LABONG NABI MOHAMAD

Udah meh ngejang ke Gerama Engkabang nya tinggal kediri diri dia Munsang pan lalu mupok begadai gadai betiti ka dan kayu ngarap kediri tau bulih utai bukai ke empa kelimpah ari ke be pakai ke manok ti di tupi anak Mensia.

Nyadi nyau kepuas iya ke bejalai nya , dia iya pan lalu datai ba lebak siti ke penumbas iya penalam serta landai bendar gamal kaki lebak nya tadi. Nyau malik ke kanan malik ke kiba ga tudah Munsang nya tadi nyangka bisi bala kaban iya bemain dia. Tak enda mukai mukai iya lalu tekenyit bendar serta takut meda pemesai siko ular Sawa ke benong ngunjor kediri lalu ka nangkap Pelandok ke benong makai buah buan. Sawa.

“Oh ! Anang guai dulu nuan Sawa makai aku. Minta tanggoh dulu aku tu, nganti aku udah madah ngagai ini aku enggai ke sida enda nemu penungg aku ke mindah tadi.” pia ko Pelandok ngelimpang ka Sawa.

“Nganti aku udah madah ke penungga diri ngagai ini aku, lagi aku kitu ka baru. Nadai mimpi aku tu bengat enggai di empa nuan nya Sawa.” pia ko Pelandok ngarap ke Sawa nya enda ringat lalu ngelepas ka iya.

“Ni penyauh endor ini nuan ari alai tua tu betemu tu,” pia ko Sawa nanya Pelandok.

“Nadai nya jauh deh, ngilah munggu siti nya alai iya tadi ngiga buah buan,” pia ko Pelandok.

“Alai meh nuan, jampat ke agi madah ngagai ini nuan nya, nyau lapar bendar perut aku tu” pia ko Sawa ga nimbal Pelandok.

“Kati ko nuan tu lagi , chukup aku tu di empa nuan laban aku tu tak mit bendar . Kenyang nuan makai aku siko tu aja,” pia ko Pelandok ga majak ngelimpang ka Sawa.

“Enti munyi nya lalu bai sama ngagai aku kitu ga ini nuan nya lagi, ngambi ke aku kenyang agi ga nelan seduai,” pia ko Sawa ga ngasoh Pelandok nya jampat ka agi.

“Au meh, nuan anang mindah ke bukai tak nganti aku ditu aja,” pia ko Pelandok lalu beguai guai belanda ngelari ke diri ari ke kena telan Sawa nya tadi.

Udah meh Pelandok nya mupok Sawa pan lalu nyengkilong kediri semak bandir tapang lalu nindok kediri sementara ke nganti Pelandok nya tadi datai baru. Pelandok ke mupok tadi ukai tak mupok ngapa, nyau besebun tebing lebak nya kena keranjai kaki iya ke rari ngidup kediri.
Iya meh Pelandok ke ngelari ke diri nya nyau datai ba punjong bukit ba atas lebak nya iya pan nyau temati kutu nadai runding agi laban ke betemu enggau Remaung Raras ke benong ngali kediri ba pun kayu mengilas.

Remaung Raras nya pan lalu tekenyit ga ninga rejat kaki Pelandok nya ke mansang ngagi iya ke gali nya tadi. Remaung Raras lalu nadai runding agi lalu ka nerkam Pelandok nya tadi, laban iya endang beridup bepakai ka jelu ti mit baka sida Pelandok nya.

“Eh ! Anang guai dulu nuan aya Remaung Raras. Aku tu mansang ka madah ke ini aku, minta iya ngambi labong Nabi Mohamad temu aku ba baroh kaki lebak nya tadi,” pia ko Pelandok ga majak ngemula ka Remaung Raras.
“Kati gaya gamal labong Nabi Mohamad nya deh, laban aku tu nadai kala ninga utai nyelai baka nya ngelama tu,” pia ko Remaung Raras.

“Oh ! Tak naka iya pemanah nya di anyam peda aku. Nyau besurik surik serta begenarau lalu benyeling perenching. Nadai aku tu kala udah meda utai ngemanah nya di dunya tu,” pia ko Pelandok ga nambah ka pemula iya ngelakar Remaung Raras nya tadi.

“Dini alai labong Nabi Mohamad nya deh ? :Lagi meh aku ngambi iya enggai ke di temu orang bukai,” pia ko Remaung Raras ga nyaut Pelandok.

“Dini nuan tau ngambi nya ngapa deh. Sigi ka di asoh aku ambi ini aku kena iya nanchang sintal kain,” pia ko Pelandok nyaut ngaga diri enggai.

“Enti munyi nya, ini nuan nya lagi aku empa enti iya enggai alah meri nya ngagai aku,” pia ko Remaung Raras ga ngeras diri ka beempu labong Nabi Mohamad.

“Tak naka naka iya sayau meha aku ke labong Nabi Mohamad nya deh unggal Remaung Raras tang ga nuan keras bendar ka beempu, tang nya meh aku tak naka iya minta kasih ngagai nuan , anang ga nuan makai ini aku nya ,” pia ko Pelandok.

“Alai meh Remaung Raras, ngambi kediri nuan ba kaki lebak nyin. Bisi tadi gulong ke aku semak bandir tapang,” pia ko Pelandok madah ngagai Remaung Raras. Iya lalu tuchum malik ke bukai geli hati meda gamal Remaung Raras ke ka ngambi Sawa nya nyadi ke labong.

Remuang Raras pan lalu naka iya pengaga nya hati lalu beguai guai engkechit ari alai iya ke gali nya tadi mansang belanda nurun ngagai kaki lebaki laban ke ka ngambi labong Nabi Mohamad munyi ke di tusoi Pelandok nya tadi. Pelandok pan baka nya ga lalu beguai guai ga belalai engketut ba bandir bandir mengeris laban ka mending ka munyi Remaung Raras nya berekak belaban enggau Sawa di baroh kaki lebak nya.

Enda lama udah nya Remaung Raras ke nurun ngagai kaki lebak pan nyau datai ga ba alai labong Nabi Mohamad munyi ke di padah ka Pelandok nya tadi. Nama agi deh Remaung Raras nya naka iya pengaga ati meda pemanah kulit Sawa ke di kumbai iya labong Nabi Mohamad, lalu enda chamang chamang ka nguji melit ka labong Nabi Mohamad nya ba punggong iya.

Sawa ke tindok nya tadi pan naka iya tekenyit ati niinga bisi munyi jelu bukai datai mansang ngagai iya tang nyangka nya ini Pelandok. Sepi Sawa nya tak berunyut tubuh iya ke begulong nya tadi di runtun Remaung Raras ngudu nya. Nama agi deh tak nadai maioh runding tudah Sawa lalu beguai guai melit tubuh Remaung Raras ke ka nguji nanchang iya ba punggong ngumbai nya labong Nabi Mohamad.

Remaung Raras pan nyau kual kual nyepi perekoh Sawa nya tak nganchin naka iya pengudu. Nama agi deh tak lalu enda tepadah kediri parai Remaung Raras nya kena belit Sawa laban ke di kumbai Sawa nya ini Pelandok.Udah meh Remaung Raras nya parai Sawa pan lalu nelan Remaung Raras nya segala gala. Leboh iya ke nelan Remaung Raras nya Pelandok endang tak enda engkeretik laban takut lalu ngelalai kediri ba bandir mengeris ngemata ka pengawa Sawa nya tadi.

Leboh Sawa nya nyau kemas udah nelan Remaung Raras, dia Sawa pan lalu ngunjor kediri ngimbai tisi batang lalu tindok baru nat ke perut iya ke nyau gentong laban kenyang. Udah nya baru Pelandok ngemerani ke diri pansut ari bandir mengeris junok junok mansang ngagai Sawa ke baru ka tindok nya tadi.

“Kati ko asai sepi nuan Sawa, kenyang nuan nelan ini aku nya tadi ?” pia ko Pelandok tuchum ketawa malik ngagai Sawa ke nyau chudur leka mata ka tindok.

“Akai rai, ukai sebut enda agi pengenyang perut aku tu. Tau enda iboh ga aku makai nuan ke sekali tu. Nganti nuan nyau besai agi ila, nya baru aku makai nuan,” pia ko Sawa majak ka nindok kediri enda iboh ke Pelandok ke bediri ngibai iya dia.

“Lapa nuan enggai maka aku diatu deh, enda nyamai bendar aku tu di tinggal ke ini aku kediri diri ila,” pia ko Pelandok nganu Sawa.

“Tak nyau segai asai perut aku tu. Nadai alai agi perut aku tu endor nelan nuan, tak naka iya pengenyang aku tu Pelandok,” pia ko Sawa

“Lantang bendar meh ati nuan diatu nama udah nelan ini aku nya lalu ka tindok,” pia ko Pelandok.

“Ukai sebut enda agi, naka iya ka pengelantang. Lama aku tu tindok tau enda iboh mindah ngiga pemakai laban udah kenyang nelan ini nuan tadi,” pia ko Sawa ga nyaut Pelandok.

“Kala nuan meda gaya orang ngajat ngena bungai langkah ajat bunoh? “ ko Pelandok nanya Sawa, majak nanya enda iboh ke Sawa ke ka nindok kediri.

‘Nadai aku kala meda utai munyi ko nuan nya deh, kati nuan nemu gaya langkah nya,”pia ko Sawa ga nimbal laban enda kala ninga utai nyelai munyi nya.

“Oh ! Tak naka iya penemu aku tu laban endang di ajar sida niang aki aku menya utai ke baka nya enggai ke kitai alah uti belaban enggau orang,” pia ko Pelandok nyaut Sawa.

“Uji bantai ke dia laban aku ka meda, tentu nya balat ngerindu ka ati laban nadai kala di peda,” pia ka Sawa ga nimbal lalu enda nyadi tindok nginga utai tusoi Pelandok tadi.

Pelandok pan lalu belaboh ngajat bunoh munyi ke ditusoi iya ngagai Sawa. Leboh ke ngajat nya Pelandok lalu engkechit ke kiba, merejok ka kanan, endit ke moa lalu ditumbit iya ke belakang. Nyau ke lama iya ke ngajat, dia iya lalu merejok serta nepan ba atas perut Sawa ke nyau gentong udah nelan Remaung Raras nya tadi. Tujing kaki iya keempat empat iti nya lalu terunjam ba isi perut Sawa nya tadi. Sawa pan lalu mengkuda ngelingkang ensepi perut iya tak naka iya pemedis.

Sawa pan lalu nguji ka nangkap kaki Pelandok nya tang lalu enda ulih laban Pelandok ke sempat engkechit ngagai batang ke ngimbai Sawa nya tadi. Naka iya ka pemedis ati Sawa nyepi diri udah di keduan Pelandok baka nya. Bisi ati Sawa ka ngagai Pelandok nya tadi tang tuboh iya enggai nyadi di bai mindah laban udah kenyang bai nelan Remaung Raras. Pelandok lalu rigang rigang bediri ba atas batang meda gamal Sawa ke nyau kual kual enggai nyadi di bai mindah agi.

“Apin nya ! Enti aku udah mantai ke bungai langkah “Chekak Pua Lanchau Chibai” balat agi nuan pedis laban aku. Keruntok pala nuan nya kada enda ruboh laban tunjing kasut aku tu, enti aku udah ka bendar,” pia ko Pelandok nganu Sawa.

Sawa tak nyau peli peli ngapa leka mata laban enggai nyadi nyaut agi mai ati ke merinsa serta pedis perut udah ke bekau terunjam tunjing kaki Pelandok nya tadi. Nyau ke puas nat ke pemerinsa baka nya dia Sawa pan lalu parai Pelandok pan lalu mupok baru mindah ngagai alai bukai ninggal ke bangkai Sawa nya tadi ngiga pemakai. Naka iya ka pengaga ati Pelandok meda Remaung Raras seduai Sawa sama udah parai lalu nadai agi ngachau iya ngiga pemakai ba kampung nya.