JERITA SANGOR ENGGAU APOI

TUSUN 1 : PENGADA SANGOR ENGGAU APOI
Nyadi kelia di Ulu terusan, ianya ba aie Terusan Lawas ke diatu, bisi siti genturung pendiau mensia. Enti menya Batang terusan ke diatu empai di beri nama Terusan. Laban Menua nya kelia di sebut sida ia ba serak tubuh kitai tu mula-mula ia Sungai Labu, tauka Apba Labu udah nya baru di beri nama Terusan. Ba menuanya menya bisi siti bukit ke di beri nama Bukit Beluai ke besatup pala enggau Ulu Temburong Brunei. Nyadi diatu nyangka meh nama bukit nya udah bebali nama, enggai bula kekitak laban jerita tu ke dulu agi be pun sebedau mensia nguan menua nya kelia. Nyadi ba bukit nya bisi dua iku diri melaki bini, ke lelaki nama ia Darung lalu bini ia benama Supang.
Nyadi keno ko jerita, Darung enggau Supang tu lama udah jadi, tang lalu bedau bisi anak. Nya meh ke ngasuh idup seduai melaki bini tu bisi amai penimpang enggau pengurang. Ngitah ke diri ke gawa pan seduai ia selalu berandau ke penyamai enti bisi anak nulung besukung ngereja pengawa. Tusah meh ati seduai melaki bini tu tadi. Enti gawa, mupuk ga kediri, enti makai betunga ga duai ia besendi, ti tinduk gali ga seduai ia nadai anak nyendi. Udah setahun, nyau betukar nyadi 10 tahun ga. Bedau ga seduai ia bisi anak. Semina tudah uduk siku aja meh ke nyadi pangan seduai ia mindah kulu kili. Uduk seduai ia ke di beri nama Pitin nya meh ke bisi di dinga nyalak tiap pagi enggau lemai. Sunyi meh pengidup seduai ia.
Nya meh ko jerita, pagi siti peda tumu Supang nukung duduk ba tisi padong seduai ia nyabak sirut-sirut. Tudah Darung ke agi bebungkur apus, lalu beguai nuduk kediri merap belakang bini ia. “ Endai, nama utai ke di sabak ke nuan deh wai?”pia deh ko ia nanya tudah Supang. Enda ga nyaut, nanya baru ga Darung tu tadi, ia lalu ngambi sarang insap ia ba selepak ibal dinding perin seduai ia.
Di Tanya ia kali kedua enda ga bini ia nyaut, nyau kali ke tiga baru bini ia nyaut. “ Tusah amat tu wai, penguji nyangka bisi datai ba pengidup tua, aku bisi bemimpi betemu enggau indai tuai orang siku ke benung ngerendut anak ia”pia deh ko Supang bejaku sambil ke sirut –sirut. “ Endai, nama utai ke ngasuh nuan bangat ngenyinu nya deh?, nyau sirut-sirut nyabak. Ukai nya bangat mimpi ngasuh parai deh..”pia deh ko tudah Darung nimbal baru, sambil ke ngulum ujung ruku’ ia.
“ Nya meh wai, segi mimpi ngasuh parai meh nya, ukai nuan ke parai…aku”ko tudah Supang nyau majak inggar agi ga sintak sabak tudah tuai. Nya meh tudah Darung nyau enggai nyadi duduk entap, insap nyau tebeleka ari jari ninga bini ia madah kediri ka parai. Nadai utai enda ngenyelai nya jaku bini ia dinga tudah tuai. bejaku baru ga bini ia “ Nyadi aku tu di asuh indu nya ngambi anak ia dua iku besapit ngelawa kaki ai wong dulu diak genap ke bulan terang pagila. Tang wai, anak mit nya ka diganti ia enggau seput aku”pia deh ko Supang nyabak.
Tekenyit deh tudah Darung to tadi lalu nimbal baru jaku bini ia “ Ehhh..nama nya bakanya deh..anang ga ngambi anak mit dua iku nya, nadai aku sanggup meda nuan ninggal dulu ari aku deh, ukai nya bangat ngasuh tua enda idup enti nadai anak deh” pia deh ko tudah Darung bejaku nyau getar-getar dagu ia. Ati tudah tuai nyau irau sereta bebal. Tusah amat sepi ia. “ Enda wai, aku mesti ngambi anak mit dua iku nya, laban petara bepesan ba indu nya ngasuh aku ngambi ia. Enti aku enda ngambi ia tua ila kena sumpah, besai sumpah petara ngelawa tua” pia deh ko tudah Supang madah ke laki ia.
Nama agi deh. Nyau rerangap tudah Darung ninga tusui mimpi bini ia bangat nyelai amat munyi nya. Ka pan enda , laban petara udah ngatur idup seduai ia bakanya. Tang tudah Supang enggai agi nusi ke laki ia nama sumpah di beri petara enti nyema enda ngambi anak mit nya. Nya meh ke ngasuh kitai ke agi idup diatu enda nemu nama kebuah bini Darung tu tadi mesti ngambi anak mit nya. Laban bini ia empu nadai madah ke leka jaku sumpah petara ngagai seduai ia.
Nya meh ko jerita makai enggai nyadi, gali enggai nyadi, duduk pan enda ulih lama. Tusut amat meh runding seduai melaki bini nya sehari-hari nya. Darung ke bangat tusah ati ngenang bini ia ke mati malam pegila lebuh maya bulan kembung. Nyau di pandak ke kitai cerita seduai ia ke sarinya. Pagi siti pan datai ga. Seduai ia pan lalu ngayan ke rengka. Ngayan ke piring meh seduai ia laban ke dipesan ke petara indu dalam mimpi seduai ia di kena ngambi anak mit ba kaki wong tu tadi.
Ia meh ari belabuh silau, Darung enggau Supang lalu be entunda-udi betangkan pangan bejalai ngulu aie sungai siti, lalu enda jauh arinya meh endur wong tu tadi keno ko jerita. Ia meh seduai ia datai malam pan nyau ga belabuh petang. Burung enggau bansa jelu babas nadai didinga munyi, semuti munyi panchur ai wong nya ke bisi ngerichau pending seduai ia. Seduai ia lalu berengkah ngadu ke piring lalu ngayan ke macam leman rengka ke patut di bai seduai ia nitih ke semaya petara indu ke bejaku dalam mimpi Supang.
Ia meh enda lama udah nya, peda bulan lalu pansut kembung segala, diak deh Supang lalu bediri nunga wong tu tadi lalu besampi, nunda ke jaku pesan ke diajar petara indu dalam mimpi ia “ Ni duai dek anak, beganti nyawa enggau indai, seduai idup aku mati……ni duai ambai beganti ati kitai , duai ada aku parai….” pia deh ko munyi sampi Supang keno ko jerita. Ia meh udah tembu Supang nyebut leka sampi nya tadi dinga tak lalu ngeruga munyi lubang batu ke semina di pampul ai wong ke beterenjui labuh…lalu tebuka, nyau bekesetak munyi bandir kayu enggau batu diak tekinsit pecah…peda lalu nyepar panchar kilat mangka ke lubang batu nya tadi, nadai enda ngingar nya. Enda lama dah nya peda tak lalu surut baru aie wong ke udah nerusur kili lalu pulai kulu ke baru niki ke pala wong tu tadi. Tanah nyau berenyang,kayu nyau beguyang ko jerita.
Nya meh , nadai enda ngenyelai nya ga utai ke nyadi. Tudah Darung, enda engkeretik merati ke utai ke bangat ngenyelaie nya nyadi. Bisi nya ati takut, runding pan tusut. Ia ke bediri tu tadi merati ke ulah bini ia, bepegai ba pun kayu siti ke bulih mesai tibang.Nama meh utai ke nyadi tu lagi, pia deh ko dalam ati tudah tuai. Ia meh udahnya keno ko jerita baka ke di ajih ke, dinga tak talu-talu munyi sabak anak mit dua iku betimbal-timbal ke agi merah mansau laban darah ayan nyengenda ba dalam lubang batu, nyau bekenaya kena tenggau panchar bulan kembung. Enda lama udah nya diak deh Darung semina ulih meda ayas bini ia bediri ba punjung batu puak kaki lubuk ba wong nya. Dinga bini ia nyabak bejaku “ Darung..jaga meh anak tua tu enggau manah, beberita anak tua tu ila, enda nemu nyau taja dunya bebali, biar ke tubuh ia lenyau tang pendiau ia meruan mengkang idup belama ia,” ko tudah Supang bejaku sambil ke nyabak.
“ Ingat ke Darung gaga ke nama Sangor anak tua ke sepiak kanan nya, ke sepiak kiba nya gaga ke nama Apoi ,” pia deh ko Supang bejaku. lama agi nadai agi, nyau majak lesap deh tudah tubuh Supang, semina ayas-ayas aja ke agi bisi dipeda. Utai diak nyau berasap peda Darung lalu di sepu ke rebut muput lalu musin niki ke langit tinggi tengelam jamah pemetang.Darung nyau nyabak kediri, nadai tepansut ke seleka jaku.Nyabak meh tudah Darung tu tadi ngenang bini diri ke udah nadai enda temu pejalai, udah lesap enda temu pemulai, tak mati meh ko jaku, tang bangkai nadai, gak Supang udah madah ke ia mati nitih ke mimpi. Darung lalu merening nunga ke lubang batu tu tadi. Anak mit dua iku ke gali nya tadi baka ke di ajih ke, enda engkeretik . Nyabak pan udah ngetu, jari enggau kaki ke betekayo. Baka ke nemu penusah ke nuntung Darung.
Nya meh ko jerita, Darung enggau sabak-sabak lalu mulai ke diri mai anak mit nya tadi ngagai langkau ia kili ngelawa Bukit Beluai. Maya ke ba rantu jalai balat tusut amat runding ia bakani ko ka ngidup ke anak mit dua iku nya kediri. Enti sema bisi Supang enda ga ngawa ko dalam ati ia. Bisi ga beragih nyaga. Tu sapa ke gawa, sapa ke ngibun deh. Nyu bebal runding ia. Kaki ke nyingkang pan nadai di ketati ke agi. Batu tujah, sipak , urat kayu sipak, paya tengah. Ukai nya berasai ga laban tudah tuai ke nyau sekut runding. Nyau dipandak ke kitai ga tudah pejalai Darung tu ke ngemai anak mit dua iku nya pulai .Ngidup ke diri meh sida menyanak ia baka mensia ke bukai………………………………………………………………………………………………………………….
Nya alai lengka ke kitai dulu ga cerita pengidup Darung enggau anak ia dua iku nya enda lama, kitai ngenang ai wong ke endur Supang tu lesap kelia. Keno ko cerita sida ke semak menua nya, wong tu segi berantu ko sida ia. Aku (penulis) pan kala mansa wong tu maya kami ke ngena hilux nurun ke pasar Lawas. Diatu Wong nya enda ga tak nyengala tinggi, enda baka kelia keno ko sida ia. enti suba sebedau orang ngaga jalai ke ulih di tengah kereta, amat takut mensia mansa menua nya.
Sida ia nusui ke aku ( penulis) bisi orang kala betemu enggau indu benung mandi diak. Bisi mega sida ia kala ninga sabak indu ba wong nya diak. Nyadi wong nya keno ko jerita segi di beri orang nama Wong Supang. Sida ke tuai-tuai pan madah munyi nya deh. Nyangka nya ngambi nama ari bini Darung ke lesap ba wong tu ari kelia-lia meh kini.
Nyadi aie wong tu ko jerita enda kala langkang ko sida ia madah, tajapan kemarau panjai. Bisi suba sida ke kereja batang ka ngaga jalai ari atas pala wong tu ambi ke nyamai nyelawit ke munggu sepiak kena mai batang kayu, tang bala sida ke ngereja nyungkur tanah tu kala udah bebadi diak. Bisi ga orang kala bemimpi, enti ka ngereja utai ba wong tu mesti nukar enggau nyawa. nya meh ke ngasuh jalai ari atas tu puntan lalu melit ari baruh meh di gaga sida ia. Nya ke ngasuh nyamai amat meda wong tu enti lebuh ke mansa menua nya.
Nitih ke tusui apai tuai tu ngelawa aku (penulis)nadai orang berani ngereja menua nya sengapa. Pia meh ko tusui sida ia ngagai aku (penulis) lebuh aku ke betasat ke Jerita tu suba. Kala ga orang begambar ba Wong tu keno ko jerita, tang enda ulih peda ga gambar. maya sida ke nuchi gambarnya chelum aja pansut. Wong Supang tu agi bisi di peda kitai sampai ke saritu enti kitai mudik nengah jalai ari Tang Sangor ngagai Long Tengoa bagi menua Lawas. Nya alai minta ampun meh aku ketegal ke limpang mimit ari jerita kitai…pulai baru ga kitai ngenang pendiau Darung enggau anak mit dua iku nya…..

TUSUN 2 : PENDIAU SANGOR ENGGAU APOI

Umba ke segi anak petara , seduai madi tu idup cukup nyelaie ko jerita sida ke tuai. Tang apai seduai ia enda kala madah ke ari ni penatai seduai ia. Seduai ia empu pan semina kala betanya ke kini penunga indai seduai ia. Enti lebuh seduai ia ke betanya ke tunga indai seduai ia, Darung madah ke seduai ia, indai seduai ia udah parai lebuh ke ngada ke seduai ia suba. Lalu tepadam angka nya aja meh tanya seduai madi tu.
Nyadi ba pendiau seduai ia enda kurang lebih enggau pangan diri. Semina Sangor tu lebih nelap agi enti di banding enggau Apoi. Tang seduai madi tu sama-sama enda kurang lebih pengelandik gawa sereta sama bela sigat sereta kering. Nyadi keno ko tusui sida ke madah ke aku(penulis) , pengering Sangor enggau Apoi lebuh ke baru umur tau bejalai, seduai ia sama ulih ngangkat ke batu ke berat nitih ke pemesai pemerap seduai ia.
Enti kitai mudik nengah aie sungai siti , bisi kitai meda tusun tugung batu ke di engkah seduai ia meachir-achir ari tebing sungai nyentuk ngagai tinting siti. baka ke di tusun manah nitih ke pemesai . Tang batu nya diatu nyau udah bisi berubah mimit tusun ia laban ke bangat udah lama. Enti suba ko sida ia, batu ke ditusun tu ulih di peda berintai manah, tang diatu nyau ambis di balut kayu tumbuh enggau tanah. Uji kitai berunding ke enda patut ga batu nemu nusun diri empu bakanya. Ukai nya mit batu diak, laban aku ( penulis) pan bisi meda enggau mata diri empu kia, lebuh ke ngemai bala mansik jerita tu.
Nya meh, cukup enda masuk runding kitai mensia ke baruh ari tu meh semua pendiau duai madi tu ko jerita. Mayuh mega utai ke nyelaie di kereja seduai madi tu sekumbang ke idup ari mula mata menchelak sampai ke seduai ia nyau bujang raya. Tang aku (penulis) enda ulih nusut ke kita lalu nyidi sampai ke silik semua pengawa seduai ia. Laban pengingat sida ke nusui ke aku tu enda ga sampai silik bendar, tak semuti ke bepunggang-punggang mit, tang kekadang enda ga temu ujung enggau pun.
Kitai ga sama nemu, umba ke anak petara segi mayuh utai ke nyelaie ulih di kereja seduai ia. Indah enda kitai ke ngembuan tulang mensia ke baruh ari ga bisi penyelaie, anang agi seduai dua tu ke segi ada berantu. Tentu ia lebih agi.

2.1 Sangor enggau Apoi begiga ke ulu Bukit Beluai
Nya meh keno ko jerita, bisi ari siti, seduai ia madah ngagai apai seduai ia ka nurun begiga ngelawa menua tunga ke ulu Bukit Beluai. “Nyadi kami duai tu apai, kira ke ka nurun begiga, nuan tinggal ditu apai, enggai ke nuan enda dapat bejalai jauh”pia deh ko Sangor bejaku. Laban mayanya, apai seduai ia segi nyau udah tuai. Sangor enggau Apoi pan udah bujang rana-rana.
Nyadi Darung tu segi nadai ga ati ka enggau laban ia nemu diri empu ke enda ulih nipak tulang anak petara dua iku nya. Nadai ia ulih bejalai laju baka seduai nya. “Barang ko seduai meh anak, seduai ga anang bangat lama ninggal ke aku, aku nyau enda tentu pengerai” pia deh ko jaku Darung ngagai seduai ia tadi. Seduai madi nya tadi lalu ngemas meh perengka diri kena beratur ke ka nurun begiga.
Nama agi deh, udah tembu seduai ia pan lalu nurun be entunda –udi nitih ke pangan diri nengah tinting, ngulu aie, ambis munggu di titi. Bejalai keno ko jerita seduai tu sehari-harinya tadi, kekadang siku dulu, siku ga dudi. Tang seduai ia lalu bedau tetemu ke jelu ke ulih di bai seduai ia. “ Akai dai…ah..nama meh menua tu tak nadai jelu adi?, burung pan nadai di peda terebai” pia deh ko tudah Sangor bejaku enggau Apoi. Tudah Apoi tu tadi enda nyaut, nyangka ia tu tadi pedis ati kini. Bejalai ngenyauh nya, tang nadai ga utai ulih. Nyumpah dalam ati meh ia tu.
Ia meh ari pan udah belabuh silau, seduai ia lalu duduk nunga pun kara siti. Di perati ke seduai ia pun kara nya, nadai ga burung di peda. Besai amat pun karanya keno ko jerita, Apoi lalu bejaku “ Bakani tu deh aka?, hari nyau ka ga malam. Uji tua niki pun kara tu. Uji peda nuan ba dan ke besai nyin, ulih nyin endur tua gali ngenduh ke diri” pia deh ko tudah Apoi nengkadah sereta ngelilik dan kara ke di padah ke ia ngagai Sangor.
Sangor lalu malik ga ngagai dan kara ke di tunjuk ke Apoi. “ Apu..amat nya, tau amat nya endur tua diau ngenduh, alau meh tiki ulih tua” ko Sangor ga nimbal Apoi tu tadi. Nya meh seduai ia lalu betiki ke pun kara nya tadi. Niki meh seduai tu tadi sambil ke bepegai ba randau kara nitih ke pengelancat jari diri meh. Kekadang ama ya engkechit ga seduai ia ngagai dan siti ngelawa dan siti. Ia meh udahnya seduai ia pan lalu datai ba selepak dan ke dituju.
Apoi enda jugau amat, datai ba dan nya ia lalu ngali ke diri. “ ahh…nyamai amat ga gali..uhh..nasib bisi pun kara tu neh” ko ia bejaku enda inggar . Tudah Sangor tuchum meda ulah madi ia ke ngeliat gali ba selepak dan kara nya. Sangor lalu belabuh ngidup ke api ba keruang dan kara nya. Di idup ke ia api keno ko jerita, dinga tak merak utai ari dalam batang kara. “ oiiiii…sapa kitak, nama tak nunu rumah aku, padam ke…padam ke api nya!!!” pia deh ko orang didinga seduai ia. Tudah Apoi ke gali tadi, nyau tekenyit. Asai ke ka teberurut labuh sepi ia. nasib bisi anak randau kara ke mesai betis endur ia bepegai. Asai ke ka runtuh atau. Lalu di purus ia dada belubah-lubah.
Tudah Sangor ke ngidup ke api tadi pan sama mega tekenyit. Ni enda deh, tak bisi nyawa orang merak. Beguai-guai meh ia tu tadi ngererak unggun api ke baru deka mau. Di gilik-gilik ke seduai ia pala, pending di singit-singit ke seduai ia, nadai ga bisi ninga orang bejaku baru. “ Sapa enda nya kini?” ko Apoi nelai Sangor. “ Enda nemu meh, tua ga sama nadai meda tubuh, enti ia antu, lain munyi jaku ia, nadai antu bejaku munyi nya, tang enti ia mensia nyau di peda ga tubuh” ko Sangor nyaut madi ia. “ Eh..bakani ko munyi jaku antu deh aka, nuan tak ngenemu kediri, kemaya meh nuan kala berandau enggau antu” pia deh ko tudah Apoi nimbal seraya ke enda puas hati, ninga nya ukai antu ko Sangor madah ke ia. Sangor tu tuchum-tuchum enda entu udu, laban ke agi tekenyit, tang laban ia tak geli ati ninga Apoi ke nimbal ia munyi nya.
Udah seduai ia ke ninga orang merak seduai ia nya tadi. Seduai ia sama bela malik pangan diri. Tang seduai ia nadai agi ga betanya ke pengirau ke bisi dalam ati. Semina diri empu aja meh ke nemu maya nya. Seduai ia enda berasai lalu ngali ke diri. Ipak ke segi udah lelak laban ke bejalai sehari-harinya. Nya meh ko jerita, lebuh ke tinduk jenak, diak deh Sangor bemimpi betemu enggau apai tuai orang siku.
Dalam mimpi ia , diak ia meda apai tuai nya apus tubuh bebulu baka burung peda ia. Bisi sayap, mulut baka mulut burung, mata baka mata burung, besayap, semina tubuh ia aja ke agi bisi rayuk kitai mensia.
Apai tuai nya lalu bejaku ngagai ia. “Eh…deh Sangor, nama meh seduai dek ngidup api ba rumah kami, nasib aku meda, enti enda mati kami serumah kena tunu api dek, tang enda ga aku bangat pedis ati iga,laban seduai ke segi enda nemu” pia deh ko apai tuai nya bejaku. “Nadai meh kami duai sengaja aya, gak pun kayu ke di peda kami duai. Nadai meh kami duai nemu tu rumah kitak”ko Sangor nyaut dalam mimpi ia.
“kami duai menyadi tu aya ka nurun begiga, tang nadai ga bulih. Anang ke jelu besai, Burung ke mit mamau nya pan nadai dipeda” pia deh ko Sangor bejaku baru enggau apai tuai ke bebulu baka burung dalam mimpi ia nya. “Apu..nadai nya ke tusah ke duai dek. Enti bisi nasib manah pagila -lusa, bisi meh seduai bulih jelu” pia deh ko apai tuai nya nyaut Sangor. Nya meh kepuas-puas seduai ke bejaku dalam mimpi nya ko jerita, apai tuai nya lalu madah ke Sangor ngasuh ia dani laban udah ka tawas pagi. “ Dani nuan igat Sangor, dani seduai dek..pagi hari” pia deh ko apai tuai bebulu nya.
Nya meh ko jerita, Sangor lalu tedani, lebuh ke dani nya diak ia nemu duai menyadi nya tak gali ba ruai orang. Tudah Apoi laban ke enda nemu utai ulu-ili agi engketut majak bekuruh. Sangor lalu beguai negu kaki Apoi, “ Adi….adi..dani, angkat. peda nuan deh…”pia deh ko Sangor bejaku ngerak madi ia. Lengka ke kitai dulu cerita duai madi tu ke dani tumu pagi nya.Laban bisi siti jerita ke bisi besangkut paut enggau Aya Bunsu Burung ke di peda Sangor dalam mimpi tu, kira ke kitai udah tepejuh becerita ke Bunsu burung tu,
Enti kitak bisi ingat sereta nemu jerita tuai Utik ke alah di Terusan menya. Bisi sida nusui ke aku, jerita Bunsu Burung ke nulung bala Utik ke benama Timbang ngelalai ke diri ari di bunuh munsuh bansa Murut kelia. Ambi ke kitai sama bela nemu, nyangka meh Timbang tu enda tentu jelai rita ia, Tang ko jerita, semina Timbang enggau Utik aja sida ia ke seperau ke agi idup lebuh bansa Murut kelia betimbak , bepantap enggau sida ia.
Laban bala sida ke seperau mayuh udah mati kena timbak bala munsuh, Udah nya lalu terjun ga Timbang ko jerita ka dalam ai. Lalu iya kena timbak bansa Murut kena ba jumbal burit. Tang iya benasib laban agi dapat berarat nitih ke alur aie, lalu ditumbok munsoh ngena sangkoh lalu kena ba betis tang semina bakal aja. Iya lalu mupok ngidup ka diri berarat berari- ari.
Nyadi tudah Timbang ke ngidup ka diri berarat nya tadi lalu sangkai ba tebing lalu niki pun rian ke repa bendar dibalut randau raka. Nyadi bala munsoh agi majak begiga nitih ka iya, tang sida iya enda tetemu ka alai iya belalai ba rampu randau raka di puchok rian. Nyau udah pulai bala munsoh, lalu nyau ka lama iya udah nat ka diri dia, endor iya lalu tepeda ka siko burong ti besai bendar benong ngindang puchok rian ke alai iya belalai nya tadi. Umor iya nadai kala meda burong bangat ngemesai nya. Bakanya ko jerita ia, sida ke nusui ke aku(penulis) madah ke Bunsu burung tu segi suah nulung orang ke tusah ba menua Lawas tu agi kelia.
Mayuh mega bala aki ini bansa Lunbawang ke nguan menua nya bisi di tulung Bunsu Burung tu menya. Tang laban diatu sida tu ke nadai agi beguna ke pengarap lama, nya meh ke ngasuh cerita tu nadai agi di kenang orang ke baru. Nyau nampung baru meh kitai ngagai seduai menyadi tu Sangor enggau Apoi ke tinduk di ruai Bunsu Burung.
Udah Sangor ke bejaku ngerak Apoi tu tadi, ia pan lalu angkat sambil ke nguap-nguap entepa ke lengan ia ngeliat. “Ahhhhh…eee..nyamai mai tinduk , jenak amat.”pia deh ko Apoi empai bangat ulih tebuka bendar leka mata. Ia segi empai nemu utai ulu- ili. Nya meh Sangor enda liat meda Apoi ke agi mengkang bungau tinduk nya, lalu di tempap ia belakang Apoi, di gusak ia tubuh Apoi. “ Eeee…nuan tu, peda dek deh…uji penchelak ke mata, enti nuan bisi meda utai ke di peda aku” pia deh ko Sangor bejaku baru.
Apoi ke agi luga-luga nya tadi lalu muka mata, diak meh ia merening lubah-lubah utai diak. Nya baru ia nemu diri ke tinduk ba ruai rumah orang. Di kusuk ia mata, asai ke enda pecaya. Kusuk ia agi ga mata, sama baru ga utai di peda. Nyau di tempap ia kuyu, di cubit ia isi, berasai ga angat. Ukai mimpi meh tu, pia deh ko ati ia.
Enda lama udah nya, pagi pan nyau kerebak tawas, dinga nyau richuh-rami bala mensia pansut ari bilik diri. Panjai amat rumah orang diak peda seduai ia. Bisi ga ati seduai ia bejaku kediri, kini meh orang tu nyau terebas mupuk, rumah tadi ricuh diatu nyau puang, sunyi.
Enda lama udah nya, dinga orang bisi ngagau ari bilik “ Igat Sangor, Igat Apoi….enti duai dah dani tama kebilik kitu seduai, makai kitai. Seduai ari kemari lalu enda makai , lalu igat…kebilik kitu” pia deh ko munyi nyawa orang lelaki dinga seduai ia. Seduai ia pan lalu angkat begadai-gadai, lubah nyingkang nuju mua pintu. Pintu di buka, seduai ia pan lalu tama kebilik. Lebuh ke mansa bilik besai nya meh seduai ia meda, ambis dinding enggau lantai di balut taik. Ga bilik nya peda seduai ia ukai nya beramu ke kayu, semina ke betungkus enggau daun babas mati, enggau rangkang kayu aja. nadai enda ngenyai enggau ngamahnya rumah nya peda seduai ia.
Tang seduai ia nadai bemunyi, nadai bejaku, malik pangan pan enda. Nyangka tak semina dalam ati meh seduai madi tu nimbang semua utai ke bisi di peda. Datai seduai ia di dapur, diak meh seduai ia lalu tepeda ke apai tuai siku, nyau penuh bebulu baka burung ngapus ke tubuh. Nya baru Sangor nemu apai tuai nya ke betemu enggau ia dalam mimpi. Tudah apoi nyau rangap-rangap meda utai ke ngenyelaie nya. Palik seduai ia baru ke tisi, peda seduai ia indu siku ke sama bebulu apus baka apai tuai nya tadi. “ Duduk igat, duduk kitu. Makai kitai, nya bini aku igat, kemari ia bisi meda seduai bejalai neresa kampong” pia deh ko apai tuai nya bejaku. “ Au meh aya, ga segi udah tama, kati ko enda deh”pia deh ko Sangor nyaut.
Lebuh ke ka duduk nya tadi seduai ia sama bela nadai bemunyi, ukai nya baka ke bisi tikai ke manah deh. Suntuk-suntuk pan langkau sida di Bukit Beluai din, enda meh nadai tikai. Tu, anang ke tikai, nyu belapik ke sumbuk taik. Ka pan enda, duduk meh. Umba ke perut segi lapar. Maya ke meda pemakai diak, seduai ia sama alit ati berati ke utai ke di empa. Macam-macam buah ke diempa bisi diak. Nadai kala meda buah ngemayuh nya. Nemu nya berachun, nemu nya enda, empa aja meh, gak urang nyendia.
Udah sida tembu makai pagi nya, apai tuai nya lalu ngemai seduai ia pansut ke ruai. Datai di ruai sida tiga sama duduk diak. Seduai madinya tadi semampai berati ke ulah apai tuai ke nyelaie nya tadi. Udah ke duduk diak deh apai tuai nya bejaku baru “ Tu meh menua kami igat, aku meh ke betemu enggau nuan dalam mimpi demalam, nasib aku meda api ke di idup ke nuan demalam, enti enda udah angus rumah kami tu” pia deh ko apai tuai nya bejaku. “ Nya meh aya, minta ampun laban ke enda sengaja” pia deh ko Sangor nyaut. “ Kini ke bala kitak serumah bukai ke nyau richah rami terebas angkat pagi tadi deh aya?” pia deh ko Tudah Apoi nanya. Ari tadi ia ka nemu,tang nadai peluang ka betanya.
“Segi baka pengidup kami ditu nya igat. Enti siang turun kami begiga ke pemakai, kami ukai nya nemu bumai baka anak mensia deh, enti lemai baru kami pulai ninduk kediri. Bakanya meh pengidup kami” pia deh ko timbal apai tuai tu tadi.
Nya meh ko jerita, hari betukar hari, malam beganti siang, enda berasai deh seduai madi tu tadi udah bangat lama diau ba menua Bunsu Burung. Seduai ia mayuh belajar ke bansa buah ke tau di pakai sebelah kampung jerung. Belajar ke penti pemali. Mayuh meh utai ke di pelajar ke seduai ia diak. Enti di kenang kitai cukup ia panjai.Enda alah di rintai ke kitai magang-magang. Enti di tusi kekitai, nyu enda nemu apus. Ka pan enda lengka ke kitai dulu cerita seduai menyadi tu ke diau enggau Bunsu Burung tu tadi. Kitai lalu ngenang apai seduai ia Darung ke tinggal di langkau sida ba Bukit Beluai…….sesempa rampang pinang……

2.2 Pemarai Darung

Nyadi kitai ngenang Darung ke tinggal kediri ba langkau sida menyanak ia kediri-diri bangat tusah ati. Lelengau ke seduai menyadi ia ke udah nurun begiga keno ko jerita. Laban ke kelalu lama seduai madi nya ninggal ke ia. Diak deh ia ngasai ke seduai madi nya tentu tesat enda ulih pulai agi. Nyangka nya udah mati ikak, mati lapar, bunuh antu kini, rekak jelu kini. Ia pan enda nemu. Nya meh ke ngasuh ia balat tusah ati. Kekadang makai, kekadang enda meh tudah tuai.
Nyau genap ke berapa tahun ia tinggal kediri ko jerita. Diak deh Darung nyau ngingat ke niang bini ia ke parai lesap menya di aie wong ke dikumbai orang Wong Supang ke diatu.Nyadi pagi siti, diak deh ati Darung nyau nungkat tekenang ke bini ia Supang suba ke mati ba Wong . Mati lesap nadai di peda. Sepengudah ke nyau manggai ke ka 20 lebih tahun bini ia ke udah mati lesap. Dia deh ia nyau berasai seilu-ilu tudah Darung ko jerita.
Nya meh ke ngasuh ia pagi nya enda berasai nyingkang ke kaki ngulu aie tunga ke jalai Wong Supang tu. Ia pan enda nemu, nama ga kebuah ia tak ngingat ke bini ia. Ngelama tu ukai ga enda ingat, tang laban bisi seduai dua madi nya nyadi ke tawing ia ngidup kediri, nya ke ngasuh ati ia teperindang mimit. Tu nyauka keberapa tahun seduai madi nya udah ninggal ke ia kediri. Enti sebulan dua enda ga ia bangat ngenusah nya.
Nya meh ko jerita, lalu nyingkang meh tudah tuai belubah-lubah betungkat ke kayu siti. Umba ga segi udah tuai, kaki pan nyau tusah ka nyingkang bai bejalai. lalu mupuk meh ia bejalai sehari-harinya. Nyau ka silau baru ia datai ba kaki Wong Supang. Datai keno tudah tuai ba kaki Wong, ia lalu nuduk kediri ba tugu batu sigi ke umbas ia pemesai. Diak deh ati ia tu tadi berasai seilu-ilu, ngingat ke niang bini ia ke bediri ba tugu batu nya kelia lebuh ke bebaca ke sampi ngagai petara . Enda berasai ga aie mata tudah tuai labuh beterenjui ngemasah ke kuyu ia. Nyau sirut-sirut deh sintak insak sabak ia tu tadi. “ Ni meh nuan ambai, nyangka meh semengat nuan bisi meda aku…..tu meh aku datai baru, datai lelengau, ngabas nuan. Nyangka icha nuan ke bisi meda pengerawang ati aku ke tusah, sekumbang nuan udah ninggal ke aku” nyangka pia meh ko tudah jaku dalam ati Darung lebuh ke nyabak ke diri diak.
Nya meh Darung lalu beserabana kediri ketinggal di menua, bini nadai, anak pan nadai. Mayuh meh utai ke di pansut ke ia lebuh ke bejaku nunga tugu batu besai nya. Nyau kurus deh tubuh tudah tuai laban ke sakit sereta umba ke kurang makai ngelamatu. Sakit tusah ati meh nya. lebuh ia ke nyabak duduk ba atas tugu batu nya ko jerita, lama ia enda nginsit angkat, bisi ka betahun ga ia enda angkat ari batu nya ko jerita. Nya meh kebuah tugu batu sigi nya sampai saritu agi ngeruang dalam. Nyau baka keruang Kali. nya meh bekau endur Darung duduk menya. Diatu batu Darung tu ko jerita bisi di temu orang tunga ke menua Entabai ke bisi di sebut orang batu ke baka kali.
Kebuah batu nya ngelunggang ke sepiak menua, laban ko tusi sida ia menya di tikau ke Sangor enggau Apoi, laban ke pedis ati enda sempat meda pemarai niang apai seduai ia menya. Nya alai batu nya terengkah jauh ko jerita di tikau ke seduai ia. Nya alai bukit ke endur batu nya terengkah di kumbai orang bukit Jipun, laban kitai iban sepiak menua Entabai ke tebal agi ngagau ke kali tu jipun. Amat bisi diak batu ngeruang baka kali. Nyangka nya amat kini, nyangka nya bula kitai sama enda nemu, laban tu ke cerita di tampung ari turun nyau ka berapa serak.
Tang bisi ga siku tuai Lunbawang ke benama Lasung ( diatu agi idup) ke madah ke aku ( penulis) empa pengeringat seduai madi tu menya , lalu di kempuk seduai ia tanah menua nya, lalu di tikau ke seduai, nya meh ke ngasuh tanah nya tadi terengkah di tasik besai lalu nyadi pulau nyentuk ke saritu. Siti pulau ke nyadi lalu beberita ianya Pulau Labuan. Nya alai Pulau Labuan enda jauh entara Lawas enggau Limbang ko sida ia nusui laban nya tanah indu gumpal hari jari seduai ia suba. Pulau ke bukai nya tanah ke pecah tepambar .Nya meh ke ngasuh menua nyin enti peda kitai ba peta topografi Sarawak/Borneo mayuh pulau ke mit-mit. Laban tanah tu suba bisi tepambar pecah lebuh ke tepangka ba gelombang tasik Laut China Selatan.
Nya meh keno ko jerita sida ke madah ke aku(penulis) pemarai Darung tu nadai tentu bebatang cerita ia. Bisi sida ke tuai ba menua nya madah ke Darung tu parai laban ia munuh diri, terejun ari Pun Batang Embawang ko jerita udah ia ke pulai ari Wong Supang. Bisi ga madah ke ia terejun nya suba, ketegal ke tusah ati laban ia nganti pemulai Sangor enggau Apoi ke lama mindah nadai temu berita. Nyadi pun Embawang ke endur ia terejun nya kelia ko sida ia amat besai pun ia. Nadai pun Embawang bisi ngemesai nya ba baruh ari tu.
Enti suba, agi kelia. Agi takut bansa Lunbawang ( Murut) ba menua nya niki pun embawang ke bisi tumbuh ba emperan Bukit Beluai ko jerita. Laban sida ia takut ke di ju’ ke antu Darung. Tang diatu nadai ga agi bakanya, laban bansa tu ke baru diatu udah penuh enggau pengarap baru. Laban ketebal agi bansa Lunbawang tu udah masuk pengarap Kristian SIB.
Lalu bisi ga sida nya madah ke pemarai Darung tu tadi, mati ketegal ia ke nating kaki ia enggau batu ko sida ia. Ia terejun ba lubuk siti ke cukup ia penalam, lubuk nya agi ulih di peda kitai enti mudik ari pendai sida ba Tang Sangor ke diatu. Lubuk nya mayuh baya ko sida ia. Enti kitai merati ke lubuk nya, enti maya aie besai. Balat amat pusin ulak aie diak. Suba kala orang karam mudik aie terusan ba lubuk nya diak. Keno ko jerita, maya agi perintah pegai Sultan Brunei kelia, mayuh bala Raja Muda enggau bansa Murut empu ke taluk ke Raja Muda datai nyerang bala Lunbawang mati kena penyakit cacar aie ba tahun 1904 enggau 1905, ko sida ia.
Bala Raja Muda ke datai ari Brunei ke nyerang tu bemalam ba tebing lubuk tu, niri ke langkau. sida ia bisi bepanduk ke aie enggau asi ngena aie ba lubuk nya. Laban ke sigi bisi sumpah lubuk nya ko jerita. Enti kitai bisi ati jai, lubuk nya nemu. Sida ia mayuh mati ketegal ke mutah darah enggau cirit. Mayuh mati rambau nya kelia. Nyau bau but aie Batang terusan kelia jamah penyakit nya ko jerita. Nyau beribu-ribu iku mensia mati nyengkaum bansa Lunbawang empu.Ka amat orang tuai besebut ke jerita tu suba. Lebuh penyarut nyadi bala Raja Muda ke bekayau mulau bala Lunbawang kelia ba ulu Terusan , semua rayat Lunbawang maya nya bisi ka nyerangkun 17000 ngagai 20000 iku nitih ke pansik Pegawai daerah mayanya. Udah penyakit tu nyadi, semina ka lebih kurang dalam 5000 iku aja Bansa Lunbawang ke agi idup ba tahun 1907. Nya meh sumpah ke agi nyadi pengingat bansa Lunbawang sampai ke saritu.
Nya meh nyau pulai ngagai pemati Darung tu tadi, bisi ga sida madah aie terusan enda nemu langkang taja kemarau panjai beratus tahun. Ko sida ia. Laban aie mata Darung bisi nulung nambah ke aie batang Terusan tu. Keno ko jerita, aie mata Darung tu meh ke ngasuh ai Batang Terusan nemu chiru ko sida ia. Tang nyau ke dudi diatu, pedis amat ka meda aie Batang Terusan chiru, nyangka meh sumpah tu bangat berubah laban ke udah kelalu lama nyau ka berapa serak peturun sampai ke sari tu. (Minta ampun meh ngagai bala mensia ke agi Idup ba Batang Terusan ke diatu nyangka meh cerita tu bisi ngachuk pendiau kitak ke agi mengkang nguan menuanya, tang ambi ke bisi di kenang kitai nyentuk ke ucu ambu kitai ke ila).
Kira ke di lengka kekitai meh kenang pemati Darung tu menya. Laban kitai agi ngenang Sangor enggau Apoi ke agi diau ba menua Bunsu Burung, udah bekau seduai ke tinduk ba pun Kara lebuh ke nurun begiga………

2.3 Sangor enggau Apoi Pulai ke Bukit Beluai

Nyadi lemai nya, bini Bunsu Burung pulai ari ke begiga pemakai. Ia ke pulai tu tadi lalu beguai-guai tama ke bilik. Nyadi tudah Sangor benung kiruh ngelalin gelegar rangkang kayu ba bilik besai. Apoi enggau Bunsu Burung benung duduk ngeraut wi ambi ke dikena Sangor ngelalin.
“Igat…oo..igat Sangor..ka enda mesti madah meh aku ke seduai, bisi penusah nuntung apai seduai dek ba menua din. Pulai seduai dek, anang enda. Din baru seduai nemu enggau silik nama penusah ia” pia deh ko bini Bunsu Burung bejaku. Nyau rapas-rapas deh jaku tudah tuai laban ke bedau lelak. Udah bekau ke mindah sehari-harinya. “ Au meh ibuk..pulai diatu kami duai enti munyi nya” ko Sangor nyaut. “ Eh.. bakani seduai ka mupuk diatu igat, ari nyau ka malam. Manah agi seduai mupuk pegila” pia deh ko aya Bunsu burung bejaku nimbal Sangor, ninga seduai ia ka mupuk tekalanya.
Nya meh ko jerita, semalam-malam nya meh seduai ia enggai nyadi tinduk, pejam ke mata enda ga ulih. kalih kiba-kalih kanan, enggai ga nyadi lelap.Seduai ia ngutuk diri dalam ati ketegal ke enda ingat ke apai seduai ia di menua. Tu nyau ka berapa tahun baru seduai ia sedar, baru seduai ia nemu penyaie runding seduai ia bangat sampai hati ninggal ke apai seduai ia ke udah tuai kediri di Bukit Beluai. Chukup panjai malam sepi seduai ia, enggai apus-apus.
Kelama-lama hari pan kerebak pagi, seduai ia pan lalu nyimpul perengka diri kira ke ka beratur mupuk pulai. Nya meh Bunsu Burung lalu bejaku, “ Kingat ke magang semua utai ke diajar aku ke seduai ngelamatu, padah ke ngagai anak mensia, anang bemunsuh enggau kami bansa burung, enti mensia munuh kami, ila kami bebalas makai utai ke di tanam sida ia”pia deh ko pesan Bunsu Burung. “Siti agi igat, enti seduai nuan pulai lagi anang malik ke belakang, enda ibuh nemu utai ke ka nyadi, aku ulih nganjung seduai . Alau meh nepan ba belakang aku” pia deh ko padah Bunsu Burung ngagai seduai ia.
Lalu nepan meh seduai ia ko jerita, dia deh Bunsu Burung lalu terebai ngelayang ngelindung remang. Entepa ke ia sayap dinga nyau begugu, seduai menyadi tu tadi nyau penapat-rat meh bepegai ba belakang Bunsu Burung. Terebai meh ko jerita sida tiga tu tadi enda lama udahnya lalu datai ba Bukit Beluai. Datai diak seduai ia lalu di engkah ke Bunsu Burung ba mua langkau sida ia. “Igat..angka tu meh kitai ulih betemu, kati ko enda deh, ga igat Apoi tadi bisi malik ke belakang lebuh kitai ke ngejang, sampai ke ila enda meh ulih bala anak mensia meda menua kami,”pia deh ko Bunsu Burung bejaku. Nya meh tudah Apoi bisi berasai salah amat laban ngelanggar janji Bunsu Burung. “ Apai seduai dek udah nadai igat, ko ibuk nuan nusui ke aku demalam. Tang ia enda sampai ati madah ke ba mua seduai, tat ke meh ati seduai igat, udah tu lagi mupuk seduai di ngelawa Wong ba ulu sungai tu, ambi seduai nemu nama utai ke nyadi” pia deh ko ia bejaku baru.
Enda lama dah nya Bunsu Burung lalu madah ke diri mupuk, ia lalu angkat terebai entachang tunga ke langit besai. Nya alai sampai saritu bansa Murut enda ulih meda menua Bunsu Burung agi ko jerita sida ke Tuai laban ari sumpah Bunsu Burung empu. Nyangka meh siti-siti bansa enda sama cerita ia, minta ampun meh ngagai kitai semua, laban dalam jerita tu ke segi di tusui bala ke di sidi aku(penulis) madah munyi tu.
Nya meh ko jerita, lalu nyau meh seduai madi tu tadi mai ati tusah, baban, ringat, ringat kediri ke enda ulih betemu enggau apai seduai ia ke udah parai. Ninga aja parai tang bangkai nadai di peda. Mupuk meh seduai ia nadai bejaku, nadai bepalik pangan nuju ngagai aie wong ke di padah ke Bunsu Burung nya tadi. Lebuh ke bejalai tu tadi seduai ia sama bela nyabak dalam ati. Aie mata ke aja beterenjui labuh. Kekadang di dinga ga sintak sirut sabak siku-siku. Sama bela bakanya. Sinu amat ga meda pendiau seduai ia. Kaki ke nyingkang pan asai ke enda nujah tanah, naka meh penusah ati seduai ia. Mua mata apai seduai ia sekumbang ke idup seruran bemain dalam runding enggau ati seduai ia. Asai ke enda pecaya, pia meh ko jaku.
Nama agi deh, lebuh ke datai ba aie wong nya tadi. Diak pan hari nyau hujan naka ngelebat-lebat nya. Dunya nyau petang kena lindung remang ke berat chelum ngelintum nambun leka hujan ke chukup pemesai. Langit nyau begugu, kilat nyau nyepar mangka sebelah selepak bandir kayu. Kudi amat meh hari mayanya. Nyangka nya nemu kini penusah ke nuntung duai madi nya. malik seduai ia ngagai batu ke dugu-dugu besai ba puak kaki wong nya, peda seduai ia nyau ngeruang batu nya laban ke udah bekau niang apai seduai ia duduk lama nganti penatai seduai ia.
Nya meh ko jerita, naka pemedis ati seduai ia ngagai diri empu, lalu angkat seduai ia sama nanggung ari sepiak-sepiak batu nya. Di tanggung seduai ia batu nya tadi lalu di ayun-ayun ke seduai ia sereta, nya meh ngasuh batu nya tadi nyau lanjut bepending tuchi-uchi baka pending kali ko jerita. Lalu di ayun tikau ke seduai ia naka pengering diri meh nya. Peda tak lapu-lapu batu nya ko jerita melayang ke langit datai ke enda di peda agi. Batu ke di tikau ke seduai ia tu tadi ko sida ke tuai lalu terengkah naka penyauh ngelawa bagi menua Sarikei di Batang Entabai.
Nya alai, munyi ko ke dipadah ke aku (penulis) ba ke dulu agi, batu nya terengkah ba siti bukit ke di kumbai orang Bukit Jipun ke diatu. Laban orang menuanya nyebut kali, Jipun. Diatu agi meh bisi batu diak sebaka amat baka kali tauka jipun. nya meh alai Bukit nya di kumbai orang Bukit Jipun. Laban seduai tu segi anak petara, uji kitai berati ke pengering seduai ia, berapa jauh menua bagi Sarikei ari Menua Ulu Terusan Lawas. Tang ari segi pengamat tauka enda, kitai sama enda meh nemu. Nyangka ba menua nya ke bisi lain ga cerita ia. Tang aku (penulis) nitih ke di padah ke orang ke nusui ke aku meh.
Nya meh tadi nyau nampung ngagai seduai madi ke enda puas hati tu, umba ke segi agi ringat, Lalu di kempuk Sangor tuku tanah naka pemesai-mesai ko jerita, lalu di tikau ke ia ngelawa tuju tasik besai diatu di sebut kitai Tasik China Selatan, dinga nyau merentum tanah nya tadi labuh, tepambar ba gigi aie tasik. Nyadi ko sida ia, tanah indu ke besai lalu mansut ke siti pulau ke di kumbai kitai diatu Pulau Labuan. Nya alai, Pulau Labuan Cun-cun ba entara Limbang, Temburong (Brunei) enggau Lawas. Nya alai bala Lunbawang kelia ke peturun ari bala Tuai Labu Danur nyebut Pulau nya Pulau Labu’an, ko jerita. Laban sida ia agi ingat amat ke tanah nya suba segi tanah di ambi ari Ulu Terusan suba ke di sebut Sungai Labu nitih ke nama ketuai sida ia. Nya meh kebuah aku (penulis) ke nusui ke kitak jerita tu ari pun amat laban ia segi besangkut paut. (Minta ampun ngagai bala kitak ke asal ari Pulau Labuan nyangka meh jerita tu enda sebaka enti nunda ke sejarah menua kitak jam ke diatu, laban utai tu nyadi dulu ari batang tubuh kitai ke menchelak baka ke baruh ari kediatu)
Nama agi deh, nyabak nadai meh guna, bedarah leka mata nadai meh tuju agi. Ukai nya ulih idup agi ga apai seduai ia. Bendar meh seduai madi tu ko jerita nyabak diak. Pengujung seduai ia ke nyabak seduai ia lalu berunding begaga ke tanda pemati apai seduai ia Darung ambi ke pengingat seduai ia. Seduai ia lalu nempa batu dua igi baka rumah lalu di anjung seduai ia jauh ngelawa ujung menua ke diatu di kumbai orang menua Long Semadoh. Batu nya nyadi ketanda pengingat niang indai enggau apai seduai ia ke udah lama ngejang. Nya alai diatu kitai agi ulih meda bisi dua igi batu ba sukut menua Long Semadoh bisi dua igi batu besai baka rumah. Bedau sampai ke diatu.
Tang bisi ga Murut ari menua nyin madah ke batu nya ukai batu kelai sangor enggau Apoi, nya batu nyadi ari dua buah rumah panjai ke betukar nyadi batu sepengudah sida ba rumah nya ketawa ke jelu tupi indai tuai siku. Tang di tasat aku ( penulis) nadai entu nyengala ga cerita batu nya. Tang enti kitai kia ke, segi amat bedau batu nya nyentuk ke sari tu, sebaka amat enggau tempa rumah ke digaga kitai mensia. Tang nya nadai pulai ke pengirau kitai laban utai tu munyi ko aku ke dulu segi udah bisi sebedau pendiau kitai idup nguan menua nya suba. Nya alai bakanya meh ko jerita empa penyiru ati seduai ia ke di kena mantup ke kenang pengidup apai enggau indai seduai ia ke udah parai……………………..