..BULAN BEGANTI BULAN, TAHUN PAN NYADI, SIANG APUS BEGANTI MALAM, UDAH ARI SITI, DI GANTI GA ARI SITI………….
Seduai madi tu tadi lalu berunding enggau pangan diri. “ Adi..asai sepi
aku, chukup meh maya tua tu ngatur pendiau diri. enda meh tua tu ulih
begulai baka tu belama, uji tua mai kaki diri begiga ke pengidup bukai
ambi ke tua enda sunyi” pia deh ko Sangor bejaku ngagai Apoi.
Tudah Apoi ke benung duduk nunga tugung salai seduai ia enda bemunyi
ninga Sangor munyi nya. Segi ulih di tangkap ia ga sagam jaku madi ia tu
tadi. Reti nya ngatur pendiau diri begiga ke bini meh nya. Laban seduai
ia ke segi udah lama bujang raya.”Enti nuan udah munyi nya, aku nitih
aja meh aka, ka pan enda, aku enggai meh idup baka tu belama ia”pia deh
ko timbal Apoi. Nyadi seduai ia ke besemaya nya tadi deka angkat nitih
ke pejalai kaki diri meh. Kira ke nadai lebas meh kini tunga. Pemai ati
enggau kaki ke nyingkang pia meh ko janji seduai ia.
Nya meh pagi siti, seduai ia tumu angkat dani kira ke nyendia ke diri ke
ka mutar ke diri matau menua ngiga pengidup. Sebedau seduai ia ke
mupuk, seduai ia lalu beberap sinu meda pangan diri. Ukai nya kala
beserara ga seduai ia kenyau ari mit menya. Dia deh seduai ia ngaga
semaya, Sangor lalu ngentak ke anak kayu siti ba entara seduai ia. Ia
pan lalu bejaku munyi tu “ Ukai enda udah tujuh kali bebuah kayu tu ila
baru tua tau pulai ke menua baru,” pia deh ko semaya duai ia.
Nya alai sepengudah nya, mupuk meh seduai madi tu tadi bepusin betunga
belakang bekejang enda temu kini penunga, semina meh ke nitih tunga tuju
kaki ke nyingkang.Nyadi keno ko sida ke nyebut, kayu ke di ujak ke
seduai tu suba lama idup. Tang nyau udah tumbang laban ke di ulih ke
bala Murut Tagal (Bansa Tagal ) kelia nyadi ke terabai kena belindung ke
tubuh lebuh maya sida ke ngayau bala Lunbawang ba menuanya. Kayu nya
kering ko sida ia, tang ukai kayu tebelian baka ke diatu. Nadai agi kayu
nya ba Pulau Borneo tu diatu, laban siti aja pun kayu nya suba ke
nyelaie ari kayu bukai.
Enti nitih ke cerita rayat bala Murut Tagal, kayu nya madi telesak kayu
ke di peda kitai ba bulan di langit din. Nya alai enti kitai meda bulan
ari dunya tu baka bisi pun kayu din. Bisi mega cerita sida madah ke kayu
nya empu ke ba bulan din, udah lapu-lapu terangkat lalu terengkah ba
bulan ko cerita tuai sida menuanya. Kebuah alai kayu nya terangkat ke
bulan kin ko sida ia ketegal ke pedis ati laban Bansa Tagal ke ngambi
batang ia, diak ia berasai pedis, lalu lari malam hari niki ke langit.
Pia meh ko padah sida ke nusui.
Nampung baru meh kitai ngagai duai madi ke beserara pejalai tu tadi. Ia
meh ko jerita, sehari-harinya meh tudah Sangor tu bejalai ngulu aie,
ngili aie, bukit tiki, tinting di titi. Semua lepak kerapa di serungkai
ia lebuh ke bejalai. Lebuh ke lapar, makai ga iya buah kayu ke bisi di
temu ia, laban suba ia ke kala belajar ari Bunsu Burung. Lebuh malam
tinduk ga ia sebelah bandir kayu ke bisi di pansa ia sebelah rantu
jalai. Lama meh ia ke bejalai tu tadi baru ia tetemu ke siti menua ke
mayuh amat utai di tanam.
“ Apu, menua nama tu kini. Landik amat orang tu betanam ke utai neh,
nyadi magang-magang” pia deh ko ati tudah tuai bejaku kediri. Peda ia
semua macam utai tanam ke tau di pakai bisi magang. Ambis munggu sepiak
nyau besabung ga enggau munggu sepiak. Semua utai di tanam nyadi
magang-magang. lama ga tudah tuai nguji berati ke menua nya nyagka ke
bisi meda ayas orang. Tang nadai ga bisi di peda ia. Hari majak
lemai-selemai, nyau belabuh silau. Nadai ga orang di peda ia.
“Ah..dah. ni meh orang tu kini, enda ngawa bemalam dulu ga aku nganti
ditu, enda alah tak kumbai orang ka ngenchuri lagi” pia deh ko ia
mut-mut kediri. Ga nadai orang enggau bejaku, ka pan enda bejaku kediri
meh. Lebuh hari nyau malam, Sangor lalu begiga ke lapik peninduk ia,
laban sebelah menua nya ke nadai kayu ke manah ulih endur niki ninduk
kediri. Semina pun utai di tanam aja ke bisi. Nama agi deh , tak ngiga
jugu tanah meh endur ia nyandih lalu nyamai gali melintang tinduk.
Lebuh ke tinduk malam nya diak deh sangor lalu bemimpi betemu enggau
siku indu, bajik amat indu nya peda ia. Enti ia kala meda indai ia pan
nyangka enda meh ngemajik nya pelaba ati ia. Laban ke ari mit enda kala
meda mua indai ia deh. Diak deh indu nya bejaku “ Wat..Anang guai nuan
ngelawa menua nya wat. Empai maya ia, ila baru nuan tau kia. Kin ke tuju
nuan dulu, bisi siti bukit ke tinggi ari semua bukit ba menua tu, anang
enda nuan kin wat, bisi utai ke patut di ambi nuan din” pia deh ko indu
nya bejaku. “ Iya sapa nuan deh?...”pia deh ko Sangor betanya dalam
mimpi ia. Baka ke nemu ga ia betanya ke utai munyi nya. “ Eh..enda ibuh
nemu nuan dulu wat. Bisi maya nuan nemu ila deh. aku empu madah ke nuan
ila, ba nuan anang enda kin” pia deh ko indu nya nyaut baru.
Nama agi deh, pagi nya tumu amat ia mupuk bejalai, begiga ke bukit ke di
padah ke indu ba dalam mimpi ia. Tetemu kebukit lalu ditiki ia ga,
palik ia ke bukai, peda bisi ga bukit tinggi agi, nya meh ke ngasuh ia
tu tadi nyau majak jauh pejalai. Mayuh munggu udah di tujah ia. Aie
mayuh aie ga udah di tengah, tiap kali ia niki bukit, bisi belama ga
bukit tinggi arinya ko jerita.
Nya alai, limpang dulu meh kitai ngenang Sangor ke begiga ke bukit
pemadu tinggi nya tadi. Kitai ngenang pejalai Apoi ga diatu……………………
Bejalai meh tudah Apoi ko jerita, nadai malik kebelakang agi. Bejalai
enda ngetu-ngetu. Kekadang lubah, kekadang laju mega ia. Lebih kurang
baka pendiau Sangor ga ia sebelah kampung jerung. Laban umba ke segi
anak petara, ukai nya bangat pedis ga ia meraka menua siti, ngagai menua
siti. Lama agi kitai ke bejaku. Munyi ko jerita orang, sekelip mata aja
ngaga pengawa laban ke segi berantu.
Bejalai meh tudah Apoi tu tadi lalu ngembus ngelawa ulu sungai siti.
Lebuh ke ngulu sungai nya diak deh ia tepeda ke mayuh amat ikan ba
sungai nya ko jerita. Ga bebesai ikan diak. Ia lalu berunding bakani
cara ka ngulih ke ikan nya. Ukai nya bisi bubu ga di bai ia. enti baka
kitai ke dunya diatu nyamai meh, tak bai ke jala enggau pukat. Menya
ukai nya bisi rengka bakanya deh. Nya alai lebuh ia ke berunding nya
tadi, ia lalu duduk ba tebing aie sungai nya sambil ngulur ke kaki ia ke
dalam lubuk siti. Lalu di ayun-ayun ke ia kaki. Lebuh ke duduk nya ko
jerita jari ia nyabut urat kayu siti, lalu di pulas-pulas ke ia, lalu di
tikau ia nuju puak aie, sekira ke ka meda tagup ikan ko ati ia.
Peda ia tak nyelaie pendiau ikan jamah getah kayu nya, nguji ga ia muai
mayuh agi, peda ia nyau kechapak bala ikan baka ke mabuk. Nyau di gali
ia mayuh ke agi ga urat kayu nya ko jerita. Udah ke tembu ngali urat
kayu tu tadi deh. Ia pan lalu nanggung semua batu kena nekat aie ba
endur lubuk nya, ambi ikan enda anyut kili ke ko jaku ia. lalu di
tenchang ia urat kayu nya tadi peda tak beentali getah burak pansut ari
urat nya ngejung ke ikan nyau pansut ke tisi magang-magang.
Nya meh ke ngepun ke peturun Bansa Murut tu kelia nemu nguna tubai ko
cerita sida ia. Laban ke nunda Apoi anak petara tu. Nyangka meh ba gela
nama petara tu ba Jaku sida ia lain kini. Laban nama petara siti-siti
bansa ke enda sama. Siti agi pekara ke di ketati ke kitai, Ba entara
menua Long Beluyu enggau Ba’kelalan ke diatu ko sida ia nusi bisi siti
batu ke panjai melintang baka dinding ba sungai menua nya, Bisi sida
madah ke batu nya meh ke di kena Apoi kelia nyempal lubuk ke endur ia
nubai ikan menya.
Tang orang ba menua din bisi ga nyebut ukai, ko sida ia batu nya asal
ari bala rumah panjai siti ke lari sambil bepegai ke jari ka nyemarai
sungai, sida ke lari tu lari ari kudi laban udah ketawa ke jelu Rimau ke
ulih panjuk. Tang lebuh sida ke nyemerai nya kudi batu lalu mangka sida
ia, semua sida ia lalu bebali nyadi batu. Tang ba genturung pendiau
bansa Tagal sida ia agi pecaya ke batu nya, batu ke di kena Apoi nyempal
lubuk lebuh ke nubai. ( Aku (penulis)ukai ka ngubah runding kitak tang
ukai nyebut sapa ke betul-sapa ke salah, laban tu semina cerita aja.
Nyangka nya tak beumba-umba ke sama kini. Anang meh kita nganu aku
(penulis) enti sema ke salah, laban aku (penulis)ke nerima tusui ari
mayuh penatai siku-siku. Minta ampun aku au…)
Amat agi ulih peda nyentuk kediatu batu bedinding besai din melintang
meraka sungai. Ba entara menua Long Beluyu enggau Ba’kelalan. Nya alai
uji kitai berunding, ukai semina Bansa Murut tu bisi bepenti anang
ketawa ke utai nyelaie baka jelu, dah kitai iban pan enda tau enggai ke
kudi nyadi batu. pia meh ko orang ke tuai madah. Nya alai nyambung baru
meh kitai ba senentang Apoi tu ke nubai tadi, naka meh pengaga ati ia
deh bulih ikan bangat ngemayuh nya.
Lemai nya lebuh ke udah kenyang makai ikan, dia deh ia lalu ngali ke
diri. Baru udah ka mejam ke mata meh ia alai ia tekenyit, ninga utai tak
merengong bebunyi melintang anyut ari ulu sungai nya ko jerita.
Tekenyit amat meh tudah tuai, peda utai nya tak ngerayap niki
begadai-gadai naka ia pemesai utai. Lama kelama semak agi ga utai nya,
nya baru ia tepeda ke jagu’ chura burak siku naka ia pemesai benung
merangap ke mulut, baka ke ka nagup ia. Apoi lalu angkat, besedia takut
ke jagu’ nya lagi tak nyerang ia enda pe iga-iga.
Lebuh Apoi ke bediri megai sangkuh ia ko jerita, jagu’ nya peda ia nyau
segala mansau leka mata. nyau bepinar be api-api leka mata peda ia. Apoi
lalu ngemerani kediri bejaku “ Oh…nama nya aya, nama meh utai ke bangat
ngasuh nuan ngesah aku kitu?” pia deh ko Apoi nguji betanya. Enti baka
diatu nyampau meh Jagu’ nemu bejaku ne bakih. Nya meh tadi dinga lalu
bedemuh deh Jagu’ burak tu tadi lalu bejaku nimbal ia. “ E..nuan tu,
bangat enda nemu ngalau ke aku ga pemakai, ambis semua pemakai ke di
inang aku ngelamatu di bunuh, pakai nuan”pia deh ko Jagu’ tu bejaku.
“Oh..minta ampun aku aya…ukai nya aku nemu semua utai nya inang nuan
deh, aku ga lapar, ni enda ngulih ke deh. Enti aku salah anang meh munuh
aku tak ukum ga aku” pia deh ko Apoi nimbal jagu’ tu tadi. “ Enti munyi
nya, enda ga aku munuh nuan, tang ila nama kitak dulu mungkal bala
kami, bisi penulah kitak ila endur kami bebalas,” pia deh ko jagu’ tu
tadi bejaku. “ Laban nuan ke minta ukum, nya segi patut. Aku minta siti
aja ari nuan, uji ngiga ke aku jalai tang ukai ari pantai, aku ka ari
dalam aie kena aku nyamai ngiga pemakai ke menua bukai. Ka pan aku ditu,
nyu udah ambis lengis gasak ke nuan” pia deh ko Jagu’ bejaku.
“Au meh…aku sanggup laban ke segi salah aku, nganti dulu meh nganti aku
udah ngemas diri dulu” pia deh ko Apoi nimbal Jagu’ tadi. Ia meh udah
tembu, seduai ia pan lalu nyelam dalam aie din. Seduai ia ke nyalam nya
ko jerita, lalu begiga ke endur ulih tetemu ke jalai endur ngerembus ke
Jagu’ tu tadi ngagai aie sungai ke bukai.
Nya alai seduai ke nyelam tu tadi di lengka ke aku dulu naka tu laban
kitai ngenang baru tudah sangor tu ke begiga ke bukit pemadu
tinggi……………….
2.5 Sangor begiga ke bukit pemadu tinggi
Nya meh ko jerita, ambis munggu, ambis menua udah di tujah Sangor endur
ia begiga ke bukit pemadu tinggi. Lalu bedau ga ia tetemu ke bukit nya.
Tiap kali ia ke niki sigi-sigi bukit, tang bisi ga di peda bukit ke
tinggi agi ari nya. Nya meh ia tu tadi lalu nguing nuju ujung menua ke
atas kin. Bejalai meh ia tu tadi ko jerita, dia baru ia tepeda ke siti
bukit ke amat tinggi, nyau nyuruk remang ko jerita.
Datai deh ia ba kaki bukit nya, ia lalu nuduk ke diri ba pun kayu siti.
Laban ke udah ransing ati tetemu ke bukit nya. Nya meh ke ngasuh ia enda
bangat tak begaut iga. “Lama laun di tiki meh” ko ia dalam ati. Laban
ke bangat lelak sepengudah ia ke bejalai jauh. Diak deh tudah Sangor tu
lalu ngelelap ke mata diri. Kira ke ati ia ka ngelelap ke diri enda lama
meh. Leboh ia ke tinduk, dia deh ia ngasai ke diri asai ke bisi bejalai
ba menua siti ke manah amat di peda ia. Menua nya chelap, mayuh mega
utai tumbuh ditanam naka ngenyadi-nyadi nya. Nya meh ia ngasai ke diri
baka ke kala tepeda ke menua nya.
Bejalai meh tudah tuai tu tadi ba menua nya, diak ia lalu tepeda ke
langkau siti. Lama ga ia berati ke langkau nya. Ia lalu mansang semak
agi, udah nya ia lalu bisi ninga munyi orang nyabak. Sabak nya keno ko
jerita, naka ia penyinu-nyinu, baka tu meh leka sabak nya dinga ia “
e….e….e..ish..ni meh nuan Sangor-Sangor, nadai ga nuan tu datai….nyau
udah lama aku ke nganti, ni meh maya nuan ke ngambi,enti enda jadi
enggau nuan, sanggup aku munuh diri” pia deh ko serebana sabak nya dinga
ia. Sangor alit amai ati ninga leka sabak orang nya tak nyebut nama ia.
Nguji ga ia ngelilik orang ke nyabak nya ari teling lubang dinding
langkau nya. Dia ia lalu tepeda ke siku indu, mua rapas-rapas di peda
ia.
Lebuh ke nilik ari teling lubang nya ko jerita, diak deh ia lalu
tekenyit laban ke di ketup semut kesa ba junggur idung, “akai…akai….”
pia deh ko ia. Nama agi deh, ia lalu tedani ari ke lelap nya tadi. Di
purus ia idung nemu nya amat bisi semut kesa ngetup idung ia. “Ngumba ga
kesa tu…kitai ke agi benung rindu tinduk bemimpi…ngachau amat” pia deh
ko ia mutap kediri sambil ke ngetil perut kesa nya ko jerita. Amat ga
kesa nya, ngachau angin orang ke benung lela ngelilik orang indu. Isa’
ti enda mimpi. Asa amat meh ati tudah tuai tu tadi lebuh ke nemu nya
semina mimpi. Nyau abis kena sumpah ia meh kesa tu tadi.
Udah Sangor ke tedani tu tadi, ia lalu angkat bekemas ke perengka diri
lalu mupuk niki bukit nya. lalu di tiki ia bukit nya ko jerita, lama ga
ia ngelilik bansa jelu enggau utai tumbuh ke di pansa ia lebuh ke
bejalai tadi. Lebuh ke lelak, ngetu ga ia, lebuh tulang ke nyamai agi,
sambung ia baru ga pejalai. Kira ke berasai tinggi meh bukit nya sepi
ia. Mayuh ga bukit udah di tiki, semina bukit nya aja ke ngasuh tudah
tuai berasai mimit bejalai.
Nyau kelama-lama ia bejalai, ia pan lalu datai ba punjung bukit nya.
Datai din ia lalu nuduk kediri. Berasai amat ga pengelelak tudah tuai.
Lebuh ke duduk nya ia bisi merati ke rampa menua ari punjung bukit nya.
Amat manah peda ia. “ Patut ga indu dalam mimpi nya ngasuh aku kitu,
amat manah amat ga menua di peda” pia deh ko ia bejaku dalam ati diri.
Tang tudah tuai tu segi berati ke utai ke ka nyadi, laban enda patut ga
tuju ia ke kia semina ka meda rampa menua. Tentu bisi utai bukai, nya
meh sagam ati tudah tuai.
Lebuh tudah Sangor tu ke agi merindang ati diri ninjau rampa menua diak
ko jerita, diak deh ia nyepi puput rebut nyelaie amat. Lama agi balat
agi, lama agi balat agi ga pusin ribut nya ko jerita. Enda lama udah
nya, gumpal ribut tu tadi nyau besai-sebesai. Di peda ia ribut tu tadi
nyau begupung baka remang. Enda lama udah nya, ia lalu tepeda ke bisi
utai melayang ari langit, di perati ke ia amat-amat. Ukai ga utai nya
burung. Enti burung bisi ga sayap. Tu nadai ga sayap kebab-kebab peda
ia.
Lama agi semak agi, lama agi baruh agi peda ia. Gumpal ribut nya tadi
seruran bepusin peda ia, enda lama udah nya , peda ia utai ke ngelayang
nurun ari langit nyin tadi nyau semak agi, nya meh mata ia enda
kesap-kesap merening utai nya. Udah deh utai nya nyau semak baru ia nemu
nya tak siku indu ke kala di peda ia dalam mimpi. Indu nya meh ke
ngasuh ia ngiga bukit nya lebuh ia ke tinduk bemimpi suba. Indu nya ko
jerita lalu nerengkah ke diri bediri ba gumpal ribut ke agi bepusin
tadi. Udah kaki indu nya berindik , diak deh gumpal ribut lalu baka ke
di ajih ke lalu ngetu bepusin.
“Aih deh igat…empa pengelama aku ke udah ngirum ke seduai Apoi ada ke
dunya, baru saritu meh tua betemu mua mata”pia deh ko indu nya bejaku,
peda ia nyau neritik aie mata chiru nerutu kuyu indu nya peda ia. Sangor
tu tadi nyau rangap-rangap enda tentu mereti ke jaku indu nya. “ambi ke
nuan nemu igat Sangor, aku enda ulih lama nurun ke menua kitak kitu,
laban segi udah atur bakanya, nya alai kingat ke magang semua utai ke di
padah ke aku ditu lagi”pia deh ko indu nya bejaku baru. Tudah sangor
agi bediri chegi-chegi merening mua indu nya. “ Sapa meh ia tu” nyangka
nya pia meh ko dalam ati ia.
“ Anak…nyadi aku tu indai seduai Apoi menya ba menua kitai di langit
din, nama aku igat enggai ke nuan enda nemu Dayang Rinai, ketuai indu di
langit tinggi din. Tang suba aku kumbai apai kita Raja Rua Riong bisi
gila lelaki bukai, nya ke ngejung ke aku bisi ke seduai ko ia” pia deh
ko indu nya becerita ngagai Sangor. Madah baru ga indu nya tadi, “ Apai
seduai nuan suba ka munuh seduai kenyau ari dalam kandong tang aku
enggai, laban aku sayau ke seduai, Rari aku suba anak….ngelawa lubang
batu lalu nganti diri beranak ba Wong ke di peda seduai igat Apoi ba ulu
Bukit Beluai. Diak meh endur Indai seduai nuan Supang mati lesap
ketegal ke sanggup beganti nyawa enggau seduai kena ngambi duai nyadi ke
anak.” pia deh ko Dayang Rinai bejaku enggau ati ke sinu.
“ Anak..aku minta ampun laban ke ngelengka ke seduai suba, tang aku segi
enda sengaja. Ambi ke nuan nemu ga siti agi pekara anak…udah kena
sumpah Raja Rua Riong pengidup seduai nuan. Tang aku enggai madah dulu,
laban lama- laun seduai segi nemu ila. Nyadi indai seduai nuan Supang
ukai parai igat, tang di bai aku pulai ke langit, ambi nyadi ke saksi
aku udah muai seduai lebuh ke betunga enggau apai seduai nuan Raja Rua
Riong” pia deh ko indu nya nusi semua utai ke enda kala di sadang nyadi
dalam pengidup Sangor enggau Apoi.
Tudah Sangor tu tadi enda berasai nyau meliar aie mata labuh lebuh ke
ninga indai ia Dayang Rinai bejaku naka ngenyinu nya. kelebih agi
penusah indai seduai ia ke ngibun seduai ia ari kandung lari belalai ba
dalam lubang batu. enda berasai deh tudah Sangor lalu nimbal indai ia “
Nya meh indai…ishk…isk…(nyabak)..anang ke ka ngeransi, keba aku udah
ninga penusah nuan. Aku lebih agi beterima kasih ke penyayau nuan ke
kami duai, tajapan enda idup begulai enggau nuan, tang penyayau nuan
lebih besai ari semua utai” pia deh ko Sangor bejaku sambil ke nyabak
nya tadi.
Enda mukai-mukai ko jerita, nyau enda berasai Sangor lalu engkechit
ngagai gumpal ribut nya lalu merap indai ia sambil ke nyabak
ruong-ruong. Naka meh penyinua ati seduai ia menyanak maya nya. Semina
petara aja nemu ati seduai ia. “Kasih meh kitai indai…indai, ukai nya
bisi penyalah ga kitai….iga ga apai bangat kempang besangka buta ngagai
nuan, ukai ia enda ngasai ke penyiru nuan ngagai ia” pia deh ko Sangor
bejaku. Sirut sabak tudah tuai nyau agi majak. Nyau beterenjui aie mata
seduai menyanak ia.
lama mega seduai ia bejaku diak ko jerita, mayuh pekara ke udah di padah
ke Dayang Rinai ke ia. “Laban segi udah cukup maya anak… kira ke ka
mupuk aku, naka tu aja meh tua ulih betemu, laban seumur idup kami
semina ulih dua kali aja ngelawa menua anak mensia kitu. Nya alai igat
kingat ke magang utai ke di padah ke aku. Ila bisi utai ke ka nyadi ba
seduai, laban nya segi udah sumpah kenyau ari aku bisi ke seduai menya,
mupuk dulu aku anak” pia deh ko Dayang Rinai bejaku.
Tang sebedau Dayang Rinai mupuk ko jerita ia bisi madah ke Sangor begiga
ke bini ke benama Dayang Siun ke peturun petara utai tumbuh ba menua
utai tumbuh ke chukup nyadi. Nyadi menua nya suba kala di pansa ia. Nya
alai indai ia bepesan ngasuh ia nuju menua nya kin baru. Udah nya mupuk
meh indai ia dayang Rinai terebai ngelayang nuju langit besai ke chukup
peninggi ko jerita. Nya meh ke penudi Sangor meda indai ia, lalu ngujung
ke ia nemu peturun enggau asal penatai diri.
Tang aku ( penulis) enggai bula kekitak ni bagi bukit ke endur Sangor tu
menya betemu enggau indai ia. Tang ke temu aku, ba Pulau Borneo tu
semina siti aja bukit ke pemadu tinggi ianya Bukit Aki’ Nabalu( jaku
Kadazandusun) reti ia Bukit endur aki inie ( Gunung Nenek Moyang). Diatu
tampak agi di sebut Gunung Kinabalu ba menua sabah. Tang enda ga kitai
ka nyangka sengapa deh, laban bisi ga sida tu belaba ke bukit nya segi
Gunung Kinabalu, laban ukai nya jauh ga menua Sabah ari Lawas kira ke
baru 3 jam pejalai Kereta ari Lawas nengah sempadan Sabah Sarawak ba
Sipitang lalu rembus Ba Bandar Kota Kinabalu. Kira ke nya meh bukit ke
cukup tinggi ba Borneo lalu ba Asia Tenggara kira ke bisi (4,095 meter
ari aras laut) ko pansik perintah ke diatu.
…..Nya alai lengka ke kitai dulu meh tudah Sangor tu tadi ke betemu
enggau indai ia ba bukit nya. Kitai ngenang baru ga pendiau Apoi ke kena
ukum Jagu’ burak……….
Tiada ulasan:
Catat Ulasan