Ensera Apai Saloi

Dulu kelia bisi dua iku melaki bini.Nyadi,bini iya tu Enchelegit lalu laki iya dikangau ke orang Apai Saloi. Seduai tu bisi siku anak,nama iya Saloi.

            Deka nyadi ke jerita,bisi sekali Apai Saloi tu diasuh bini iya nurun ke pasar laban perengka dapur sida menyanak nyau deka abis, pia mega gari sida nyau luya sereta enda manah agi dikena.

            “Apai saloi….!! OO Apai Saloi..!!...uji kitu dulu nuan sulu...bisi utai deka diasuh aku kereja nuan dulu…pia nadai meh nuan pengawa dia…ranggak-ranggak merap tiang teras nya…kitu dulu nuan..jampat agi ke…” pia ku Enchelegit ngagauka laki iya.

Apai saloi pan lalu begadai-gadai angkat…tak semadi amat iya ke nuduk kediri…

“Nama nya Enchelegit…enda nemu enda rauh-rauh nama pagi..uji bala manuk bala jani nya engkani nuan dulu…ngachau aku tu deka gali aja nuan tu…tawas pan empai..agi petang ari udah diasuh nuan dani…enda tau meda aku tu senang mimit…hisss…..” pia ku Apai Sali muchau nganu bini iya laban ke di asuh angkat.

“Apu…naka gak pemuruk-muruk laki..kati meh aku tu tau ka jadi enggau nuan nya Apai Saloi..heyyy…buruk-buruk nuan…sayau meh aku ke nuan apai saloi…nuan meh sulu ati peremban dalam aku…jampat…kitu dulu…” pia ku jaku Enchelegit nunduk ke laki iya.

Lebuh ke ninga Enchelegit munyi nya.Tak berasai kembai idung bakih tadi.

“Iya nama nya sulu..?? padah dia meh kumang..” pia ko Apai Saloi nanya bini iya.Naka pementas enggau penyayau iya nanya bini iya.

“Baka tu iya Apai saloi..perengka dapur kitai nyau ka abis...pia mega gari nya nyau luya..aku deka ngasuh nuan ke pasar meli barang dapur mimit…sereta gari siti dua dulu..Nyah..tu duit dikena nuan meli garam enggau miching kena ngerami paku ngambi keru..tu duit di kena nuan meli kain dikena nampal tanah rekah..alai..nurun nuan..”pia ko Enchelegit  madah ke laki iya.

Sepengudah Apai Saloi mandi sereta begari,Apai Saloi lalu nurun kepasar.Kira bisi sebatang insap meh pejalai tudah lalu datai meh tudah tuai ba pasar.Datai ba pasar,apai Sali lalu meli garam sereta miching ti di asuh bini iya tadi.Udah nya,iya lalu ngagai kedai gari lalu meli kain ke Enchelegit.

Udah semua perengka ti patut dibeli iya bisi magang,Apai saloi lalu mulai ke diri.Sepemanjai jalai iya mulai ke diri tadi,dia deh Apai Saloi tu mansa madang paku.

  

“meli garam enggau miching kena ngerami paku”…pia ku jaku Enchelegit ti di ingatka Apai Saloi.Nama agi deh,alu genggam iya garam enggau miching ti dibeli iya tadi,lalu ditabur ke iya ba madang paku nya tadi.Mansa madang paku siti tabor ke iya ga garam enggau miching nya tadi,mansa madang paku baru,tabor ke iya baru ga garam enggau miching nya tadi nyentuk ke garam enggau miching nya tadi ambis.

“meli kain dikena nampal tanah rekah”…nya jaku Enchelegit siti agi ga ti di ingat ke Apai Saloi.Mansa iya ba tanah ke merekah,di charik ka iya ga kain ti dibeli iya tadi kena iya nampal tanah ke merekah.Mansa baru tanah ke merekah charik ka iya baru ga kain nya..pia meh pengawa iya sepemanjai jalai nyentuk ke kain nya tadi ambis.

Datai ba rumah dia Enchelegit lalu nanya. “ni garam miching enggau kain ka di asuh aku beli nuan tadi dih..?”

“anang irau nuan sulu..udah dikena aku ngaga utai ti munyi ko di padah ke nuan tadi..garam enggau miching dikena aku nerami paku ninting jalai tadi…kain pan udah di kena aku nampal tanah rekah ba jalai tadi…” pia dih ko Apai Saloi madah e bini iya enggau tuchum.

“apu..abis meh utai ti di asuh aku tadi deh..?!!” pia ko Enchelegit  nanya laki iya enggau nyawa ti inggar.Nyau bebali mirah mua Enchelegit ninga cherita laki iya.

“endai..nama nuan tak nganu aku deh Enchelegit wai?? Iya nuan ga madah… meli garam enggau miching kena ngerami paku … meli kain dikena nampal tanah rekah…nama penyalah nya dih?betul meh utai ti digaga aku tadi..garam enggau miching kena aku ngerami paku..kain kena aku nampal tanah rekah..nama penyalah nya dih?” pia ku Apai Saloi madah sereta nanya bini iya.

Enchelgit pan lalu duduk nyabak. “huu…uu...huu…naka ga pemeli-meli…nadai utai ngenadak nuan tu.. meli garam enggau miching kena ngerami paku ko aku nya tadi dikena aku manduk lauk dikena nyumai… meli kain dikena nampal tanah rekah ko aku nya di kena aku ngari diri dikena nutup tubuh diri..naka-naka ga pemeli nuan tu…huuu…uuu!!!”  pia ku sabak Enchelegit nganu laki iya.

Meda bini iya nyabak…Apai Saloi enda memunyi..iya lalu ngali ke diri merap tiang teras ke dikimbit iya pagi tadi lalu ngenang ke nama penyalah diri.Laban kenu ku ati iya din,iya nadai penyalah laban utai ti dikereja iya nitih utai ti dipadah ke bini iya Enchelegit.

Pia meh ensera dua iku melaki bini ti begulai ngidup kediri.