak utai ke di tanam kitai mensia.
Sepengudah bala Dayang Besai mupuk, lalu naka nya meh petara kala
nganjung bala dayang ( Dewa-Dewi) ngagai Gunung Murut ke diatu ko
jerita.
2.8 Sangor mai Dayang Siun pulai ke Bukit Beluai
Nya meh ko jerita, sepengudah Sangor enggau Dayang Siun ke betaban lari
ari Gunung Murut, seduai ia segi nadai betati ke utai bukai. Seduai ia
ke lari naka ulih meh ngembus ke diri ngagai menua ke di tuju. Nyadi
Sangor tu tadi lalu ngemai dayang Siun nguing nuju ngagai menua lama
sida ia di Bukit Beluai laban dalam ati ia bisi ngingat ke Apoi.
kada enda Apoi udah lama nganti ia kini, ia mega takut ke Apoi tusah
hati nganti penatai ia. Runding ia Apoi lagi tak sebaka enggau penusah
ke nyadi ba niang apai seduai ia Darung kelia ke mati tusah ati. Nya meh
ke ngasuh ia nguing nuju menua lama ia di Bukit Beluai. Lama meh seduai
ia ke bejalai nya ko jerita, ambis kampung jerung ke di pansa, ambis
munggu ke di tujah seduai ia. Nya baru seduai ia datai ba Bukit Beluai.
Datai seduai ia diak, nya baru seduai ia nemu Apoi bedau datai ari ke
belelang ngiga pengidup. Lebuh ke datai, tudah Sangor nyau sinu ati kira
ke ngimbas baru pengidup sida sebilik ari mit kelia nyentuk ke besai.
Langkau sida ia ke suba udah nadai agi di peda, semina tiang tungkat ke
agi bisi di peda udah repuk di balut utai tumbuh. Ni enda deh, nyau udah
bepuluh tahun seduai ia madi ke bejalai.
Nya meh ko jerita, idup meh seduai ia jadi diri melaki bini baka orang
bukai. Seduai ia ngidup kediri besehari-hari betanam ke utai begiga ke
jelu babas. laban tudah Dayang Siun ke nemu betanam ke utai nya meh ke
ngasuh duai ia senang ngidup ke diri. Tudah sangor segi semampai nganti
pemulai madi ia Apoi. Kira ke nyau lelengau meh tudah tuai ke madi ia.
Tang ia enda kala madah ke Dayang Siun, ia ke bisi madi ke benama Apoi.
Semua pendiau pengidup sida ia ke suba pan enda semua di padah ke ia.
2.9 Apoi enggau Sangor Betemu ba Wong Supang
Nya alai, pagi siti, diak deh sangor lalu madah ke bini ia ia ke deka
begiga ikan ngulu sungai nya. Ia ke begiga ikan nya enda lama ko ia.
Tang ke bendar ia bisi pejalai bukai. Ia semampai lelengau madi ia. Kena
ia ke mantup ke ati diri, kira ke ka ngelawa aie wong ke endur ia ada
suba meh pejalai ia. Tang ia enggai madah ke bini ia. Nyau meh tudah
tuai mupuk bejalai kediri ngulu sungai nya ko jerita. Kira ke enda lama
udah nya ia pan datai ba wong nya, lebuh ia ke datai diak deh ia lalu
tepeda ke ayas tubuh orang siku ke benung duduk nunga ke belakang ngagai
ia.
Di perati ke ia manah-manah ga ikas tubuh orang nya, ia lalu nyapa “
Apoi…Apoi….adi, nuan nya?” pia deh ko sangor nanya. Udah nya orang nya
lalu malik musin ngagai ia ke nanya nya tadi. Diak deh ia tepeda ke mua
orang nya tadi tak di kelala ia, ukai orang bukai , amat Apoi. Diak ia
meda tudah Apoi, nyau benung nyabak beterenjaui aie mata duduk
dugau-dugau nunga penerejun aie wong. “ Endai nuan nya aka, Sangka aku
enda betemu agi tua, lengau amat aku ke nuan” pia deh ko tudah Apoi lalu
engkehit tugu batu lalu merap Sangor.
Nama agi deh lalu beberap meh seduai madi ia tu tadi ko jerita, sambil
ke sirut-sirut nyabak meda mua pangan diri. Sepengudah seduai ia ke
beserara be puluh tahun ke udah lalu. Dia deh Sangor lalu nanya ke
pemujur pejalai tudah Apoi ngelamatu. “ Bakani pejalai nuan deh adi?
bisi tetemu ke utai?, nama nuan enda pulai ke langkau kitai di Bukit
Beluai deh” pia deh ko tudah Sangor nanya Apoi.
Nya meh tudah Apoi lalu enda bemunyi, lubah-lubah ia bejaku “ Bisi
penusah aku aka, orang ti di kesayau ke aku udah betaban lari jauh ari
pengidup aku , tu kira ke ka nganti nuan meh aku ka mai nuan bebalas
ngagai orang ke naban ke indu ke di kesayau ke aku” pia deh ko Apoi
madah ke semua cerita penusah ia. “ Kati ko bebalas deh..ukai tua nemu
tunga orang ke naban ke indu nya deh.” pia deh ko Sangor nyaut.
Udah seduai ia ke bejaku nya, Sangor lalu nusui pejalai ia suba . Semua
utai di tusui Sangor magang-magang. Sampai ke ia betemu enggau indai
seduai ia pan di tusi ia magang-magang. Asal seduai ia pan di tusi ia
magang-magang ke ada ba lubang batu wong nya. Nya meh tudah Apoi
tekenyit amat ninga semua utai ke di padah ke Sangor. Chukup benasib ga
aka Sangor udah betemu enggau indai, tang nama ga aku enda kala betemu
enggau indai deh, kada sida ia sayau ke aku, pia deh ko ati ia.
Udah semua di padah ke Sangor, seduai ia pan lalu berunding deka ngiga
lubang batu ke endur seduai ia ada menya. Lalu di giga seduai ia meh ko
jerita sebelah wong nya diak. Di perati ke seduai ia ari semak, nadai ga
duai ia tetemu ke lubang batu nya. Enda lama dah nya, Apoi lalu nguji
niki ngagai tungga perejuk aie wong ke balat nya. Lebuh ia ngelilik ba
batu diak, baru ia tepeda ke siti lubang batu ke nyau ka alit jamah
terusur tanah. “ Aka …aka, tu ia, ditu endur. uji kitu ke nuan enggau
aku ngali lubang batu tu” pia deh ko Apoi ngagau ke Sangor.
Sangor lalu beguai-guai ngelawa endur Apoi nya tadi. Seduai ia lalu muka
mua lubang batu nya besai ke agi ambi nyamai endur seduai ia tama. Udah
meh chukup pemesai mua lubang nya ko jerita, seduai ia lalu tama ba
lubang batu nya. Lebuh seduai ia ke meda lubang batu nya, nya baru
seduai ia meda semua pengingat ke bisi di tinggal ke indai Seduai ia
Dayang Rinai ke nganti seduai ia ada lebuh ke di kandung dalam 9 bulan.
Mayuh meh utai ulih di peda seduai ia. “ Tu meh palan indai tua naruh
diri ari ke di bunuh apai tua Raja Rua Riong menya adi” ko Sangor bejaku
ngagai Apoi.
“ Kasih amat ga indai suba neh, ukai nya nyamai diau ba utai baka tu.
Diatu tua udah besai, tang enda ga tua ulih malas pemanah budi indai
tua” pia deh ko Apoi bejaku sinu, sambil ke berati ke endur peninduk
indai duai ia menya. Lebuh ke bepusin dalam lubang batu nya ko jerita,
diak deh tak ngerayap utai ke chukup ia pemesai peda seduai ia. peda
seduai ia ular chelum tak chukup ia pemesai pansut ari ujung lubang batu
nya. Seduai ia madi enda ke kebut laban ke enda sempat lari.
Nya meh ko jerita ular nya lalu bejaku “ Sangor, Apoi…aku meh ke nguan
utai ke di tinggal ke indai seduai ditu ari menya-menya. Lama udah aku
nganti seduai datai ngambi, tu meh utai ke di tinggal ke indai seduai
suba” ko ular chelum nya sambil ke ngelua’ ke dua igi bungkus utai ke di
bungkus ngena pua’ kuning. “ Nyadi utai tu mesti di beri ngagai seduai
ko indai seduai suba madah ngagai aku, nya alai aku ke enda mindah ari
tu ari kelia” pia deh ko ular nya bejaku baru. Seduai madi ia lalu muka
balut kain nya tadi, nya meh seduai ia lalu tepeda ke duku ilang siti
siku sebaka amat, nadai belebas.
“ Nyadi ambi ke seduai nemu Sangor, Apoi….seduai deka nerima sumpah
penguji se umur hidup ari apai seduai nuan, aku enggai madah laban lama
laun penguji nya deka datai, seduai enda berasai kena empa sumpah nya,
kira ke udah tembu pengawa aku, aku ka mupuk ngiga menua bukai endur aku
diau, nyaga diri seduai nuan enggau manah” ko ular besai nya tadi lalu
ngelantar mansut kediri ari lubang batu, nyau merentum dinga seduai ia
labuh ke baruh. Tanah nyau berenyang endur ular nya ngebu ke diri mupuk
sepengudah ke bepuluh-puluh tahun nguan lubang batu nya.
Nya alai, udah nya ko jerita, seduai madi ia lalu mansut ke diri ari
lubang batu nya. Sebedau ke mulai kediri seduai ia lalu ngalit ke lubang
batu nya ngena batu besai sigi ambi ke orang enda nemu endur lubang nya
sampai ke ila-ila. Nya meh ke ngasuh kitai ke dudi diatu enda nemu ni
meh bagi endur lubang seduai ia ada menya. Tudah Sangor ke mai Apoi
pulai ke Bukit beluai ko jerita enggai madah ke diri udah bebini, laban
ia ka ngasuh madi ia tekenyit meda pemajik bini ia meh ko jerita. Ukai
nya baka ke nemu utai ulu-ili ga seduai ia. Kira ke ka ngasuh pangan
diri muji meh nya.
2.10 Empa sumpah datai ke selama-lama
Nya alai ko jerita, seduai madi nya tadi lalu mulai ke diri ngili sungai
nya. Seduai ke mulai ke diri nya tadi bela betusi ke jerita, bekunsi ke
penemu lebuh ke beserara ngiga pengidup suba. Nyangka meh kayu ke di
ujak ke seduai ia kelia udah genap timpoh 7 kali bebuah nitih ke jaku
janji seduai ia menya meh kini alai seduai ia ke pulai betemu baru.
Lebuh ke datai ba rumah, hari kira empai ga tentu lemai bendar. Tudah
bini Sangor lalu empai mulai kediri ari endur ke betanam. Seduai madi
lalu niki ke langkau. datai di langkau ko jerita, Apoi bisi ngasai ke
penyelaie siti. Diak ia tepeda ke gari orang indu bisi ba tisi peninduk.
Tang enda ga ia berani nanya. Lebuh ke mali ngagai dapur peda ia kemas
indah amat ga tusun semua utai ke bisi diak. “ Nemu amat bakih tu
belalai ke utai neh, kada enda bulih bini deh?, ni bini ia kini?” pia
deh ko peragam ati Apoi.
Tudah Sangor lalu ngagau ari ujung tanju ko jerita ngagau ke bini ia. “
Dayang, oh…wai…ni nuan, pulai dulu. Tua bisi temuai ditu…anang lama” Pia
deh ko Sangor ngangau ari ujung tanju sida ia diak. Ninga tudah Sangor
ke bisi nyebut dayang, tudah Apoi lalu nguji ga nyengok ari mua pelua’
sida ia. Nadai ga ia meda orang. Nya meh tudah runding Apoi nyau
kulu-kili, parai meh enti bini Sangor lagi tak indu ke di giga ia. pia
meh ko runding ia, tang enda patut ga nyau sampai bakanya. Ukai nya
pelaba aku, pia deh ko runding ia nyau mapap sepi ia.
Enda lama udah nya ko jerita, Dayang Siun lalu pulai ke langkau. Ia ke
pulai nya tadi ngemai buah entekai ke di pegai ia, kira ke ambi bisi di
ke lauk enggau anak temuai meh ko ati ia. Lebuh ia ke muka pintu, diak
deh ia lalu besabung mua enggau Apoi ke baru ka bebuka pintu ga pansut
ke ruai. Nya meh nyau temepar asai pangka ke kilat, taja kilat nadai
mangka, nyau bedentum munyi guntur, taja guntur nadai merentum, pengirau
ati seduai ia lebuh ke besabung perening meh nya ko jerita. Nadai endur
nyema ke agi utai ke di runding maya nya.
Tudah buai entekai ke di pegai Dayang Siun lalu labuh tebelengka ari
jari lalu bebelat ba mua pintu. Tudah Sangor ke ninga buah entekai ke
labuh nya lalu angkat ari dapur. Tudah Apoi lalu pansut terus ke ruai,
mata ia nyau segala bepinar-pinar baka arang ke mau’ di pijar api puput
peputan laju. Beguai-guai meh tudah dayang Siun ngambi entekai nya tadi
lalu di bai tama ke dapur enda bejaku seleka mukut. Tudah Sangor pan
lalu enggau ia ke dapur. mengkang enda nemu utai ke nyadi.
Nya meh ko jerita, tudah Apoi ke di ruai nyu enggai nyadi duduk jenuh.
Duduk ia asai ke duduk ba bara api ga di ruai, bediri ia asai ke bediri
ba madang duri. Naka meh ati enggau runding ia maya nya ko jerita. Ka di
sebut enggai nyadi, di padah ke enggai ga nyadi pansut. Nya meh indu ke
di kingin ati ia ke betaban lari enggau madi ia empu. Chukup enda ia
nyangka, chukup enda ia ngadang besai amat penguji dalam pengidup ia.
Udah ketawa nyabak baru, udah ka senang, merinsa baru.
Laban ke chukup bisa sumpah pengidup enggau mati seduai ia madi ari ke
di kandung menya, nya meh ke ngasuh pengidup seduai ia enda kala lantang
ari mula enchelak leka mata. Ada seduai ia ke dunya lalu nadai meda
indai, besai seduai ia lalu nadai ga meda pemarai apai, bebini seduai ia
te ulih ke utai ke ngasuh seduai ia belaya. Semua leman utai ke di
kereja dalam pengidup seduai ia ngenusah diri magang-magang. Kemuas-muas
ke berunding ke semua utai, Apoi lalu angkat ke bilik belubah-lubah,
lalu di ambi ia duku ilang pemeri indai ia ke di ambi ba lubang batu. Ia
lalu pansut ke ruai.
Nyau ngenang tudah Dayang Siun ga kitai, ia ke berapi lemai nya ko
jerita, nyau ambis betu’ kena tuchul api laban ke enda sedar kemuas ke
berunding. Ka madah ke Sangor enggai ga nyadi, enda di padah ke enggai
ga nyadi. Nya meh ia tu tadi nyau enda ulih ngadu ke utai memanah, asi
ke di panduk ia nyau bebau angus. Nya meh tudah Sangor lalu beguai-guai
nanjah api ngena aie. “ Nama meh nuan tu wai…enda ulih berati ke asi tu,
nyau angus tu.” pia deh ko Sangor bejaku tinggi mimit munyi nyawa ia.
Ia lalu malik ngagai Dayang Siun , peda ia dayang Siun nyau nyabak
ngenyit. Dayang Siun ko jerita lalu bejaku merap laki ia. “ Munsuh laki
ke bemalam ba tua nya wai…..ka munuh tua nya, suba ia kala udah mejal
aku jadi enggau ia, ia madah ke aku semina ulih jadi enggau ia, enti
enda di bunuh ia” pia ko Dayang Siun bejaku sirut-sirut. Dayang Siun
lalu nusi semua utai ke udah nyadi ngagai Sangor.
Nya meh ko jerita, ati tudah Sangor asai ke di pandam, runding ia tusut.
Baru ia sedar, bini ia nya meh indu ke ko Apoi. Ukai nya nemu ga tudah
tuai Apoi ke rindu ke Dayang Siun. Ia mega enda nemu diri lari naban ke
indu ke tuju ati madi diri empu, laban ia ke jadi enggau indu nya ari
asuh indai ia empu. Besai amat ga penguji ke nuntung pengidup, nama alai
enda abis-abis utai ke ka ngachuk, utai ke ka ngerusak pengidup ia
berengkah ari suba-suba. Pia meh ko runding ia, sama baka runding Apoi.
Ia nyau tusut runding, bakani ko ngatur, bakani ka nyeliah ke semua
utai, semua udah nyadi. Enda meh ulih di ke enggai. Terima aja meh nasit
pia meh ko jaku dalam ati ia.
Udah ia ke nemu nya tadi, angkat meh tudah Sangor tu ko jerita, ia lalu
nguji pansut ke ruai kira ke ka nerang ke semua utai ngagai Apoi. Ia
lalu pansut belubah-lubah nuju Apoi ke benung bediri chegi-chegi be
pegai ke ilang ba jari. Laban segi udah pedis ati, nyangka nya udah atur
petara ke nyumpah pendiau seduai ia kini, Apoi lalu nerais panjung.
“ooooooooo…biar mati, idup bepegai ba janji, woooooo…” pia deh ko
panjung tudah Apoi. Runding ia udah berachun amat.
Bebendar meh tudah Sangor tu tadi nerang ke ia semua utai, tang nadai
ulih masuk runding ia. Nyau mayuh meh utai ke enda di kepuas ke hati ia
pansut ari mulut. “ Segi nuan aja ke di kesayau ke orang Sangor,
aku….aku..sapa ke sayau ke aku, dah indai aku empu enda sayau ke aku,
anang ke nyata, dah ba mimpi pan ia enda betemu enggau aku” pia deh ko
jaku Apoi mansut ke utai ke ngapi ia dalam ati. “ Nuan ukai anak buai
Sangor, tang anak ke di asuh orang ngachau ngerigau pengidup aku” pia
deh ko ia bejaku sambil ke ngayun-ngayun ke ilang ba mua Sangor. Antu
achuk segi ba runding ia, antu ransi segi ba ati ia, nya meh ke ngasuh
Apoi enda sedar agi.
Tudah Sangor nadai ngelaban, ia ke bediri nya segi semampai enda ulih
bejaku agi ngaum ati Apoi. “ Sangor, enti nuan madi aku, enda nuan naban
ke Dayang Siun nya suba” ko ia agi bejaku. Nyau pansut peneka ia nyebut
meh jaku. Tudah Sangor ninga aja meh. Duai ia ke bekelikuh ba ruai nya
tadi makin nyadi. Tudah Sangor lalu enda ulih agi ngaum ati Apoi ke
ngeransi nya. Sangor pan nyau udah geram ati meda pendiau Apoi ke nyu
enda ulih padah-padah ke semua utai.
Nya meh ke ngasuh tudah tuai lalu tama ke bilik baru, lalu di ambi ia ga
ilang ke di beri indai ia ba lubang batu suba. Ati ia bangat gidan
ninga Apoi ke selalu madah kediri ka munuh seduai bini ia. Nama agi deh,
Sangor lalu pansut ke ruai baru. “ Kitu meh dek, nama bangat ka…nuan
bangat enda alah atur, Sebedau nuan munuh bini aku, aku dulu bunuh ulih
nuan” pia deh ko Sangor nyau enda tan ati agi. Bejaku nadai meh guna ko
ati ia, bebunuh meh, nadai chara bukai.
Nya meh ko jerita, duai madi ia pan lalu ke danja sebelah ruai nya diak,
Hari hujan bangat lebat mayanya ko jerita, ribut mumput nyau munyi ke
ka ngangkat ke langkau sida tiga ke diak. Bini tudah Sangor bangat nadai
daya, ia naruh diri di bilik laban takut ke di bunuh Apoi. Apoi lalu
mantap pemantap ga ke duku ilang ia ngelawa Sangor, Sangor mega sama
bakanya. Tang seduai ia bela sikar nyilat pantap siku-siku. Sama bela
kering, sama bela sikar. Madi nadai kira agi, kira ke munsuh meh ba mua
mata seduai ia.
Nya meh ko sida ke nusi ke aku (penulis) seduai ke bepantap tu chukup
lama ko jerita, nyau besehari-sehari seduai ia ke belaban. Lalu enda ga
ulih ngalah ke pangan. Tiang enggau kayu sebelah ruai nyau kebichai
ambis kena pantap. Lebuh ke enda kena silat pantap tadi lalu kena ga
tubuh, tang enda ga bakal ko jerita. Nya meh ke ngasuh seduai ia bangat
enda ulih munuh pangan diri. Seduai ke belaya tu suba ko orang nusui
ukai ke sebulan dua tang betahun-tahun ko jerita. Tang enda ulih ga
ngelaban pangan diri.
Nyau ke pengujung seduai ia ke bepantap nya tadi, diak deh tudah Dayang
Siun lalu kempang ati ko jerita mansut kediri ari ke belalai. Ia enda
sanggup agi meda pemerinsa seduai nya madi ke belaya ngenyadi-nyadi nya.
Pansut deh ia ke ruai peda ia seduai madi nya nyau udah di tanju din be
pantap, gelegar ruai nyau ambis patah magang endur seduai ke belanda,
engkechit belaban enggau pangan diri. Ba tanju din bakanya ga ko jerita,
nyau begegar, nayu beguyat semua utai kena rimbas ilang enggau tubuh
seduai ia ke belaban enggau pangan diri.
Tudah Apoi enggau Sangor seruran nadai daya ko jerita ka munuh pangan
diri, ni ke mukut, ni ke nyipak, ilang nyau bekerending aja munyi
besatup kiba –kanan. lalu bedau ga pedis, anang ke pedis, nyau baka ke
kebal agi tubuh duai ia ko jerita, lebuh ke kena tubuh ilang seduai ia
nyau bekerending munyi ke mantap batu anchau. Lebuh seduai ke bebukut
nya ko jerita, asai ke mukut dinding batu. Ni nya alah laban ga pangan
diri, ba ia udah sumpah petara.
Nya meh ke ngasuh Apoi enda liat ko jerita, lalu engkechit deh ia ngagai
tudah Dayang siun ke bediri merati ke seduai ia ke belaban nya tadi,
enda mukai mukai ia lalu nerais panjung mumpung pala Dayang Siun ko
jerita, Kilat enggau ngitar lalu nyepar mangka ke menua nya, ribut biau
balai lalu muput naka pemalat utai, munyi guruh nyau merentum naka
penginggar-inggar ko jerita lalu di sempulang ke enggau hujan ke
ngemetang ke menua. Peda nyau ensambur darah pansut ari rekung Dayang
Siun ko jerita. Pala Dayang Siun lalu engketik ari tubuh lalu bebelat
nyentuk ke ujung tanju lalu bebelat labuh ke parung ba tebing aie sungai
di kaki Bukit Beluai ko jerita.
Mati meh tudah Dayang Siun, tubuh ia enda rebah ko sida ke nusi , tubuh
ia seruran bediri chegi-chegi semina pala ke nadai. Nya meh ke ngasuh
sangur temati kutu, ilang lalu tebelengka ari jari, ia lalu berumban
merap tubuh bini ia ke udah nadai daya agi. Nyabak meh tudah tuai naka
ia penginggar-inggar. Bala jelu menua nya ko jerita, ambis lari ke puak
kampung takut ke bengal ninga terais sabak Sangor.
Tudah Apoi pan enda berasai ko jerita lalu ngerebah ke tubuh diri, ia
lalu nuduk kediri ba tisi Sangor enggau Tubuh Dayang Siun. Sepengudah ia
ke mumpung pala bini Sangor baru ia ngasai ke penulah enggau pengawa
diri ke salah. Baru seduai ia menyadi tu nemu, tu meh sumpah ke pemadu
besai dalam pengidup seduai ia, ke enda di padah ke semua orang ke bisi
bejaku enggau seduai ia ngelamatu.
Laban ke chukup nasal ke ulah diri, Apoi lalu belubah –lubah angkat ari
penuduk ia ko jerita, diak ia lalu besemaya ba mua Sangor, “ Laban tu
penyalah aku Sangor…aku nyumpah diri, enda ulih ngindik ke kaki ba menua
tu agi, Tang taja pia aku tetap ingat ke semua pekara ti nyadi dalam
pengidup tua sampai ke mati lalu enda berubah seagi dunya tu enda
bebali” pia meh ko jaku Apoi. Lalu nyau meh Apoi tu ko jerita belanda
ngelapu kediri neresa kampung jerung menua nya. Lari meh ia tu tadi muai
menua enggau menyadi diri di Bukit Beluai.
Apoi ke mupuk ninggal ke Sangor enggau bangkai bini ia menya ko jerita
lalu datai ba menua siti. Diak meh endur ia ke chukup nesal ke penyalah
diri. Nya meh ke tungkah ia lalu besampie ngagai petara indai ia ke
benama Dayang Rinai, minta sumpah laban ari penyaie ia ngagai aka ia
Sangor bakanya. Nadai chara bukai kena ia nerima ukum enti enda ari
indai ke ngada ke ia empu. Lebuh ia ke bediri ba tengah menua nya ko
jerita, tubuh Apoi lalu di pangka ke ngitar lalu bebali nyadi batu. Batu
Apoi tu ko jerita agi bisi di peda kitai ba menua ulu Temburong Brunei
ke diatu. Nunda ke sumpah ia kelia, ia segi enda ulih agi ngindik menua
kitai Sarawak. Anang ke ngindik, dah tubuh ia empu pan ba menua Brunei.
Udah jauh ngejang ari menua Sarawak.
Ngenang Sangor ke nyabak ke pemati bini ia ko jerita, Lama meh ia nyabak
menya, sampai ke titik aie mata Sangor lalu betumbuh nyadi mata aie
nerusur ari Bukit Beluai ko jerita. Laban ngenang penyayau bini ia ke
ia. Diak deh sangur lalu ngubur ke bini ia bediri ko jerita. Ketanda ia
meruan sayau ke bini ia belama-lama. Sangor lalu nanam bungai ke
manah-manah ba tisi bangkai ia menya ke agi bisi di peda kitai ba bukit
nya sampai ke saritu. Nyadi bungai nya kala suba ka di bai orang, tang
di ambi orang mimpi, asuh anjung pulai baru.
Laban ke chukup sunyi, diak deh Sangor ko jerita lalu nanam tubuh diri
sepiak ari kanan tubuh bini ia. Seduai ia sama bediri chegi-chegi. Diak
deh ia lalu besampie mega ngagai petara indai ia Dayang Rinai. Bakatu ko
sampie ia “ Indai, aku ada ari batu, bini aku di ambi aku mega ari
batu, nya alai asuh meh tubuh kami duai pulai baru mati nyadi batu” pia
meh ko leka sampie ia.
Udah ia ke besampie nya tadi ko jerita, hujan lalu bangat labuh naka
pemesai-mesai leka. Hujan batu nya lalu mali tubuh enggau darah seduai
bini ia nyadi batu. Darah bini ia ke meachir-achir ba parung din pan
nyadi batu ari titik darah ke mit nyentuk titik darah kebesai ko jerita.
Nya meh ke ngasuh kitai ulih meda nyentuk ke sari tu batu darah Dayang
Siun meachir-achir nurun Bukit Beluai. Pala Dayang Rinai ke labuh ke
parung tisi sungai mega diatu agi ulih peda kitai ba tisi aie terusan.
Baka pala mensia amat meh nya diak. Agi bisi kebung mata, idung. Enti
menya agi berupai amat ko sida ia, diatu nyau kurang agi laban utai tu
ke nyadi bejuta enggau beratus-ratus tahun ke udah lalu, tang agi di
kenang sampai ke saritu.
Batu Sangor enggau bini ia agi chegi-chegi sampai saritu, ulih di peda
kitai bebatu-batu penyauh ia. Sekumbang ke nengah jalai nya suba aku
(penulis) ulih ngasai ke tanda pengerindu seduai ia ke pangan diri dalam
ati. Laban batu nya segi tampak di peda ari jalai nengah Tang Sangor
ngagai menua Murut Tagal di Long Tengoa Lawas sampai ke seharitu.
3.PENGUJUNG
Nya alai arap ke jerita lagenda Batu Sangor enggau Batu Apoi tu enda
nemu lesap ari pengingat kitai, ke lebih agi ari pengingat bansa ke agi
nguan menua nya nyentuk ke saritu. Arinya meh ketungkah ia mensia menua
nya, nyebut Bukit Beluai nya Bukit Sangor Sampai ke saritu, lalu
besepiak aie enggau Bukit Sangor diatu, bisi siti rumah panjai bansa
Lunbawang ke diberi nama Tang Sangor agi di wan bansa Lunbawang sampai
ke diatu.
Ambi ke kitai nemu, Bukit Sangor nya suba di jaga remaung ko jerita.
Laban diatu pan agi bisi lubang remaung nya diak. Remaung nya meh ke
selalu di ambi orang mimpi kelia lebuh sida ia agi semak enggau antu,
jelu enggau pengarap lama. Nyadi bungai ke di tanam Sangor ko jerita,
agi bisi di peda nyentuk ke saritu. Tang lebuh orang ke ka ngambi bungai
nya di tanam di baruh ia enggai tumbuh. Bungai ke tumbuh ba bukit nya
enda ulih idup ba tanah baruh.
Nya alai ke pengujung ia, aku ngarap ke kitai ke agi idup ulih bechuan,
beteladan ke jerita tu sampai ke serak tubuh uchu-ichit kitai ambi ke
kitai ulih diau gerai nyamai, nadai apa ko petara, gayu meh kitai idup
nguan dunya nyentuk ke belama iya………………………AMBIS……………………………………………
Tiada ulasan:
Catat Ulasan